Delegadonan di varios pais Caribense ta na Corsou pa asisti na e di dos edicion di e Conferencia Caribense di Clima y Energia cu ta tuma luga dia 26, 27 y 28 di mei, den cual ta enfatisa e necesidad urgente pa colaboracion regional y internacional pa combati cambio climatico.
Prome Minister Mike Eman, hunto cu Prome Minister di Corsou, Pik Pisas, Premier di Sint Maarten, Luc Mercelina y Minister di Clima di Hulanda, Sophie Hermans, ta forma parti di e Caribbean Climate & Energy Conference 2025 y ta duna inicio na un proceso importante di dialogo cu tur esnan cu tin un rol crucial den e rumbo pa futuro di nos Reino Hulandes.
E Caribbean Climate & Energy Conference ta habri e caminda pa trata asuntonan vital manera cambio climatico, su impacto real riba nos islanan y e esfuersonan urgente pa transforma nos dependencia di energia fosil pa energia limpi y renovable.
Durante e conferencia, Prome Minister Eman lo presenta e Plan Nacional di Reforestacion pa Aruba. Segun e Prome Minister, hopi biaha e enfoke di desaroyo berde ta riba e aspecto di energia renovable, pero reforestacion tambe ta un parti crucial den e transformacion sostenibel. Aruba a perde gran parti di su naturalesa durante añanan di desaroyo acelera, y e momento a yega pa trece cambio den e direccion aki cu ya no ta sostenibel.
Mision di Aruba den e conferencia aki ta planta e simia di e vision ambicioso di e Plan Nacional di Aruba, y atrae instancianan cu por duna un aporte valioso pa logra e gran meta ambiental aki na nos isla, pero tambe pa planta e pensamento aki cerca e otro islanan den region.
