Abogado mr. Murray no ta bay representa DIMP den corte otro siman

E situacion rond di e caso entama pa parlamentario Mike de Meza (AVP) contra Departamento di Impuesto di Aruba, cu ta programa pa tuma lugar otro siman diaranson, ta keda uno confuso y caotico. Mientras cu anteriormente un carta a indica cu un abogado specialista lo representa DIMP den e caso, ayera a resulta cu e abogado a keda descarta.

Entre tanto, ainda no ta conoci ki abogado si ta bay representa DIMP den e caso contra De Meza. Tampoco ta conoci precisamente kico ta e motibo cu mr. Mirto Murray, un abogado specialista di Corsou, a keda descarta.

Abogado di De Meza, mr. Desiree Croes, a confirma pa portal online NoticiaCla cu te cu ayera mainta, oficialmente mr. Murray tabata e abogado pa DIMP. Anteriormente el a bisa cu e mes a mira e carta den cual ta bisa cu mr. Murray ta e abogado representando DIMP. Pero ayera, oficialmente, esaki a keda cancela.

Segun 24ora a bisa ayera, mr. Murray a informa oficialmente, a traves di un e-mail, cu e no ta bay tuma e caso.

Mientras cu no sa ainda ken lo ta e abogado representando DIMP den corte otro siman diaranson, tampoco tin claridad riba kico precies a sucede cu e abogado di Corsou. Ken a contrat’e, y ken a tuma e decision pa descart’e un dia despues. Esaki pasobra, a pesar cu medionan local a reporta cu mr. Murray a presenta su mes como abogado pa DIMP na Corte, declaracionnan diaranson di minister di Finanzas, Geoffrey Wever (Futuro), bao ken e departamento di DIMP ta cay y kende lo mester ta na altura di tur suceso relaciona cu e caso, a bisa cu e no tabatin conocemento di e desaroyo aki.

Segun minister Wever, ni su persona como minister, ni Conseho di Minister a duna aprobacion pa contrata un abogado di Corsou pa e caso aki.

Mirando cu falta menos di un siman pa e caso mester presenta den corte, y ainda tin hopi falta di claridad, Bon Dia Aruba a tuma contacto cu minister di Finanzas, Geoffrey Wever, kende ta e minister encarga cu DIMP. A puntra kico precies a causa e confusion tocante e representacion legal di DIMP den e caso di De Meza, cu ta un caso hopi importante y sensitivo, y tin hopi atencion den esfera politico di Aruba. Sinembargo, te ciere di redaccion, no a ricibi un contesta.