Mientras hotel ta prepara pa tin su apertura otro siman…Hues ta propone partidonan trek in tur caso relaciona cu hotel Secrets

Diaranson ultimo den corte tabatin un audiencia relaciona cu un caso mas den e saga legal largo di hotel Secrets Baby Beach. E biaha aki, hues a trata un bezwaar entrega pa abogado Anthony Ruiz, representando Three Rivers Real Estate, e desaroyador di hotel Secrets, contra minister di Infrastructura.

Presente den corte tabata mr. Ruiz y mr. Reinkemeyer representando Three Rivers Real Estate, mr. Emerencia di banda di gobierno, y abogado Boyce, kende a clarifica cu tabata presente como un belanghebbend den capacidad priva.

Hues a habri e sesion indicando cu lo duna apenas 10 minuut pa cada partido duna un declaracion, pasobra el a indica cu ya e ta cla caba cu e tur e proceduranan den e caso aki. Hues a pidi mr. Ruiz tambe pa confirma cu e hotel Secrets ta bay tin su apertura dia 5 di juni proximo, cual Ruiz a sigura cu esey ta e caso.

Mester remarca cu e problema legal entre hotel Secrets Baby Beach y e habitantenan di Sero Colorado ta uno largo, cu tin añas caba den un bay bin di bataya legal entre e partidonan.

Principalmente, tin un grupo di habitante di Sero Colorado, representa pa Boyce, cu no ta di acuerdo cu construccion di e hotel, y a bringa esaki cada stap den corte. Principalmente, e habitantenan ta considera cu mester trek in e permiso di construccion di e hotel.
Entre otro, e habitantenan a yega di argumenta cu e bouwplan di e hotel ta contra ROPv, den sentido cu e percela ta destina pa construccion di un hotel di maximo 600 camber. For di e situatie tekening y condicionnan general di e otorgamento di e tereno erfpacht por saca afo cu e intencion ta pa pone un edificio di 900 camber. Tambe tabatin preocupacion tocante e delimitacion di e tereno, e impacto ambiental y e permiso di molester – den tur esaki tabatin falta di claridad, y obhecion di e habitantenan. Por recorda cu na dado momento, Corte a hasta para e construccion di e hotel mientras e cantidad di caso tabata siendo trata.

Pero eventualmente, hues a permiti pa e construccion continua, y awo ta asina leu cu e hotel a lanta, y hasta ta bay tin su apertura den apenas algun dia.

Y esaki ta e punto riba cual hues a enfoca durante e ultimo sesion, bisando cu tin hopi procedura contra construccion di e hotel, pero toch e hotel ta construi. El a bisa cu pa awo lo ta miho pa e partidonan stop di enfoca den pasado y cuminsa mira pa futuro, indicando cu e situacion awo ta loke e ta.

Mr. Ruiz a bisa cu e abogadonan ta cansa caba di e proceso legal largo, cu su clientenan mes, esta Three Rivers NV, lo prefera pa resolve e problemanan entre e partidonan. El a bisa cu tabatin combersacion cu e habitantenan – y a duna di compronde cu esaki ta inclui abogado Boyce – pa purba di resolve e problemanan y yega na un acuerdo entre e partidonan, pero el a bisa cu e pensamento tabata parce di ta simplemente cu e hotel “no mag di bin.”

Den opinion di hues, e bataya legal entre e partidonan a cuminsa bira mas un pelea entre abogadonan en bes di un caso legal legitimo. Door cu e audiencia aki tabata specificamente riba un bezwaar entrega pa Three Rivers, hues a opina cu tabata parce cu e caso aki tabata djis pa haci bida di e habitantenan dificil. El a bisa cu sigui cu e caso aki, mientras ya e hotel ta cla pa apertura, no ta bay ta bon pa e relacion entre e partidonan cu ta comparti e area.

Pa e motibo aki, el a sugeri pa yega na otro y busca pa e hotel tin bon relacion di bisiña cu e habitantenan. Principalmente pasobra e hotel t’ey caba, y awo no ta bay kit’e mas.

Sinembargo, e partidonan a nota cu ainda tin cantidad di procedura legal habri, casonan cu ainda mester resolve. Hues a pidi pa bin cu un lista di tur e casonan aki, pero a sugeri pa kita tur caso for di mesa.

Den esaki, abogado Boyce a expresa obhecion pasobra tin mas cu un partido involucra den e caso. Por ehemplo, tin caso di Boyce como persona priva, y tin caso den cual Boyce, como abogado, ta representando otro habitantenan. E no ta haya cu mester trata tur caso comosifuera tur ta mescos, of cu mester kita tur caso for di mesa pa resolve un disputa cu Three Rivers y gobierno di Aruba. Tambe su preferencia lo tabata pa hues duna un veredicto den e caso specifico aki.

Di su banda, mr. Ruiz a bisa cu – pendiente un combersacion cu su cliente – e ta considera cu nan ta dispuesto pa kita tur caso for di mesa, pero tanten cu berdad ta dicidi pa stop TUR caso. Abogado Boyce a keda di consulta cu e otro partidonan riba e posibilidad pa trek in tur caso.

Atrobe hues a bolbe sugeri pa e partidonan sinta na mesa y yega na otro pafo di corte. El a bisa cu e tempo cu nan a sinta den corte discuti, nan por a sinta na mesa cu otro y resolve nan diferencianan. Na final, e partidonan a bay di acuerdo cu e sugerencia di hues y a keda di sinta cu otro proximo siman.

A suspende e caso pendiente e sucesonan aki.

A pone e siguiente audiencia pa dia 25 di juni proximo. E dia ey, e partidonan lo mester duna hues un update di nan combersacionnan. Hues a indica cu den caso cu e partidonan no logra resolve entre nan mes otro siman, e ora hues ta bay haci un uitspraak dia 25 di juni.