Defending freedom and science to safeguard sustainable development campaign 2025

Ora diversidad biologico, of biodiversidad, tin un problema, humanidad tin un problema.

Diversidad biologico frecuentemente ta ser comprendi den termino di e variedad amplio di especie vegetal, animal y micro-organismo, pero tambe ta inclui e diferencianan den cada especie mes, por ehempel e variacionnan den cultivo y animal di cria, y e variedad di ecosistema (lago, boske, desierto, paisahenan agricola) cu ta alberga multiple tipo di interaccion entre nan especienan presente (humano, mata, animal, microorganismo).

Recursonan di diversidad biologico ta e pilarnan riba cual nos ta construi civilisacionnan. Pisca ta provee 20 porciento di tur proteina animal pa mas o menos 3 biyon hende. Mas cu 80 porciento di e dieta di ser humano ta consisti di producto deriva di planta (cultivo). Casi 80 porciento di hende bibando den areanan rural den paisnan den desaroyo ta depende di medicina tradicional deriva di planta y yerba pa nan cuido medico basico.

Pero perdida di biodiversidad ta menasa nos tur, incluso nos salud. A ser comproba cu perdida di biodiversidad por causa un expansion di zoonoses, malesanan transmiti di animal pa ser humano, mientras cu di otro banda, si nos mantene biodiversidad intacto, esaki ta ofrece herment excelente pa lucha contra pandemia manera causa pa coronavirus.

Nacionnan Uni a proclama 22 di mei como Dia Internacional di Diversidad Biologico pa aumenta e comprension di y conscientisacion pa temanan di diversidad biologico.

E tema pa 2025: harmonia cu naturalesa y desaroyo sostenibel

Mientras cu e comunidad global ta ser yama pa reexamina nos relacion cu e mundo natural, un cos ta cierto, a pesar di tur nos avancenan tecnologico nos ta completamente dependiente di ecosistemanan saludabel y vibrante pa nos awa dushi, alimento, medicina, paña pa bisti, combustibel, refugio y energia, pa menciona algun punto.

Esaki ta envolvi respeta, proteha y repara, drecha nos rikesanan natural.

Na december 2022 a adopta e Framework Mundial di Biodiversidad ( Global Biodiversity Framework) di Kunming-Montreal tambe conoci como e Plan di Biodiversidad, un acuerdo historico cu ta fiha meta y medida concreto pa para y reverti e perdida di diversidad biologico pa 2050.

E Framework aki ta fiha 23 meta pa 2030 y 5 obhetivo pa 2050 pa para y reverti e perdida di areanan natural den 25 aña. Di e obhetivonan ta menciona restaura 20% di ecosistemanan degrada y reduci invasion of introduccion di especie no-nativo invasor cu 50%.

Pa aña 2025 a scoge como tema pa Dia Internacional di Diversidad Biologico “Harmonia cu naturalesa y desaroyo sostenibel”, locual ta destaca con e Plan di Biodiversidad ta conecta cu desaroyo sostenibel y e SDGs, esta e Obhetivonan di Desaroyo Sostenibel, mustrando cu pa avansa e dos agenda aki, nan lo tin cu sostene otro.

E Dia Internacional di Diversidad Biologico ta sirbi tambe pa inculca un nocion di urgencia. Nos mester actua awor, ya cu na 2025 ta resta solamente cinco aña pa cumpli cu e SDGs y e metanan pa 2030 di e Global Biodiversity Framework

Mensahe di Antonio Guterres, Secretario General Nacionnan Uni

Biodiversidad ta e base di tur bida y un pilar di desaroyo sostenibel.

Sinembargo humanidad ta destruyendo e biodiversidad cu pasonan gigantesco a consecuencia di contaminacion, e crisis climatico, destruccion di ecosistema y den ultimo instancia interesnan economico a corto plaso cu ta trece un utilisacion insostenibel di e mundo natural.

E perdida di biodiversidad ta un problema mundial. Ningun pais, con rico e por ta, por enfrenta e problema su so. Tampoco ta posibel sigui biba sin e enorme biodiversidad cu tin riba nos planeta.

