Ayera riba rednan social tabata circula informacion di un carta cu Stichting Verstandelijk Gehandicapten Aruba (SVGA) a manda algun di su clientenan pa informa cu nan lo bay stop cu e servicio di transport cu nan tabata ofrece. Bon Dia Aruba a tuma contacto cu directora di SVGA, Els van Hommelen, ken a duna un splicacion tocante kico e situacion ta en realidad.

Van Hommelen a aclaria primeramente cu SVGA no a scoge pa termina e contract cu e compania cu tabata brinda nan e servicio di transport, e compania mes a informa e fundacion cu nan lo stop e contract cu nan tin cu nan pa servicio di transport.

“Mi ta compronde pa nan. Nan a duna nos un bon servicio pa 10 aña, pero locual nan ta cobra nos por ta e ta net over nan gastonan y mi ta compronde tambe cu, cu turista nan ta gana hopi mas. Esey ta e dificil cu semper tin aki na Aruba cu economia ta draai riba turista y e meneer a indica varios biaha cu locual nos ta paga e no tin ganashi na dje, dus e mes a dicidi di stop e servicio,” el a splica.

El a sigui splica cu e servicio di transport alrededor di 55 cliente tabata haci uso di dje y na e pasadia ta asisti160 cliente tur dia, locual kiermen cu e servicio tabata pa un tercera parti di nan cliente so. Tur e otro clientenan, nan mes ta zorg pa yega of famianan mes ta regel transport.

Van Hommelen a indica cu e ta hopi great cu nan por a ofrece e transport aki, pero awor lastimamente esey a cambia. El a remarca cu nan a purba busca otro oferta y tabatin hopi tempo bezig ta purba busca otro opcionnan, pero nan no a logra pasobra e problema principal ta cu nan in cuater ruta y niun compania tin cuater ruta disponibel na e orario cu nan mester.

“E ta orario tambe cu cruiseships t’ey, hopi turista ta pidi transport y den un dia nan ta gana cu turista locual nan ta haya cerca nos den un luna. Nos no a logra haya un otro compania cu por ofrece transport pa e presupuesto cu nos tin pe,” el a agrega.

El a splica cu nan a acerca Arubus tambe pa wak si nan por yuda nan ya cu nan ta yuda hopi scol, pero nan a informa cu nan no tin ni bus pa line dienst, y si nan tabatin mes e prijs lo bay ta hopi mas cu locual nan por paga.

“E ta hopi fastioso berdad y pa e 55 cliente aki ta un cambio,” el a expresa.

Van Hommelen a indica cu den e carta nan ta ofrece opcionnan na e mayornan. A indica cu e cabesantenan por yuda cu informacion na mayornan tocante busnan priva y por yuda nan si otro mayornan ta bay di acuerdo pa intercambia telefon cu mayornan cu ta biba cerca di otro y haci carpooling. “Nos kier pensa creativo cu nan, pero nos no a logra haya otro compania cu por ofrece e cuater rutanan tur dia pa e prijs cu nos por duna,” el a agrega.

Van Hommelen a indica cu recien nan a ricibi bishita di minister di Salud, Asuntonan Salud, Adultonan Mayor y Cuido di Adiccion Mervin Wyatt-Ras, nan cual nan a informa di e situacion pa asina wak si tin posibilidad cu hunto cu minister di Transport nan por yuda e fundacion.

Por ultimo, el a tuma e tempo pa gradici e compania cu tabata ofrece nan e servicio aki pa 10 aña pa e bon servicio ricibi. “Mi ta hopi agradecido na AGW Tours pa e 10 aña cu nan a duna nos servicio y 10 aña cu nan no a gana mucho riba nos. E tabata un servicio hopi valioso pa nos clientenan. Nos ta hopi agradecido cu nan.,” el a finalisa.