Minister di Finanzas, Asunto Economico y Sector Primario, Geoffrey Wever a biaha pa Boneiro pa atende e conferencia anual di Dutch Caribbean Agriculture, Livestock, and Fisheries Alliance (DCALFA) – un encuentro clave pa futuro sostenibel di agricultura, pesca y cria di bestia den Caribe Hulandes.
E conferencia, cu ta uni representantenan di Aruba, Boneiro, Corsou, Saba, St. Eustatius y St. Maarten hunto cu delegacion di Hulanda, ta sirbi como plataforma pa intercambia conocemento, fortalece colaboracion y desaroya solucionnan comun riba tema di seguridad alimenticio, un asunto cu ta cada biaha mas y mas importante pa e bienestar di nos pueblo.
Den juni 2023 Gobierno di Aruba, e tempo ey bao encargo di minister Ursell Arends (Raiz), a firma e prome Memorandum of Understanding (MoU). Aruba y su isla rumannan a compromete pa stimula produccion local, mehora seguridad di cuminda (y reduci dependencia di importacion). Durante e conferencia di e aña aki, lo firma un extension di e MOU, reafirmando e compromiso den Caribe Hulandes.
Minister Wever lo representa Aruba den un panel strategico, hunto cu diputado Anjelica Cicilia di Boneiro y Recheline Leerdam di St. Eustatius, pa dialoga riba un vision comun pa garantisa seguridad di cuminda na nivel di Reino den Caribe Hulandes.
“Participacion na DCALFA ta crucial,” Minister Wever a comenta den un comunicado di prensa. “E ta yuda nos pensa y traha hunto pa logra eleva cada un nos produccion local, y identifica oportunidad pa colaboracion entre nos islanan. E tipo di cooperacion regional aki ta exactamente e tipo di accion structural cu Aruba mester pa sigui avansa den un manera sostenibel.”
Pa e pueblo interesa, e panel discusion lo ser transmiti en bibo riba Facebook di Entidat Publico Boneiro.
