Manera reporta anteriormente, parlamentario y candidato pa minister den Gabinete AVP-Futuro, Sr. Mike de Meza a entama un caso contra Ministerio Publico, despues cu a bira conoci cu Departamento di Impuesto a entrega un keho contra De Meza, pero ainda OM no a informa De Meza kico a acusacion ta.

Abogado di De Meza, mr. Desiree Croes, a confirma den prensa local cu e caso ta bay ser trata dia 19 di juni, pa 8or y mey di mainta. Tin indicacion den prensa local sinembargo cu e caso lo ser trata tras porta cera.

E caso aki di De Meza contra Ministerio Publico ta relaciona cu un keho formal cu Departamento di Impuesto a haci contra e parlamentario. Pa motibo di e keho, OM mester a habri un investigacion penal contra De Meza. OM a informa De Meza y su abogadonan tocante e keho aki, pa loke nan a pidi mas informacion tocante kico e acusacion ta.

Diadomingo ultimo, despues di yega for di Hulanda, De Meza y su ekipo legal a duna un declaracion na medionan di comunicacion local den cual ta indica cu nan a ser informa tocante e keho cu a ser entrega, pero no ta na altura di kico en realidad ta e acusacionnan cu tin contra e parlamentario.

Abogado Croes a bisa den prensa local cu nan a pidi OM informacion riba e acusacionnan, poniendo un deadline pa ricibi contesta di OM. OM no a contesta nan solicitud dentro di e periodo cu De Meza y su abogadonan tabata kier, y pa e motibo aki, nan ta hibando OM corte.

E decision aki ta pa purba forsa OM, cu intervencion di un hues, duna De Meza y su ekipo informacion tocante e acusacionnan y kico ta e sospechonan cu tin contra e parlamentario. Ley di ‘Strafvordering’ ta papia solamente di un periodo “rasonable” (redelijk) di tempo, dus den e caso aki, abogado di De Meza lo mester argumenta cu e ta di opinion cu e tempo rasonable a pasa caba.

Apenas luna pasa, De Meza ya tabata den corte, den un caso cu el a entama contra DIMP, relaciona cu e entrega di un declaracion di comportacion fiscal cu e parlamentario tabatin mester pa su proceso di screening pa bira minister.

Den su veredicto den e caso contra DIMP, hues a dicta cu e no por interveni y no por duna De Meza locual el a pidi y a bisa cu e decision ta den man di prome minister/ formador Mike Eman. Den su declaracion despues di e veredicto, prome minister Eman a indica cu e tabata cla pa tuma e siguiente paso, cual tabata pa sinta cu De Meza y SE Gobernador di Aruba.

E momento ey, De Meza no tabata na Aruba y pues mester a warda e yega Aruba back pa continua cu e proceso, pero awor tur cos ta para atrobe. Awo pa motibo di e proceso penal contra De Meza, cu tambe ta un impedimento pa e bira minister den Gabinete AVP-Futuro.

No ta conoci ainda kico ta e acusacionnan cu tin contra De Meza. Dialuna ultimo Bon Dia Aruba a tuma contacto cu vocero di Ministerio Publico y tambe pers chef di Gabinete AVP-FUTURO pa puntra tocante e keho aki y e acusacionnan, pero ambos a contesta cu no lo duna comentario.

Tambe a purba tuma contacto cu parlamentario De Meza y a puntra e parlamentario si nan tin informacion tocante kico ta trata e keho cu DIMP a entrega na OM, si nan a informa su persona kico ta e acusacionnan cu nan tin contra di dje, con esaki ta afecta su candidatura como minister y si su relacion cu AVP ta afecta, pero no a haya contesta.