Despues di apenas cinco luna como miembro di fraccion AVP den Parlamento di Aruba, Sra. Sonaly Fernandez Acosta a anuncia mediante un comunicado di prensa cu e ta bay “tuma un paso nobo como parti di su compromiso na comunidad di Aruba.” Esaki den funcion como “consehero strategico” di minister di Asunto Social, Sra. Mervin Wyatt-Ras, den Gabinete AVP-Futuro.
“Tabata sigur un gran honor di por a representa pueblo di Aruba como miembro di Parlamento. E experencia aki a duna mi hopi claridad riba e proceso parlamentario y e necesidadnan di nos comunidad. Tambe a pone mi refleha unda mi por contribui di un manera mas fuerte cu e pasion y experencia cu mi tin,” segun Sra. Fernandez Acosta a bisa dn e comunicado.
Segun el a sigui splica, e transicion aki ta un decision personal basa riba Sonaly su motivacion principal pa drenta e arena politico. “E mision, particularmente ta enfoca riba e sector di social, entre otro, sosten pa e gruponan di mas vulnerabel den nos sociedad. Den e encargo nobo, Sonaly lo por traha mas cerca y ehecuta cambionan cu tin impacto profundo riba nos comunidad.”
E noticia di e retiro di Fernandez Acosta for di Parlamento no a keda sin haya critica den comunidad. Hopi a mir’e como un prueba cu ta busca su interes personal en bes di interes di pueblo. Esaki pasobra a postula como parlamentario pa representa pueblo di Aruba, pero despues a retira y bay traha den ministerio, lagando su votadornan sin representacion.
Tambe ta cuestiona si esaki ta un modus operandi unda e partido berde ta bay cuminsa posiciona tur su hendenan strategicamente den cargonan publico. “Ban wak si aki rato no ta tur cu tabata riba lista di AVP ta bay ta trahando den sector publico,” un ciudadano, kende a scoge pa keda anonimo, a bisa Bon Dia Aruba.
