Manera ta conoci ayera hues a dicta su veredicto den e caso cu candidato pa minister Mike de Meza a entama contra Departamento di Impuesto (DIMP) relaciona cu e proceso di screening pa su nombramento como minister. De Meza a pidi hues pa entrega un orden hudicial na director di DIMP pa saca un declaracion faborabel tocante su comportamento fiscal. Esaki hues a dicta no ta posibel y cu corte no por interveni den e caso aki.

Dia 28 di april 2025, director di DIMP, Luenne Gomez-Pieters a duna De Meza un declaracion tocante su comportamento fiscal y contra e carta aki De Meza a presenta un apelacion na Hof dia 9 mei 2025 y tambe a pidi pa tuma medidanan provisional.

Despues di eleccion cu a tuma luga dia 6 di december 2024, partidonan AVP y FUTURO a forma gobierno nobo. E gobierno cu a ser anuncia ta consisti di siete minister, pero seis di e siete ministernan aki ya a ser nombra. De Meza, ken ta candidato pa minister di Energia, Infrastructura y Medio Ambiente, no por a ser nombra pa motibo di un declaracion no faborabel duna pa e director di DIMP tocante e cumplimento di su obligacionnan fiscal.

De Meza a haci reconocemento contra e declaracion no faborabel ey, y despues a presenta un apelacion contra un declaracion similar. Cu e procedemento aki, De Meza kier a logra haya un declaracion faborabel tocante su comportamento fiscal, pa e por presenta esaki na e formador, awor prome minister, pa despues e prome minister propone su nombramento na SE Gobernador di Aruba, pa e por ser nombra y huramenta como minister.

Hof a yega na e conclusion cu e no tin e competencia pa haci un decision tocante e apelacion cu a ser presenta. Esaki ta pasobra dilanti di Hof segun e Lar, apelacion por solamente ser presenta contra decisionnan den e sentido di e Landsverordening administratieve rechtspraak (Lar).

Segun Hof e cartanan di e director di DIMP contra cual De Meza a presenta e recurso y apelacion, no ta decisionnan cu por ser apela. Eseynan ta cartanan di caracter factual y informativo, y no ta dirigi na ningun efecto legal, ni tampoco ta dirigi na e efecto legal si De Meza por of no por bira minister.

Den e caso aki, De Meza no ta haya loke el a pidi Hof, cual ta pa entrega na e director di DIMP un orden hudicial pa e duna un declaracion faborabel tocante su comportamento fiscal.

Pa loke ta e opcionnan cu De Meza tin aworaki, Hof ta splica cu e por sigui cu e procedemento dilanti di e corte di impuesto door di entrega un apelacion di mas halto contra e decision aki, dilanti di e corte fiscal contra e aanslagnan cu a ser imponi riba dje, y dilanti di e corte civil den un kortgeding.

Pero esaki, Hof ta remarca, ta tuma hopi tempo y e incertidumbre cu ta sigui existi tocante e nombramento di De Meza no ta den su interes, ni den e interes di Pais Aruba. Ademas, Hof ta indica, e decision final di posibel procedementonan hudicial tocante e comportamento fiscal di De Meza ta incierto. Den esaki, e hecho ta conta cu den un estado di derecho democratico, Hof mester haci uso di e reservacion mas grandi posibel ora e ta bay interveni den e proceso di nombramento di ministernan.

Hof a enfatisa cu no ta di spera cu e director di DIMP lo duna mas of otro tipo di informacion tocante e comportamento fiscal di De Meza cu loke ya ta conoci. E director di DIMP tin observacion tocante e comportamento fiscal di De Meza den pasado, specificamente riba incumplimento di e obligacion pa haci declaracion fiscal na varios ocasion. Ademas, e director di DIMP ta di opinion cu De Meza tin un obligacion moral y etico pa paga un debe fiscal cu ainda ta habri, aunke esey no por ser cobra mas pa motibo di prescripcion. Esaki, Hof a subraya, no ta na fabor di De Meza.

Sinembargo, e director di DIMP tambe a declara repetidamente y cu enfasis cu tocante De Meza, su casa y un grupo di cinco empresa, despues di e medidanan cu el a tuma den februari/maart/april 2025, e situacion actual ta cu nan a cumpli cu e obligacion pa declara y paga, y no tin ningun debe fiscal cu por ser cobra. Esaki, segun Hof, si ta na fabor di De Meza.

Awor prome minister tin actualmente na su disposicion e resultadonan di e investigacion fiscal segun articulo 5 di e Landsverordening Integriteit Ministers (LvIM), como tambe e carta di 28 april 2025, cu a ser manda na e formador den copia. Cu e informacion fiscal cu ta disponibel, ta di spera cu prome minister por tuma un decision definitivo tocante e situacion di De Meza. Awor ta prome minister Mike Eman su turno pa tuma accion y dicidi si e ta nombra De Meza minister of no.

Durante un conferencia di prensa ayera merdia prome minister Mike Eman a reacciona riba e veredicto di hues. El a splica cu el a repasa e veredicto y a remarca cu ta hopi obvio cu e siguiente paso cu e tin cu tuma ta locual a ser haci cu tur e otro coleganan minister, entrega e documentonan completo di De Meza na su SE Gobernador di Aruba y invita De Meza pa un combersacion manera cu tambe a haci cu e otronan, y repasa tur su dossier.

Esaki lo tuma luga otro siman ya cu De Meza no ta na Aruba awor y lo regresa diadomingo.

Prome minister Eman a enfatisa cu aworaki a yega na un punto importante caminda cu e proceso ta den su man como prome minister/formador. Alabes el a subraya cu esaki ta e momento pa termina e proceso aki, locual kiermen cu e tin cu papia cu De Meza.

“Su dossier ta completo, tin un veredicto di corte, un veredicto cu por ta no ta duna tur e claridad cu tur hende lo a desea, pero hues a pone den man di prome minister pa e mes evalua awor segun e tin e dossier su dilanti,” el a indica.

E mandatario a agrega cu un parti importante den e dossier ta cu hues ta acentua cu De Meza a cumpli cu tur su debernan di belasting y ta duna un observacion adicional na unda e ta bisa cu esaki ta traha na fabor di De Meza.

“Maske cu e hues no a bisa directamente esaki ta locual DIMP lo mester a coregi of no mester a coregi, en todo caso tin un declaracion hopi fuerte di parti di hues caminda cu ta bisa cu De Meza a cumpli cu tur locual e tabatin na impuestonan, tambe su famia y hues a bisa tambe cu e ta traha na fabor di De Meza. Pa mi, tumando tur esaki na consideracion ta importante pa tuma e siguiente paso di invita De Meza mes pa sinta y pa mira con nos ta tuma e siguiente paso. Manera el a cana den tur e otro casonan, ta sinta prome cu e candidato pa minister ora e dossier ta completo, De Meza su dossier ta completo awor, no tin nada mas pa warda riba dje,” el a enfatisa.