Durante un celebracion solem diahuebs atardi durante bahada di solo, a conmemora e di 96 cumpleaños di Anne Frank na Parke Wilhelmina. Minister di Salud Publico drs. Mervin Wyatt-Ras, a asisti na e ceremonia y a rindi homenahe na e balentia incomparabel di Anne Frank.
Cu respet profundo y den espirito di reflexion, comunidad Hudiu a bini hunto pa honra e bida y legado di Anne Frank, un mucha muhe cu su diario a bira un bos eterno contra odio y un simbolo poderoso di resistencia y speransa.
E estatua di Anne Frank, revela na 2011, ta un parti importante di e vision cultural di Gobierno di Aruba cu ta transcende nos fronteranan y ta uni Aruba y Reino Hulandes cu e comunidad internacional. Hunto cu e Monumento di 18 di Maart, e estatua di Reina Wilhelmina y e estatua di Anne Frank, ta forma un triangulo simbolico cu ta refleha nos identidad nacional, nos lasonan historico, y nos balornan comparti, un triangulo di union y responsabilidad moral.
Na e revelacion di e estatua na 2011, Aruba tabatin e honor di ricibi figuranan importante di e mundo cultural y global:
Martin Luther King III, yiu di e lider pa derechonan civil di Estados Unidos;
Rabbi Soetendorp, Rabbi Principal di Hulanda;
Sr. Westra, Director di e Cas di Anne Frank;
Y escultor Joep Koppens, cu a duna bida na e memoria di Anne via su arte.
Durante e ceremonia, a recorda cu Anne Frank a nace dia 12 di juni 1929 na Alemania, un mucha muhe Hudiu cu su balentia y sabiduria, capta den su diario, ta sigui inspira generacionnan rond mundo. Anne Frank a fayece na februari 1945 cu apenas 15 aña di edad, pero su diario a sobrevivi y a bira un simbolo di balentia y speransa.
Na nomber di e Prome Minister y Gobierno di Aruba, Minister Wyatt-Ras a gradici tur hende presente pa honra e memoria di Anne Frank. Cu nos sigui preserva e legado di Anne Frank pa respet, husticia y paz na mundo.
Na final di e ceremonia, a tuma luga un ceremonia den cual e cende bela y pone esakinan na e pedestal di e estatua di Anne Frank.
