Mediante un comunicado di prensa, actual parlamentario di fraccion MEP y ex-minister di Finanzas y Cultura, Xiomara Maduro a reacciona riba acusacionnan presidente di Sindicato Aduanero Di Aruba (SADA), Edward Maduro a haci den su contra, cu ta relaciona cu e caso di aumento salarial den corte cu e sindicato a perde.

Segun e parlamentario ta indica, e presidente di SADA ta acusa su persona di a “cuchiya” e Aduaneronan durante su tempo como minister di Finanzas y esaki, el a menciona, ta pa motibo cu pa di dos biaha SADA ta perde su caso di aumento salarial dilanti hues.

Den su reaccion, parlamentario Maduro ta splica cu den porta di eleccion 2021, riba dia 21 di juni 2017, ex-minister di Finanzas e momento ey, Angel Bermudez y SADA a firma un convenio pa cambia structura y aumenta salario di tur duanero cual lo mester a bira vigente entrante januari 2018 y mientras tanto dia 1 di juli 2017 lo mester a haya un periodiek.

El a sigui splica cu na september tabatin eleccion y na november 2017, na momento cu Gabinete Wever-Croes I a sinta, nan a cuminsa traha riba ehecucion di e convenio y aunke ya caba den tabatin fondo reserva den presupuesto 2018 pa paga pa e aumento di salario aki, segun e parlamentario, ex-minister di Finanzas Bermudez no a manda pidi ningun conseho cu tabata necesario pa por a ehecuta un cambio asina grandi manera esun cu a keda acorda den e convenio.

Den su funcion como minister di Finanzas, parlamentario Maduro a manda pidi tur conseho necesario di Departamento Huridico y Departamento di Recurso Humano relaciona cu e aumento aki, y dia 19 di november 2018 a presenta un concepto di Decreto Nacional pa haci e cambionan necesario na Raad van Advies. Dia 12 di december Raad van Advies a duna su conseho, cual tabata un conseho negativo y a indica cu e schaalnan di Aduana lo ta mas halto cu esun di BRA cu ta conta pa tur ambtenaar, cu no tin hustificacion pa tin diferencia grandi entre e salarionan di Aduana y otro empleado publico, cu e

cambio lo causa precedencia negativo y cu e lo tin consecuencia presupuestario y financiero pa gobierno.

Den su reaccion, parlamentario Maduro ta splica cu e tempo ey el a laga haci cambionan necesario y cu na mas di un ocasion a acerca SADA pa por consulta e cambionan aki, pero cu SADA a mustra cu nan no tabata kier a tene na cuenta e consehonan di tur e instancianan relevante y di Raad van Advies y kier a ignora esakinan.

E ex-minister di Finanzas a indica cu na september y october 2022 e decretonan nacional nobo a keda cla y e salarionan di Aduana a conoce un aumento. Sinembargo, segun e parlamentario, un grupo grandi di Aduana, riba conseho di nan sindicato SADA, a bay den bezwaar y despues den beroep, cu e resultado cu hues den tur dos instancia a dicta cu SADA ta robes den su ponencianan.

Parlamentario Maduro ta splica cu den su sentencia di 24 di april 2025 hues a dicta cu Gabinete Wever-Croes haci suficiente pa respeta y pa por cumpli cu e convenio dentro di e espacio financiero cu tabatin, y a actua corecto teniendo na cuenta e consehonan di Raad van Advies, Departamento di Recurso Humano y Departamento di Legislacion.

El a remarca cu como minister di Finanzas el a haci tur locual tabata na su alcance pa awe Aduana por a bay dilanti den salario y ademas por a haya indexering di 11,7% manera tur empleado publico.

Na mesun momento el a expresa cu e ta haya ta preocupante cu “SADA ta keda bay atras den conocemento y di e manera ey ta pone e Aduaneronan pasa berguensa y de paso ta perhudica e Cuerpo di Aduana tambe.”

“Ta lamentabel pa mira cu Sr. Maduro como sindicalista su legado lo ta crea discordia, mal informa su siguidornan, kere den webo di gay di ExMinBermudez y crea un ambiente toxico na Aduana sin tin mester. Awo e por bay purba su suerte cu e minister di Finanzas nobo,” el a finalisa.

Despues cu e veredicto di hoge beroep den e caso di SADA a keda conoci, den un conferencia di prensa presidente di SADA Edward Maduro a splica kico corte a bisa y kico, for di su punto di bista, esaki ta nifica.

El a splica cu corte a bisa cu sindicato SADA mes no tabata por a bringa e caso pero cada ambtenaar, ora cu nan haya nan decreto nacional, mester a bay den bezwaar, cual a sucede unda cu casi alrededor di 140 ambteaar a bay den bezwaar contra e decreto aki. Den corte di prome instancia nan no a haya rason y despues di esaki nan a scoge pa bay hoge beroep cu fin di april a dicta su veredicto cu no tabata na nan fabor.

Maduro a sigui splica cu en principio corte a bisa cu en berdad si e ambtenaar no ta acuerdo cu e decreto nacional e por yega corte y corte por test e ley aki y eventualmente trek e in a base di algun argumento cu lo por bin dilanti unda por bisa cu e ley no tabata cuadra.

El a indica cu den prome instante esey tabata bon, pero despues corte a sigui considera e situacion y den su concepto ta haya cu gobierno a haci bon di reconsidera e convenio inicial.

Pero SADA no ta di acuerdo cu esey. “Ora ta cera un contract cu gobierno a base di negociacionnan y bo ta yega na un acuerdo, bo no por sin mas unilateral dicidi cu bo ta cambia e contenido di e convenio y esey ta caminda nos no ta di acuerdo cu corte,” Maduro a remarca.

El a splica cu e tempo ey gobierno a instala un comision unda tabatin DRH, gobierno, sindicato y dienst di Douanne y den e comision formal aki, cu segun el a indica a ser yama a traves di un ministerieele beschikking, a haci e afspraak pa yega na e convenio.

El a sigui splica cu despues, Gabinete Wever-Croes a bin cu argumento cu DWZ y Raad van Advies (RvA) a duna consehonan negativo, locual el a remarca ta “hilarisch” pasobra den su conseho RvA ta bisa cu nan no ta di acuerdo cu e versnippering (fragmentacion) di BRA, tanto polis y brandweer tin un structura di salario los di e BRA y esey ta e direccion unda cu Douanne a bay.

“Raad van Advies a bisa cu no ta consehabel pa sigui versnipper den e BRA pasobra e ora tin tres of cuater structura di salario… gobierno a bisa cu RvA su conseho tabata determinante pa haci un cambio den e convenio, pero no a tene cuenta cu tur e aspectonan cu RvA a tene. Bo a letterlijk pick and choose kico bo a usa di e conseho di Raad van Advies pa por a cuchiya e ambtenaar di Aduana, esta e minister anterior,” el a enfatisa.