Durante reunion di Comision di Asuntonan di Famia y Adultonan Mayor, Parlamentarionan a pidi aclaracion riba diferente punto di preocupacion

Ayera a tuma luga reunion di e Comision Permanente di Asuntonan di Famia y Adultonan Mayor. Durante e reunion aki a invita tanto AZV como SVB pa duna un presentacion tocante temanan di pensioen, reparatietoeslag, lista positivo di remedi, tempo di espera na specialista y e recorte den AZV.

Despues di e reunion aki actual parlamentario di fraccion MEP y ex minister di Salud y Turismo Dangui Oduber a duna un declaracion na prensa tocante con e reunion a bay y puntonan cu a bin dilanti pa aclaracion.

Pa loke ta e tema di lista di remedi positivo, D. Oduber a indica cu despues di e presentacion di AZV y SVB por a conclui cu te ainda pensionadonan como aseguradonan tin cu paga pa un gran cantidad di remedi.

“Esaki sigur nos ta lamenta y condena pasobra na e momento aki AZV tin un surplus di 100 miyon florin. E proyeccionnan pa aña 2025, 2026 y 2027 ta cu AZV ta bay mantene surplusnan di riba 50, 60 y 70 miyon florin. Nos no ta compronde e motibo pakico Sra. Wyatt-Ras como minister di Salud a cambia nos decision,” el a remarca.

D. Oduber a splica cu na luna di december 2024 Gabinete Wever-Croes a tuma decision pa duna instruccion na AZV pa elimina e lista positivo di remedi, pa pensionado y tur asegurado, pasobra e situacion financiero di AZV a conoce un mehoracion cu un surplus di 100 miyon.

“Pa nos esaki ta incomprendibel, ta inhustificable cu bo tin un fondo cu a produci mas di 100 miyon florin , e proyeccion ta cu e fondo ta bay keda produci surplus, y bo ta keda castiga y cobra nos pensionadonan y tambe nos aseguradonan pa remedi. Bo a gaña tur nos grandinan, bo a usa nan consenshi y awe bo a traiciona tur nos grandinan,” e parlamentario a agrega.

El a splica cu durante nan maneho nan a introduci e lista positivo na 2020 durante pandemia. El a sigui splica cu AZV a confirma na e momento ey cu tabatin un deficit di casi 100 miyon florin. Gobierno a haya e instruccion pa corta 60 miyon y segun e parlamentario e palabracion tabata pa na momento cu AZV conoce un mehoracion, un situacion di surplus, nan lo duna back e remedinan aki.

Na luna di december 2024 Gabinete Wever-Croes a tuma e decision, a manda un instruccion pa AZV pa kita e lista positivo aki pa tur pensionado entrante 1 di februari 2025. Pero esaki no a tuma luga tampoco manera e ex-minister di Salud a instrui.

Parlamentario D. Oduber a splica den su declaracion na prensa ayera cu esaki ta pa motibo cu e proceso administrativo a tuma mas tempo di loke a premira y a kere cu minister Wyatt-Ras lo mantene e decision, pero el a indica cu awor nan ta bou impresion cu el a cambia di decision pasobra ainda pensionado y asegurado mester paga pa remedi.

Pa loke ta e tema di recorte di 60 miyon el a splica cu inicialmente Hulanda a duna instruccion pa corta cinco miyon florin pa aña y cu despues diripiente na Den Haag BZK a manda un instruccion cu e ta cinco miyon pa luna, pues un recorte di 60 miyon. El a indica cu durante e reunion di comision ayera AZV a confirma tambe esaki y cu te awe, cinco aña despues ni BZK, ni CAft por a duna un splicacion ni argumenta con nan a yega na 60 miyon, cu gobierno di Aruba a indica tabata un suma “irealistico.”

“A ser proba cu 60 miyon tabata un suma irealistico, nos a bin ta bisa esaki desde pandemia y ta algo cu e pais no por cumpli cune pasobra e no ta humano pa corta 60 miyon den cuido medico den un pandemia. E 60 miyon a sali for di Hulanda y esaki a ser confirma pa un miembro di CAft, Hellen van der Wal, cu a confirma cu te dia di awe Hulanda no por a hustifica y argumenta con nan a yega na e suma aki,” el a splica.

El a enfatisa cu esun responsable pa e recorte di 60 miyon den cuido ta gobierno di Hulanda cu a duna Aruba instruccion pa bay corta y si no corta Aruba no lo a haya placa pa sobrevivi pandemia.

Mencionando e aumento di reparatietoeslag, D. Oduber a expresa cu e “ta lamenta cu e gobierno aki ta hunga cu consenshi di nos grandinan y mi ta kere cu esaki ta algo cu bo no ta haci cu, specialmente e pensionadonan. Nan a ser bisa cu nan ta bay haya aumento di pensioen di 700 florin, awe nan a haya aumento di 250, cual sigur nos ta aplaudi y ta contento cu nan a haya aumento di 250, pero un biaha mas bo a gaña e pensionado.”

El a agrega cu durante e reunion di comision SVB a confirma cu aumentonan den pensioen manera cu ta ser priminti ta algo cu e fondo no ta bay carga y ta simplemente basa riba engaño politico.

Di su banda parlamentario lider di fraccion PPA Otmar Oduber a indica cu e reunion a concentra riba e aspecto di AZV y riba e lista positivo y diferente punto cu ta bin dilanti den comunidad como preocupacion pa loke ta tempo di espera di diferente specialista y discusion cu tabatin ultimo pa loke ta trata e recorte cu a tuma luga den AZV.

El a splica cu pa loke ta situacion di recorte di 60 miyon den AZV den e reunion AZV a bisa cu nan a ser instrui den pasado pa corta e 60 miyon, y aunke no a yega na corta e 60 miyon pasobra no a logra, en total durante periodo di tres aña y mey cu a haci recorte di riba 100 miyon florin.

“Den salubridad di pais Aruba a ser corta mas cu 100 miyon di servicio, remedi y bienestar di nos comunidad y esey ta yena nos cu hopi preocupacion,” el a remarca.

O. Oduber a indica cu AZV no a bay den detaye y a bisa cu ta gobierno tin cu bay responde riba e instruccion cu a bin y e lider di PPA a enfatisa cu lo percura pa haya sa ken ta responsabel y ya caba a pidi e minister di Salud pa bin parlamento pa duna splicacion.

“Na final di dia un hende mester para responsabel di e recorte dramatico cu a ser haci. Awe nos ta papiando di casi 102 miyon di surplus cu AZV tin y e pregunta ta si esaki a bay na costo di bida di hende, di salud en general aki na Aruba,” el a cuestiona.

O. Oduber a remarca cu tin un confusion di e tempo ey caba y lamentablemente awe ainda ta papia riba dje, cinco aña despues cu e recorte a tuma luga caba, pero niun hende por splica di unda e 60 miyon a bin como e cifra cu mester ser corta.

El a agrega cu e miembro di CAft, referiendo na Hellen van der Wal, a bisa duidleijk cu tabata papia di cinco miyon pa aña y no cinco miyon pa luna. El a indica tambe cu ex prome minister a mustra un rapport di PWC cu tambe a mustra cu tabata papia cinco miyon pa aña y no cinco miyon pa luna. “P’esey ta importante pa papia cu e gobierno actual, pasobra a haya un bista tambe den sala di e gobierno saliente cu a bisa hopi duidleijk cu algo no ta klop y den e caso aki un instruccion a bin di Hulanda.”