E conocido activista presidente di Rainbow Warriors Core Foundation lo ta biahando pa Nice, Francia pa participa den e di tres Conferencia di Nacionnan Uni di Oceano (3rd UN Ocean Conference). Den un entrevista cu Bon Dia Aruba Ponson ta elabora mas tocante e conferencia y kico ta e meta di esaki y di Rainbow Warriors Core Foundation y Aruba su participacion.

Ponson a splica cu e meta di e Conferencia di Oceano ta pa enfoca riba tres tema principal u ta vincula cu e tema di e conferencia. El a indica cu den desaroyo sostenibel tin tres tema cu ta resalta hopi cu ta toca tambe tur e otro temanan: oceano, clima y combati pobresa.

El a sigui splica cu e Cumbre tin intencion pa trece enfoke riba e tur e temanan cu ta relaciona na oceano, sea ta blue economy, cual ta e actividadnan economico cu taliga na lama y na costa, e resilencia di islanan chikito, cu tambe tin di haber hopi biaha cu ambito marino y costal, y interaccion entre oceano y cambio climatico pasobra ora ta papia di calentamento di atmosfera automaticamente ta toca e tema di disminucion di e glaciar y ijs cu tin na polo norte y sur, cu automaticamente ta yega na e subimento di nivel di lama.

El a indica cu e temanan cu ta bay ser toca na e Cumbre ta, entre otro, riba proteccion y conservacion, y uso sostenibel di recursonan marino. Tambe lo toca e tema cu aworaki ta hopi popular cual ta relacion cu e anuncio di presidente Mericano di Donald Trump bisando cu e no ta worry cu tratadonan internacional y lo continua cu e mineria den fondo di lama na unda supuestamente tin mineralnan valioso y strategico pa Merca. Esey ta un tema, segun Ponson, cu presidente Frances a pone concreto riba mesa pa ser trata tambe.

“Si e mineria ey ta ser permiti y na un escala grandi, e ta causa destruccion di hopi bida marino y ecosistema,” el a enfatisa.

Pa loke ta con el a yega na su participacion na e Conferencia di Oceano Ponson a splica cu Nacionnan Uni tin un sistema di registracion pa sociedad civil y tur organisacion no gubernamental, cu no ta organismonan di Nacionnan Uni mes of intergubernamental, caminda tur organisacion y entidad tin cu registra via e sistema aki na unda prome cu tur si kier bay un conferencia mester ser acredita den un forma special como organisacion.

Aña pasa caba Rainbow Warriors Core Foundation a asisti na e Cumbre di Isla Chikito na Antigua, y e aña aki tambe a dicidi di bay e Conferencia di Oceano mirando e importancia y alabes ta sirbi tambe como follow up di hopi di e temanan cu a ser toca aña pasa na Antigua.

Ponson a remarca cu e meta di e fundacion na e conferencia aki ta pa nan entrega por escrito un declaracion, un posicion, pa esey ser someti den un sesion plenario unda ta posibel pa organisacionnan di sociedad civil duna un sugerencia of un opinion riba cosnan cu mester ser inclui den e documento final cu ta bay inclui e resolucion di Nice pa e oceano.

Fuera di esey, el a splica, e conferencia ta un luga excelente pa topa, combersa y crea rednan di colaboracion cu otro organisacion riba e varios tema pasobra, segun el a subraya, awendia hopi tema ambiental no ta den alcance di un pais individual pa soluciona,pero mester, den Caribe particularmente, un colaboracion pa soluciona hopi problema cu tin den comun.

“Nos por siña di practica di otro hende y en bes di inventa e wiel, por siña di otro pais cu a purba di soluciona y a bin cu solucionnan cu den practica ta resulta,” el a agrega.

Ponson a splica cu su biahe pa e Conferencia di Oceano tambe ta sirbi como oportunidad pa bishita e parke Sophia Antipolis Technoworld. El a splica cu no ta di awo el a haya contacto cu nan, pero ya di 30 aña e tabatin contacto cu nan.

El a indica cu esaki ta un parke cu a ser desaroya teniendo cuenta pa e parke no destrui e paisahe natural. E parke ta hinca den paisahe den tal forma cu ta respeta naturalesa completamente. El a agrega cu no ta esey so, pero e parke ta un di e centronan di high tech na Francia y mirando kico ta pasando na Merca aworaki cu gobierno Mericano a dicidi di coy un rumbo na unda ciencia y tecnologia no ta dje importante mas, ta importante pa busca informacion y sondea e posibilidad pa colaboracion tambe.

“Nos ta kere cu e miho manera pa nos crea un puente entre Centro America, Latino America y Caribe pa colaboracion cientifico den hopi area lo ta bon pa acerca e parkenan Hulandes y esunnan Frances. Mirando cu e parke aki ta keda 25 km so for di Nice lo ta locura pa no haci uso di e oportunidad di coy un bus, den 30 min yega eynan y haci algun introduccion y cuminsa sondea e posibilidad pa colaboracion. Y mirando tambe cu den e parke ey tin actividadnan economico den areanan cu nos aki na Aruba tambe kier desaroya lo ta mas cu obvio pa probecha e oportunidad aki,” Ponson a splica.