Den nos ultimo Editorial nos a duna nos opinion tocante e reactivacion di centro comercial di Oranjestad, mas specifico Caya Grandi y su alrededor directo. Loke ta parce nos mas urgente ainda ta e tarea di rehabilita San Nicolas. Den e caso aki no ta trata solamente di e reactivacion di su centro comercial antiguo, sino tambe di e desafio di atende un serie di problema cu San Nicolas ta enfrentando, despues di varios decada di deterioro. Esaki ta exigi un plan general di rehabilitacion hopi mas amplio.

Un recorido den varios bario di e ciudad ta mustra claramente con leu e deterioro di vivienda a avanza, cu centenares, posiblemente algun mil vivienda totalmente no apto pa sirbi como tal, pero cu nunca a yega na e fase cu autoridadnan a interveni cu demolicion di e ruinanan, pa garantiza seguridad publico, ademas di e vista mahos cu esaki ta presenta, pero cu aparentemente no ta molestia nos autoridadnan. Tur esaki ta yuda crea un ambiente desolador, cu e ciudadano no merece. Ademas, e situacion di urgencia pa via di escasez di vivienda ta exigi accion pronto pa atende e problema aki, y a proposito, no solamente na San Nicolas. Cu e escasez creciente di tereno pa construccion di vivienda e tarea di uso optimal di e terenonan bashi o cu por bira disponible despues di demolicion ta importante den dos sentido: e ta yuda mehora e aspecto fisico di e ciudad y ta sirbi pa disminui e necesidad di usa tereno gubernamental alrededor di e ciudad, cu e bentaha tambe di reduci e gastonan halto di crea infrastructura (caretera, tuberia, cable), cu pa gran parti ta pa cuenta gubernamental. Aruba su infrastructura ta demasiado amplio caba pasobra den pasado reciente a scoge pa urbaniza un gran parti di e area disponible, cu excepcion di Parque Nacional Arikok. Nos por mira actualmente caba e gasto halto pa mantene e infrastructura cu tin.

Sin duda algun nos lo tende awor cu gobierno no tin e hermentnan legal pa actua den recuperacion di tereno urbano, sigur si ta trata di propiedad priva. Na september 2021 nos a publica un analisis tocante kico autoridad gubernamental por haci den caso di edificio y vivienda den mal estado, cu no ta keda otro opcion cu demolicion completo. Si acaso ta pensa cu loke tin den e ordenanza concerni (Bouw- en Woningverordening; AB 1999 no. GT 9) no ta suficiente pa actua den caso complica pa via di problema di herencia, entre otro hopi heredero fayeci o bibando den exterior, lo mester pensa riba ampliacion di e facultadnan cu e ley ta brinda. Nos sa cu esaki nunca lo ta un tema popular, pero sin accion sigur nada lo sucede.

Awor atencion pa e centro di ciudad. Nos por observa cu futuro di centro di e ciudad ta mustra diferente awor pasobra un di e ohochinan siames (e refineria) a fayece pero por rescata e otro (e ciudad). Despues di mas di cien aña por debolbe na e poblacion loke nan tabatin anteriormente: acceso na lama. Esaki lo ta faborable den sentido di atraccion turistico, pero lo ta algo cu e ciudadano local tambe por disfruta, y no solamente e habitante di San Nicolas. No ta trata aki solamente di kita tuberia di e parti di e tereno na altura di Mainstreet, sino tambe considera muda e tankinan di combustible, cu lo keda necesario pa e material (gasolin, diesel, jet fuel, kerosin) cu ta yega nos isla. Nan lo por haya un mihor lugar na e parti pabao, unda di tur manera tin un cantidad di tanki (di crudo) cu posiblemente lo keda pa varios aña mas. Esaki ta exigi inversion considerable, pero tin como bentaha cu henter e area pariba di e centro di ciudad ta bira disponible pa otro destino.

En todo caso, un ‘waterfront’ lo ta un aporte grandi na reactivacion comercial y recreativo, sin perde di vista loke mester sucede den rehabilitacion di e centro antiguo, cu pa un parti ta lidia cu e mesun problemanan cu Oranjestad conoce, specificamente e envolvimento di propietario di tereno, edificio y tienda. Si gobierno no por presenta un plan realistico pa sostene desaroyo positivo den renobacion y uso di e propiedadnan existente, cualkier plan di rehabilitacion lo keda na mero papel.

Seguidamente nos ta yega na un punto sumamente importante pa cualkier desaroyo di un comercio viable y sano. Esey no por depende solamente di turista, pero mester tin su base den un publico local cu bastante poder di compra. Logra esey atrobe ta requeri planificacion amplio y eficaz. Den pasado un parti importante di e poder di compra tabata bin di e comunidad di ‘expats’ Mericano y un clase media local profesional considerable. Esey no t’ey mas pero por haci algo si. Por ehemplo, en vista di e escasez di vivienda en general na nos isla, por considera ‘repobla’ e area di Colony, unda tin espacio pa centenares di vivienda. Esaki lo pone un fin tambe na e ambiente di desolacion cu ta reinando den e area pa hopi decada. Pakico sacrifica mas mondi costoso na otro parti di nos isla, si por probecha e posibilidadnan pa crea un base di poder di compra cu por duna bida na comercio na San Nicolas? Claro cu nos ta comprende cu nos politiconan ta prefera di keda pega den solucion meramente di propaganda, pero rehabilita San Nicolas lo ta un promer proyecto di planificacion a largo plazo y multifacetico, manera nunca nos a conoce; algo otro cu pone evento cu musica, cuminda y bebida…