Ministerio di Finanzas, Asunto Economico y Sector Primario a presenta e resultado preliminar di un estudio importante tocante cultivo comercial (“comerciele kassteelt”) cu ta pone Aruba un paso mas cerca na seguridad alimentario y sostenibilidad economico.
E estudio, realisa den colaboracion cu PRIVA, Santa Rosa y TWO-Aruba y Hulanda, ta sirbi como fundeshi pa e creacion di e Agri-Innovation Park: un centro di conocemento y produccion agricultural moderno cu lo traha pa futuro di Aruba.
Segun minister Geoffrey Wever, “e Agri-Innovation Park no ta solamente ta un proyecto a corto plaso, e ta un inversion structural den nos futuro. Nos ta traha pa yega na mas independencia alimentario, crea mas oportunidad y cupo pa trabou y stimula un crecemento economico sostenibel.”
E iniciativa ta parti di e transicion pa diversifica economia y pa traha un sistema di produccion mas local. E modelo nobo lo duna agricultornan infrastructura moderno y servicio logistico pa nan haci uzo di dje, sin cu nan mes tin cu inverti sumanan cuantioso di antemano (“starting capital”). Asina lo crea mas oportunidad y entrada pa mas hende pa participa den e sector, engradeciendo esaki y conhuntamente e resiliencia propio di Aruba.
E proyecto no ta wordo desaroya pa competi cu agricultornan actual, sino pa fortifica nan y crea mas espacio pa innovacion, cooperacion y crecemento. Minister Geoffrey Wever ta invita tur agricultornan y agri-entrepreneurs interesa pa sigui e proceso di cerca.
Pronto lo organisa un sesion informativo pa presenta e resultadonan preliminar. Pa mas informacion tocante e estudio y e trayecto di AIP, por tuma contacto cu Santa Rosa.
