Aruba por bira e pais innovativo riba democracia y asina realmente decolonisa di un sistema democratico hereda di Hulanda. Asina Profesor dr. Wouter Veenendaal di Universidad di Leiden a bisa durante e tayer ‘Eleccion 2024 na Aruba y kico a bin despues.’
E tayer a tuma luga recientemente na Universidad di Aruba.
Meta di e tayer investigativo tabata pa crea un brug entre e aspecto cientifico y e practica politico di nos sistema democratico. E pregunta principal tabata si por reenforsa democracia di Aruba pa medio di reformanan institucional.
Wouter Veenendaal kende ta Profesor den ‘Representacion Democratico den Reino Hulandes,’ a sugeri pa cambia e sistema democratico na Aruba completamente. “E filosofia di democracia a origina den ciudadnan Griego den temponan antiguo. Tabata gruponan chikito (hende homber di cierto status social) tabata dicidi directamente. Democracia representativo cu un intermediario eligi (Parlamento) a nace na siglo 18, pa amplia participacion cu gruponan mas amplio. E sistema aki a nace na Francia y Merca, cu a nifica partidonan politico y eleccion pa un democracia na un escala mas grandi. Despues di e Di Dos Guera Mundial, hopi colonianan a haya nan independencia, nan autonomia, y practicamente a sigui cu e sistema di e colonisador. Aruba manera otro islanan di Reino Hulandes a tuma e modelo municipal di Hulanda.”
E pregunta ta sinembargo, ta si e sistema Hulandes aki, di democracia representativo ta traha pa un pais chikito, of mester considera sistema mas directo, segun Veenendaal. Pa contesta e pregunta, mester analisa e debilidadnan di estadonan di isla chikito rond mundo. Paisnan chikito, den e sentido aki tambe municipionan chikito ta confronta e realidad di personalisacion di politica, unda ta enfoca riba personalidad, relacion personal, en bes di ideologia di partido durante eleccion. “Si mira bon, e diferencia di ideologia entre e partidonan den estado di isla chikito ta masha tiki.”
Un otro aspecto ta cu a pesar cu hendenan conoce otro bon den sociedadnan chikito, y partidonan di poco diferencia den ideologia, e confrontacionnan ta mas intenso. Tin hopi polarisacion entre partidonan politico y nan sostenedornan. Aruba no ta un excepcion.
E di tres aspecto ta e relacion directo entre e politico cu votado, cu ta duna sosten a cambio di beneficionan material.
E sistema democratico actual tambe ta concentra casi tur poder den e elite politico, cu ta hendenan cu conoce otro bon, ta keda largo den politica. “Mi pregunta ta si ta habri pa cambia e sistema y permiti ciudadanonan participa mas directo den e proceso politico, en bes di tin un intermediario di elite politico cu ta actua na nan nomber.”
Esaki lo transforma nos sistema democratico di uno representativo pa uno mas directo, unda ta vota pa e decision politico en bes di e persona cu e votado ta conoce. E otro efecto ta cu ta reduci e papel di e partido politico, cu a base di investigacion, ta relativamente negativo den sociedadnan di isla chikito. Unabes cu e votado por dicidi directamente maneho, ya no mester di e intermediario, cu ta e partido politico. “Y ora cu kita e partido politico, ta elimina tambe e polarisacion cu ta existi entre e partido y e elite politico. Ademas, ya no mester haci promesanan a cambio di voto, pues ta elimina e fenomeno di clientelismo door di kita e conexion entre e votado y e politico. Finalmente e lo elimina concentracion di poder memey di e elite politico, mientras cu ta elimina abuso di poder.”
Veenendaal a duna ehempel unda ta haci uso di democracia directo, den sociedadnan chikito unda no a introduci un sistema representativo. “Nan no ta elimina democracia representativo completamente sino e ta uno adicional, unda ciudadanonan ta haya participacion den e proceso di decision.”
Un ehempel di democracia directo ta referendum. Municipalidadnan chikito na Europa ta usa e sistema aki. Otro ta asina yama ‘townhall meetings,’ esta reunionnan regular unda adultonan tur por participa y hasta vota riba decisionnan. Na San Marino, un di e paisnan chikito di Europa, ciudadanonan por organisa y atende reunion di Parlamento, unda por presenta proyecto of cambionan di ley na politiconan. E ultimo ehempel ta di e comunidad di 50 mil persona di habla Aleman na Belgica, cu ta selecta cualkier ciudadano pa participa na e debate publico. “Tur esaki ta adicional na e sistema democratico representativo.”
Pero pa trece cambio, partidonan politico, y sigur e elite politico mester ta dispuesto pa tuma e pasonan. Y berdad sistemanan adicional pa amplia participacion directo lo limita nan poder. E ta rekeri tambe cambio di ley, kizas hasta cambio den Statuut y Constitucion di Aruba. Pero mas cu tur cos e ta rekeri ciudadanonan educa riba temanan y cu tin e confianza pa por hiba palabra den publico, sin miedo, algo cu ainda ta prevalente riba nos islanan (Cultura di Miedo). “Hasta si logra haci e transicion pa e sistemanan aki di democracia directo, partidonan politico lo sigui purba ehecuta influencia (manera na Suisa) dor di pidi nan sostenedornan pa atende e reunionnan publico. Pues e alternativanan tambe tin nan reto, pero e lo ta bon ta pa discuti e vulnerabilidad di e sistema democratico Hulandes y tambe potencial di innovacion democratico. Esaki lo nifica finalmente decolonisa di un sistema politico hereda,” Profesor Veenendaal a conclui.
