Gobierno y FCCA ta firma MoU pa renobacion y mantencion di barionan

Ayera mainta prome minister Mike Eman hunto cu directiva di FCCA, Julie Wever y Giovani Anthony, a firma un Memorandum of Understanding (MoU) den cual gobierno y FCCA ta haci un compromiso pa traha riba mehoracion di barionan unda FCCA ta ofrece vivienda na comunidad.

Prome minister Eman a splica cu e MoU aki, entre gobierno y FCCA, ta representa e compromiso conhunto hunto pa enfoca durante e periodo binidero riba renobacion y mantencion di e barionan.

Alabes el a indica cu den un otro acuerdo cu tambe nan lo firma pronto lo concretisa e compromiso di ambos parti pa loke ta e construccion di edificio y casnan nobo pa Aruba mirando cu e necesidad pa vivienda den comunidad ta hopi grandi.

E mandatario a enfatisa cu FCCA ta un partner cu pa decadas a mustra di tin e capacidad, no unicamente pa construi cas pa pueblo, pero tambe pa maneha nan y esey ta algo, el a subaraya, cu como gobierno nan ta admira.

El a remarca cu semper tin reto den diferente aspecto, manera por ehemplo mantencion y tambe den con FCCA ta calcula huur. El a agrega cu tin biaha nan ta tende personanan tin pensamentonan critico tambe riba esey, pero esey ta parti di e responsabilidad grandi cu FCCA ta carga, specialmente ora ta trata di ofrece servicio na un parti di comunidad cu ta den situacionnan hopi dificil.

“Pa e motibo ey awe tambe ta cuminsa enfocando riba e comunidad cu tinele mas dificil den nos comunidad cu ta e barionan caminda tin hopi casnan di pueblo y nos a mira cu tin necesidad pa e barionan ey haya atencion special caminda ta bay enfoca riba e mantencion cuminsando cu e limpiesa den e barionan ey,” e mandatario a señala.

Prome minister Eman a splica cu FCCA a entrega na gobierno un rapport caminda cu evidencia ta mustra cu tin un trabou y responsabilidad di parti di gobierno tambe pa percura pa e limpiesa den e barionan.

Despues di e firma di e MoU, e prome minister, hunto cu FCCA y Serlimar, DOW y Bureau City Inspector a bishita e casnan di pueblo na Noord pa mira con e situacion ta y pa cuminsa cumpli cu nan parti, locual FCCA ta puntra gobierno pa haci.

“Cu tur rason pasobra gobierno tambe tin cu asumi su responsabilidad den mantencion di e barionan. Como muestra cu esaki no solamente ta algo cu nos ta tene na palabra ,pero nos ta bay realmente cumpli cune. Ta bay firma e MoU aki caminda gobierno ta asumi su responsabilidad tambe pa mantencion limpiesa den e barionan y FCCA di su banda ta bay traha hunto cu gobierno pa mehora e calidad di bida den e barionan,” el a enfatisa.

Prome minister Eman a splica cu nan ta pensando riba cierto renobacionnan y tin diferente proyecto cu FCCA a mustra gobierno caba cu ta combina y ta den e liña di pensamento di gobierno pa locual ta renobacion di barionan y na mesun momento tambe tin plan pa construccion di areanan residencial nobo. El a indica cu diferente di nan FCCA ta ehecutando caba y otro nan mester bin ainda y gobierno ta dispuesto pa duna tur cooperacion pa esey.

“Awe ta un dia importante di compromiso di gobierno cu FCCA y di FCCA tambe na nos comunidad y e barionan cu FCCA ya ta manehando cu nos ta bay duna un enfoke special riba e calidad di bida den e barionan,” e mandatario a finalisa.

Di su banda, Sra. Julie Wever di directiva di FCCA a expresa cu FCCA ta hopi contento cu e firmamento di e MoU aki cu gobierno. “E ta un stap, e prome stap pa nos cera e lasonan cu gobierno pa nos por bay yuda y mehora e barionan,” el a indica.

Sra. Wever a splica cu esey ta un meta cu FCCA a cuminsa ya caba ta traha riba dje pa drecha tur nan barionan. El a sigui splica cu e strategia nobo di FCCA ta pa bay patras na tur nan barionan cu ya ta existi pa drecha nan, pone tur e amenidadnan cu hende tin mester pa por biba cu calidad den e barionan.

Alabes tambe el a indica cu tambe tur bario nobo cu nan kier traha nan kier traha nan den un forma holistico, e palabra cu tambe nan ta enfoca riba dje den nan strategia tambe. “Kiermen tur cos den dje, no solamente pone cas, pero pa FCCA ta importante ta e hogar. Hende mester por biba cu calidad. Y e bijdrage cu FCCA ta haci eynan ta haci tambe cu e ta pa full pueblo pasobra e ta bunita pa wak cu tur nos barionan ta bunita. Ta di nos e ta,” el a agrega.

Por ultimo sra. Wever a extende palabranan di gradicimento na gobierno pa kere den e strategia cu FCCA tin pa drecha e barionan y e compromiso pa duna nan e sosten.

“E ta hopi importante. Sin gobierno FCCA no ta logra su metanan. E fondo cu mester pa por drecha, pa por traha, pa por construi ta di magnitudnan grandi pasobra e necesidad ta grandi tambe, dus p’esey sin nos partner strategico gobierno esaki no ta posibel. Nos ta gradici e dia aki pa nos por cera e MoU aki,” el a finalisa.