Recientemente miembro di fraccion AVP parlamentario Carlos Bermudez a manda un carta cu ta consisti di un lista di pregunta pa Minister di Husticia, Integracion y Transporte Publico (Infrastructura, Energia y Telecomunicacion), Arthur Dowers tocante limpiesa y mantencion di e camindanan pa peaton.
Parlamentario Bermudez a indica den su carta cu Aruba ta un isla cu su economia ta depende grandemente di turismo, cual ta e motor principal di e progreso di pais, locual ta nifica cu tin un responsabilidad grandi den tur ciudadano pa mustra Aruba su miho cara, “un cara limpi, seguro y digno,” el a remarca.
Bermudez a señala cu lamentablemente e realidad ta preocupante. El a splica cu den e ultimo añanan Aruba ta enfrenta un problema di sushedad. Un problema cu, segun e parlamentario, no a ser atendi debidamente.
El a trece dilanti cu tin camindanan cu falta mantenimento y hopi zona rond di e isla, incluyendo acera y camindanan di santo destina pa peaton cu ta den un estado visibel di abandono y deterioro. El a remarca cu e falta di limpiesa y mantenimento no solamente ta compromete e seguridad di e habitantenan, pero tambe ta dañando e imagen turistico di e pais.
Parlamentario Bermudez a enfatisa cu no por ignora e impacto negativo cu esey tin riba Aruba su posicion den un mercado global altamente competitivo. “Un bishita no ta solamente basa ariba beachnan bunita, bishitantenan ta busca destinonan sigur, organisa y limpi. Un ambiente urbano bon regla ta un señal di respet, di planificacion y di progreso. Aruba mester mustra cu nos ta un pais cu orguyo, cu ta cuida su infrastructura y su imagen internacional,” el a remarca.
El a splica cu den cuadro di transparencia y pa haya claridad pa cu e plan di limpiesa y mantenimento, el a manda un lista di pregunta, 14 pregunta total, pa minister Dowers.
Parlamentario Bermudez a puntra e mandatario si e por a informa parlamento cuanto ploeg, cu contract pa cu limpiesa ta resorta bou supervision di DOW, y cuanto ploeg mas tin cu ta resorta bou di supervision di por ehempel Serlimar/Parke Arikok.
Bermudez a indica tambe cu tumando e punto di salida cu partimento di responsabilidad na e ploegnan lo ta planifica, el a pidi minister Dowers si e por manda parlamento e plan den cual por tuma nota di cual ploeg of ploegnan ta responsabel pa cual zona, area, of ruta, y a el a puntra tambe si minister por informa parlamento un bista di e cantidad di trahadonan pa cada ploeg.
E parlamentario a puntra si minister Dowers por informa parlamento si acaso tin reunion y/of consulta entre esnan responsable pa e ploegnan, y den caso cu e respuesta pa e pregunta aki ta negativo, el a pidi e mandatario si e por splica dicon no, y con lo evita cu lo por tin zona cu lo por keda sin un ploeg responsable.
Parlamentario Bermudez a puntra e mandatario si e por informa parlamento con e control di e ploegnan ta tuma lugar, cu cual frecuencia, presencia y si tareanan ta ser ehecuta debidamente. Alabes el a puntra e minister si e por informa parlamento kico ta e tareanan specifico di e ploegnan.
Bermudez a puntra minister Dowers cual ta e motibo cu DOW no a tuma un rol mas visibel y pro-activo den mantene e espacionan publico limpi y sigur, particularmente e stupinan den mal estado cual ta forma un peliger pa e peatonnan, specialmente pa e adultonan mayor.
El a puntra ki medida (inmediato) DOW lo tuma pa drecha e aceranan di cement, asfalt, y/of klinkers y crea espacio banda di caminda pa peatonnan local y bishitantenan por cana cu seguridad y sin obstaculo.
E parlamentario a pidi minister Dowers si e por informa parlamento, teniendo na cuenta cu Aruba su economia ta depende grandemente di turismo, ki medida (inmediato) DOW lo tuma pa haci e ruta di aeropuerto pa rotonde Las Americas limpi, tene e islanan memey di caminda limpi di yerba y tambe snoei e matanan banda di caminda teniendo na cuenta cu hopi turista ta trafica ariba e ruta menciona; y ki medida (inmediato) DOW lo tuma pa haci e ruta di e rotonde di warda di Polis Noord pa e rotonde Wendy’s Palm Beach, limpi y liber di mata caminda pa asina peatonnan por cana libremente y cu tur seguridad.
Bermudez a puntra e mandatario tambe ki medida (inmediato) DOW lo tuma pa haci e rooi dilanti postkantoor bieu na Noord y banda di Palm Beach 1-A limpi y alabes controla, y si ta necesario drecha e tubonan poni pa e fluho di awa por bay y no bin back. El a splica cu esaki ta trata di un peticion haci durante tratamento di presupuesto di DOW.
E parlamentario a indica cu durante e periodo di gobernacion anterior, varios ploeg di limpiesa a ser elimina sin plan alternativo ni evaluacion di e consecuencia. Esaki, el a enfatisa, ta un decision cu segun e evidencia y situacion actual, no a sirbi e interes di e pueblo. El a remarca cu mester evalua seriamente e decision di pasado y pone prioridad riba restauracion di e servicio y ploegnan cu a y ta yuda mantene Aruba isla limpi y digno.
El a pidi minister Dowers si e por informa parlamento si tin un plan pa amplia e cantidad di ploegnan, y den caso cu e contesta na e pregunta ta positivo, el a pidi e minister si por informa parlamento den ki termino ta desea di haya mas ploeg y cual ta e zona y/of area cu lo nan lo bay cubri y dicon e area y/of zona specifico ey.
Por ultimo parlamentario Bermudez a indica cu e ta comprende cu e trabou di mantene e isla limpi no ta facil, pero el a subraya cu si tur instancia gubernamental ta traha man den man, por yega na un Aruba mas digno, limpi y sigur. Den e contexto ey el a puntra minister Dowers si tin algo cu Parlamento di Aruba por yuda pa asina DOW y/of Serlimar tambe por sigui contribui na mantene e espacionan publico limpi y sigur pa tur ciudadano y bishitantenan cu ta yega Aruba.
