(AP) — Grecia ta manda un cantidad record di bomberonan y ta casi dobel su flota di drone e verano aki pa combati e riesgo creciente di candelanan forestal grandi, stimula pa cambio climatico, segun oficialnan a bisa diahuebs.
Minister di Proteccion Civil, Ioannis Kefalogiannis, a bisa cu 18.000 hende—permanente y temporal—lo ser mobilisa, cu sosten di miles di boluntarionan, ya cu daño di candelanan forestal grandi a sigui crece durante e ultimo dos decada.
“Ta cla cu e condicionnan pa e aña aki lo ta particularmente dificil,” Kefalogiannis a conta reporteronan despues di asisti na un ehercicio di combati candela na sur di Atenas.
Temperaturanan ta subiendo y poco yobida a empeora e situacion durante e ultimo añanan.
Hefe di e Departamento di Bombero Griego, Teniente General Theodoros Vagias, a conta Associated Press cu lo desplega mas unidad elite den areanan cu mas riesgo pa ser afecta durante e temporada di candelanan forestal di 1 di mei te 31 di october.
“E crisis climatico ta aki pa keda, y nos mester ta mas eficiente den vigilancia, preparacion, y e manera cu nos ta mobilisa nos recursonan,” Vagias a bisa.
Segun data di e Sistema di Informacion di Candelanan Forestal di Union Europeo, daño di candelanan a subi pa mas cu 1.300 kilometer cuadra den 2021 y 1.745 kilometer cuadra den 2023—mas o menos tres biaha mas hopi cu e promedio di 2011 pa 2020.
Diahuebs bomberonan a tuma parti den un ehercicio pa test e reaccion di Grecia contra candelanan forestal grandi, cual ta dependiendo cada bes mas riba tecnologia avansa manera vigilancia cu drone y centronan di comando mobil.
Avionnan di candela a bula riba e bosque, bashando awa den un operacion coordina, mientras cu comandantenan riba tera tabata concentra riba tabletnan cu ta transmiti video di drone den tempo real. Wardacosta y e fuersa arma tambe a tuma parti den un simulacion pa evacua un campamento di verano pa mucha, menasa pa candelanan for di varios frente.
Oficialnan a bisa cu e cantidad di personal pa combati candelanan a subi casi 20% durante e ultimo dos aña, mientras cu flota di drone pa vigilancia di candela a crece pa 82, compara cu 45 anteriormente.
Mas o menos 300 bomberonan di Republica Checo, Francia, Rumania, Moldova, y Bulgaria lo ser desplega pa Grecia bao di un programa di preposicion di Union Europeo, segun oficialnan.
