Ayera mainta den corte a cuminsa cu tratamento di caso Tulipan cu ta trata iregularidadnan den Arubahuis y den cual ex minister plenipotenciario di Hulanda, Guilfred Besaril ta ser acusa di malversacion di placa durante su periodo como minister plenipotenciario. Ex director suplente di Arubahuis Glenn Ling ta ser acusa di ta complice durante su periodo como director interino.

Durante e tratamento di e caso tanto hues como fiscal di Ministerio Publico (OM) tabatin diferente pregunta relaciona cu e seis zaakdossier cu ta ser trata den e caso. Hues y fiscal a cuestiona Besaril su gasto pa loke ta trata gastonan di telefon cu el a haci, su vakantie na Aruba, con e tabata usa e debit card di Arubahuis, construccion di su cas, huur di un vivienda na Hulanda, entre otro.

Un di e puntonan primordial tabata enfoca riba Besaril su uso di e debit card di Arubahuis cu ta destina pa cubri gastonan cu ta ser haci relaciona cu su funcion. Tanto hues y fiscal a cuestiona con facil Besaril tabata usa e carchi, den varios instancia den situacionnan cu e no tabata eherciendo su funcion oficial.

Un di situacionnan aki ta trata entre otro un “upgrade” di pasashi di avion cu el a haci pa biaha den business pa su persona y su casa. A cuestiona fuertemente con por ta cu el a pensa cu tabata okay pa cubri e gasto di ‘upgrade’ di su casa cu placa di Arubahuis mientras cu no a ni puntra pa aprobacion pa esaki prome y tampoco a pensa di paga e gasto di su casa cu su propio placa pero simplemente a dicidi di pag’e cu placa di Arubahuis.

Tambe hues y fiscal a cuestiona con por tabata posibel cu durante un vakantie cu el a haci pa Aruba el a usa e debit card di Arubahuis pa keda na hotel, come na restaurant, huur auto, pone gasolin pa auto, entre otro siendo cu e tabata di vakantie.

Besaril, ken tabata rapidamente contesta e preguntanan, a indica cu e motibo pa esaki ta cu no tabatin regla cla tocante con pa usa e debit card di Arubahuis. El a enfatisa, na varios ocasion, cu e no a horta placa di Arubahuis y cu semper el a actua di e forma cu el a sinti y kere ta corecto.

Finalisando e tratamento Besaril a expresa cu e citacion ta hopi dificil p’e personalmente y nunca a spera cu e lo termina den un situacion asina. El a splica cu e no ta trahando y cu e tin un rijschool, pero tambe ta un situacion hopi dificil pasobra e hecho cu e tabata cera den KIA y cu ta sospechoso den un caso penal ta haci dificil cu e ta haya persona cu kier tuma les di rijbewijs cerca dje.

Pa loke ta trata ex-director interino di Arubahuis Glenn Ling, ken ta ser acusa di ta complice, hues y fiscal a cuestiona su capacidad pa eherce e trabou di como director y asina evita e gastamento di placa excesivo cu Besaril tabata haci.

Hues a cuestiona con Ling por a permiti esaki y no a actua como un director mester actua na cual Ling simplemente a indica cu su autoridad tabata ser mina y cu e ex-minister plenipotenciario tabata pasa riba dje. Den otro palabra a indica cu su mannan tabata mara y no por a haci mucho.

Na final di e tratamento Ling a expresa cu e ta sinti culpabel den sentido cu e mester tabata mas alerta y alerta prome minister e tempo ey tocante kico tabata pasando, pero a bisa cu simplemente no tabata por.

Pa loke ta su situacion personal Ling a splica cu ser considera sospechoso den e caso aki tin un efecto fuerte riba su persona, pero cu a pesar di esaki su situacion personal ta okay. El a informa cu desde 2023 e ta cu VUT, pero cu na april 2024 despues di a keda deteni como sospechoso el a haya un ataca di curason y awor e ta parando back riba su pia y ta spera cu e caso aki por termina pronto.

Despues di e prome dia di tratamento, na salida di corte, abogadonan di tanto Besaril y Ling a duna un declaracion na prensa. Doris Canwood, ken ta abogado di Besaril, a splica cu e tratamento a bay okay y cu durante e prome dia di tratamento Besaril a haya e oportunidad di duna su banda di medaya ora cu el a ser confronta cu e diferente documento cu fiscal ta haya ta belastend (pisa) y a duna su version di loke cu a pasa y dicon cosnan na opinion di e fiscal por a bay fout.

Abogado Canwood a splica cu inicalmente ora a haya e lista di sospechonan sospecho a haya un lista largo di 10 pagina y loke a resta aworaki ta tres pagina dividi den seis punto, di cual un ta basicamente un resumen di tur e otro cinco hunto, pues den su opinion ta cinco punto ta papia dje.

El a indica cu aworaki nan mester wak ta kico ta resta di esey despues di e tratamento pasobra cada punto tambe ta dividi den diferente pida caminda mester bay door di nan uno pa uno.

Miembro di prensa presenta a puntra e abogado tocante e diferencia di e caso di Besaril compara cu otro politico, cu tambe ta ex-polis, caminda Besaril a perde su trabou prome cu e caso a bin dilanti, mientras cu pa e otro politico ex-polis esey no tabata e caso.

Relaciona cu esaki abogado Canwood a indica cu nan a bringa e parti ey te na hoge beroep, pero a remarca cu pa ora e caso den hoge beroep a ser trata ya Besaril a entrega su mesun peticion pa retiro. El a splica cu e unico cos cu a pasa ta cu e peticion cu a ser entrega di seis luna prome e ora ey ainda no a ser trata.

E ora ey nan a bisa den hoge beroep cu el a entrega su retiro caba, pues no tabatin importancia y e ora e decision den corte di prome instancia a ser rectifica.

El a remarca cu ta berdad cu e tratamento, den su opinion, ta un tiki diferente pasobra den e caso di e otro cliente sikiera a warda te ora cu un hues a duna un opinion si loke el a haci ta un delito of no.

Pa loke ta trata sospechoso Ling, su abogado Demis Ellis a remarca cu Ling su opinion semper tabata cu na su miho forma el a purba di haci loke e por a haci, den e cuadronan cu ta permiti y voor de rest e no a logra.

El a indica cu p’esey tambe su posicion durante e tratamento ta cu el a purba y a faya di interveni den cierto ocasion, pero cu esey no ta nifica cu e tabata complice manera cu OM ta acus’e.

Abogado Ellis a remarca cu esey ta bay ta tambe e punto di salida pa e defensa pa diabierna awo.

Por ultimo el a indica cu e tratamento y preguntanan cu fiscal y hues a trece dilanti tabata locual nan a spera, pues no a spera nada otro. El a indica cu tabata duidelijk kico e acusacionnan ta y for di tempo di interogatorio e tabata asina y e tratamento a bay manera cu el a pensa cu e lo a bay.

Diabierna awor ta continua cu tratamento di e caso Tulipan na unda fiscal lo presenta su rekisotorio den cual lo bira conoci kico ta e castigo cu ta exigi y despues tanto abogado Canwood como abogado Ellis lo presenta nan defensa pa nan clientenan.