Si nos kier alcansa un desaroyo sostenibel, nos mester transforma nos manera di produci, consumi y balora naturalesa y cumpli cu e Global Biodiversity Framework di Kunming-Montreal, e plan mundial pa detene y reverti e perdida di biodiversidad. Mester di maneho, legislacion, y otro incentivo pa apoya maneranan di biba sosteniblemente, y construi economianan berde y fuerte.

Pa logra esaki, Gobiernonan mester probecha di progreso haci na e di 16 Conferencia di Partidonan den e Convenio di Diversidad Biologico na Cali, Colombia, na 2024, en particular dor di aporta financiamento nacional y Internacional y elimina fondo pa actividad cu ta perhudica naturalesa.

Ademas paisnan mester formula strategia y plan di accion nacional pa biodiversidad pa aplica e Global Biodiversity Framework, atende cu desigualdad, promove desaroyo sostenibel, respeta conocemento tradicional y empodera hende muher, mucha muher y pueblonan indigena, entre otro.

Manera e tema di Dia Internacional di Diversidad Biologico ta indica, “harmonia cu naturalesa y desaroyo sostenibel” ta e caminda cu humanidad tin cu sigui pa construi un mundo mihor pa nos tur.

Ban tuma e paso pa sigui e caminda pa un mundo mihor.

Situacion di biodiversidad na Aruba

Na Aruba actualmente tin un ley general pa conservacion di naturalesa, esta Ordenansa Nacional pa Conservacion di Naturalesa y un tratado principal cu ta e Tratado di Cartagena pa Proteccion y Desaroyo di e Medio Ambiente Marino di e Area Caribe.

Ademas nos tin awor un rapport Aruba 2050: A Nature Inclusive Vision y nos tin e Aruba National Biodiversity Strategy and Action Plan: Harmonizing People and Nature. Aruba’s Biodiversity Strategy and Action Plan 2024 – 2030.

Pero te ainda no tin un ley ambiental general, esta Ordenansa Nacional pa Medio Ambiente. E ley aki di cual no menos cu cuater concepto a ser traha desde 1999, y di cual e di cuater version ta den lachi scondi di Gobierno aparentemente no por pasa, pasobra e lo stroba desaroyo no planea y no sostenibel di nos turismo. E ley aki tambe ta regula estudio di impacto ambiental adecuado, combati contaminacion di awa, tera, lama y aire, polucion, maneho di desperdicio y en combinacion cu zonificacion corecto por preveni destruccion di habitat natural.

Construccion di Secrets Resort y e Masterplan Seroe Colorado ta prueba palpable cu conservacion di biodiversidad no ta na prome lugar ora ta implementa desaroyo sostenibel (di turismo) na Aruba. Destruccion y vandalismo diario cu vehiculo UTV y ATV den paisahenan natural y area proteha ta otro muestra visibel cu Aruba su plan di reconstrui pa mihor despues di e pandemia di COVID-19 ta basa riba mas turista (barata), mas barco Cruzero y mas turista cu no ta respeta naturalesa

Organisacion y activistanan ambiental na Aruba a mustra riba e sobredesaroyo di turismo na Aruba, destruyendo nos naturalesa y medio ambiente, no di awor pero desde 1990!! caba.

Pero na Aruba 30 aña di gobernacion a pasa desde cu e Ordenansa Nacional pa Proteccion di naturaleza a pasa na 1994 y pa un gran parti di nos politiconan turismo semper ta gana y en bes di sirbi di interes general pa proteha nos rikesa natural, ta prefera sirbi e interes priva di desaroyador.

Si nos kier cumpli cu e Global Biodiversity Framework y SDGs nos lo mester restaura e dialogo nacional prescribi den e documento di Nacionnan Uni di e SDGs y envolvi tur stakeholders defini dor di Nacionnan Uni den participacion den tomo di decision pa desaroyo sostenibel, cuminsando den e asunto di e maneho di turismo. Actualmente ATIA, AHATA y ATA so ta fiha maneho pa desaroyo sostenibel y no kier papia di para expansion di turismo.