(AP) — Activista di clima Greta Thunberg y 11 otro activista a sali diadomingo atardi riba un barco rumbo pa Gaza, cu meta pa “kibra e scoso di Israel” riba e teritorio devasta, segun organisadornan.
E barco di bela Madleen–opera pa grupo di activista Freedom Flotilla Coalition–a sali for di e waf Siciliano di Catania, den sur di Italia.
Segun e activistanan, nan ta purbando di yega banda di Gaza pa trece un tiki ayudo y pa lanta “consciencia internacional” riba e crisis humanitario cu ta sigui. Nan a duna un conferencia di prensa diadomingo prome di sali.
“Nos ta haciendo esaki pasobra, sin importa cuanto obstaculo tin, nos mester sigui purba,” Thunberg a bisa, mientras cu e ta bira emocional durante su discurso. “Pasobra e momento cu nos stop di purba, ta e momento cu nos ta perde nos humanidad. Y sin importa con peligroso e mision aki ta, e no ta nada compara cu e silencio di mundo henter den cara di un genocidio cu ta ser transmiti den bibo,” el a agrega.
Israel, cual a ser funda despues di e Holocaust, ta rechasa categoricamente e acusacionnan di genocidio y ta yama esakinan un “calumnia sangriente” antisemita.
Na mita di mei, Israel a relaha un tiki su blokeo riba Gaza despues di casi tres luna, permitiendo un cantidad limita di ayudo humanitario den e teritorio. Expertonan a bisa cu Gaza ta den riesgo di hamber masivo si mas ayudo no drenta.
Agencianan di e UN y gruponan grandi di ayudo ta bisa cu e restriccionnan di Israel, falta di ley y orden, y hopi atraco ta haci cu ta casi imposible pa provee ayudo na e casi 2 miyon habitante di Gaza.
Entre e tripulacion di Madleen ta Liam Cunningham, actor di Game of Thrones, y Rima Hassan, un miembro Frances di Parlamento Europeo cu origen Palestino. E no por a drenta Israel pa motibo cu e ta opone activamente e ofensiva di Israel riba Gaza.
Activistanan ta anticipa cu lo tuma siete dia pa yega na nan destinacion, si nan no ta wordo para.
Thunberg, un activista di clima cu a bira famoso despues di organisa protestanan den su pais natal Suecia ora e tabata mucha, tabata planea pa subi riba un otro barco di Freedom Flotilla luna pasa.
Esey a fracasa na comienso di mei, ora otro barco di e grupo, Conscience, a ser ataca pa dos drone sospechoso mientras e tabata den awa internacional cerca di e costa di Malta.
E grupo ta culpa Israel pa e atake, cual a destrui e parti dilanti di e barco, den e confrontacion mas reciente riba esfuerso pa manda ayudo na e teritorio Palestino.
Gobierno di Israel ta bisa cu e blokeo ta un intento pa pone presion riba Hamas pa libera e rehennan cu nan a tuma durante e atake di 7 october 2023, cual a causa e conflicto. Militantenan di Hamas a ataca e parti sur di Israel e dia ey, matando mas o menos 1.200 hende, mayoria di nan ciudadano, y a secuestra 251 otro. Hamas ainda tin 58 rehen, di cual 23 ta sospecha di ta bibo ainda.
Como respuesta, Israel a lansa un ofensiva cu segun e Ministerio di Salud di Gaza, y a mata mas cu 52.000 Palestino, mayoria di nan muher y mucha. E bombardeo y operacionnan terestre di Israel a destrui gran parti di e teritorio y a laga mayoria di su poblacion sin cas.
E grupo di Flotilla ta e mas reciente den un cantidad creciente di criticonan cu ta acusa Israel di acto genocida den su guera na Gaza. Israel ta nenga e acusacionnan categoricamente, y ta bisa cu su guera ta contra militantenan di Hamas, no contra e ciudadanonan di Gaza.
“Nos ta kibrando e acoso di Gaza via awa, pero esaki ta solamente un parti di un strategia mas amplio di mobilisacion cu tambe lo purba kibra e blokeo via tera,” segun activista Thiago Avila.
Avila a menciona e proximo Global March to Gaza—un iniciativa internacional habri tambe pa doctornan, abogadonan y prensa—cu tin plan pa sali for di Egipto y yega na e frontera di Rafah mita juni pa tene un manifestacion ey, pidiendo Israel pa para su ofensiva riba Gaza y habri e frontera atrobe.
