Durante conferencia di prensa di fraccion AVP parlamentario John Hart a trece dilanti su preocupacion relaciona cu e traspaso pa loke ta trata transicion di energia, specificamente e proyecto di Eagle LNG. E parlamentario a manda un carta pidiendo minister encarga cu energia, minister Arthur Dowers pa bin parlamento y duna informacion tocante kico ta e situacion actual cu e proyecto aki.

Parlamentario Hart a expresa su preocupacion pa e falta di informacion cu tin den Parlamento di Aruba pa diferente topico, cual segun el a indica ta bin pa motibo di e falta di respet cu parlamento a experiencia durante algun temporada.

“Parlamento ta e organo mas halto na pais Aruba y mi ta kere cu si nos analisa temponan den bida tin diferente tempo, tin diferente epoca, of temporadanan… y nos tabatin un tempo caminda cu lamentablemente Parlamento di Aruba no a haya e respet cu e merece.

El a splica cu gobierno a cera un acuerdo pa 20 aña den e caso di Eagle LNG na 2020 y te dia di awe, cinco aña despues, Parlamento di Aruba no tin claridad riba con e proceso aki ta canando.

“E trabou di parlamentario ta pa controla e gobierno y nos no por haci nos trabou corecto, debido si nos no por haya informacion,” el a enfatisa.

El a indica cu e ta bay entrega un carta na presidente di parlamento, cual ta pasa esaki pa minister Dowers, cu diferente pregunta, pero e pregunta principal cu e parlamentario tin ta pa si nan por convoca un reunion pa tin claridad riba full e proceso di Eagle LNG.

“Mi trabou ta pa yama e minister aden y laga nos tin un reunion di contenido pa wak kico ta pasando, kico ta e documentonan cu tin, si tin estudionan haci,” el a remarca.

Parlamentario Hart a splica cu e preguntanan cu e tin ta mas tanto relaciona cu unda ta para cu e proyecto. El a sigui splica cu den e contract cu a ser firma tabatin diferente paso, diferente fase cu mester a tuma luga, entre otro mester a pidi permiso. E pregunta principal di e parlamentario ta pa sa con ta para cu e procesonan aki, y tambe con ta para cu e estudionan cu a keda di ser realisa pa loke ta e pipanan di gas, si esakinan tin efecto pa e bario y casnan.

“Nos kier sa informacion pasobra nos no por controla un gobierno si nos no tin informacion,” el a enfatisa. El a agrega cu den e sistema di parlamento no tin ningun documento pa loke ta trata estudionan cu a ser realisa relaciona cu e proyecto di Eagle LNG. El a menciona cu si preguntanan cu a ser haci den pasado y e tempo ey e contesta di e ex minister tabata cu pronto lo ricibi esaki, pero varios aña despues ainda no a ricibi esaki.