Dialuna merdia, Minister di Finanzas, Asunto Economico y Sector Primario, mr. Geoffrey Wever (Futuro) a presenta den Parlamento di Aruba pa duna un actualisacion completo na Parlamento tocante e efectonan di e “trade war” mundial, incluso e tarifanan imponi pa Merca recientemente, e desaroyonan geopolitico actual y e posibel impacto cu e desaroyonan aki por tin regionalmente y riba e economia di Aruba.

Segun e minister a informa den un comunicado di prensa despues di e encuentro, e panorama economico mundial a cambia despues cu e anuncio di Presidente Trump di dia 2 di april, cu a introduci tarifanan halto cu tin su repercusionnan global. A pesar cu Aruba no ta un blanco directo di e medidanan aki, e consecuencianan indirecto por ta importante y preocupante si no atende cu nan debidamente.

Minister Wever a remarca cu gobierno a tuma tur e pasonan necesario pa prepara pa e desaroyonan cu ta tumando lugar den mundo a consecuencia di e “trade war”. Analisis haci di e cifranan di turismo, crecemento economico, inflacion pa Aruba, reserva di divisa, crecemento di cuponan di trabao, finanzas publico di Aruba y buffers financiero door di expertonan y instancianan local manera Banco Central di Aruba (CBA), Oficina di Turismo (ATA), Departamento di Asuntonan Economico (DEZHI) y Directie Financien, ta indica cu na e momento aki no tin niun motibo pa panico, y cu Aruba ta prepara pa si a acaso tin consecuencia negativo pa Aruba. A prepara algun scenario unda cu a calcula cu si e entrada di turismo ta baha cu cierto porcentahe kico e impacto lo ta y kico Aruba por haci. Di e analisis haci dor di e expertonan y e realidad economico, financiero y turistico na e momento aki, e conclusion ta cu na e momento aki no ta premira un impacto negativo cu Aruba no por maneha.

“Na e momento aki no tin ningun motibo pa panico, Aruba ta un pais solido, su economia ta solido, e producto turistico ta solido, e maneho financiero economico di e pais ta solido tambe, dus nos ta den un bon posicion, pero mester keda monitor e indicadornan, pa si bin un cambio negativo nos por adresa esaki na tempo, locual nos por, pasobra nos sa unda nos ta para y kico nos mester haci den caso di un crisis”, minister Wever a termina bisando.

Controversia
 Durante e reunion a surgi un momento tenso entre e minister y fraccion di MEP.

Na dado momento, Parlamentario Dangui Oduber a bin cu un critica fuerte contra e minister, bisando cu awor caba sin cu tin efectonan di guera, costo di bida ta halto. Ultimo simannan comunidad por a nota un subida den varios prijs di producto, sin lubida e prijs di gas cu Minister Geoffrey Wever mes a subi si ningun dia duna cuenta riba esaki. Esaki sigur ta di lamenta mirando cu e gobierno AVP-Futuro a gana eleccion basa riba e promesa di baha costo di bida, y awe 6 luna despues di eleccion, ni un plan nan por presenta, segun MEP a informa den un comunicado di prensa.

Minister Wever a reacciona bisando cu ‘oposicion ta stroba gobernacion’. Riba esaki, lider di oposicion, Evelyn Wever-Croes, a reacciona contestando cu e Parlamento aki, specificamente oposicion, ta haci nan trabao manera nan a priminti. Haci pregunta na gobierno ta un derecho constitucional y un deber pa cu pueblo. Y ta gobierno su deber pa contesta, y no keha cu nan ta ser stroba.

Segun fraccion MEP, no ta Parlamento of oposicion ta stroba gobernacion, e partidonan AVP y Futuro mes ta parce di no kier goberna, y nan mes ta strobando nan propio gobernacion, sin cu oposicion mester yuda nan den esaki. Fraccion di MEP a haci varios pregunta na e gobierno aki, riba diferente tereno, di cual apenas algun a haya contesta. Na e momento aki e fraccion ta wardando riba contesta di mas di 600 pregunta, algun haci desde februari y maart, tempo cu Geoffrey Wever ainda tabata minister di Economia den e gabinete anterior. Pues e minister aki tin mas di 4 luna sin contesta un pregunta. Esaki ta un falta di respet y di transparencia, segun e comunicado di MEP.

“Laga mi recorda e Minister aki cu su partido a pone den nan programa di campaña cu nan lo contesta preguntanan di Parlamento den dos (2) siman. Pero e realidad ta cu nan no a contesta nada den dos siman, y ni den dos luna. Esaki ta un muestra clave cu pa partido Futuro campaña ta un cos y goberna ta otro cos.

Tambe, den nan acuerdo di gobernacion di AVP y Futuro, nan a compromete riba pagina 9, cu nan lo contesta preguntanan den e termino cu Parlamento ta pidi. Nos fraccion a pidi pa haya contesta den 2 pa 3 siman, pero nan no ta cumpliendo cu esaki. Ya awor ta lunas despues di eleccion y ainda nos no tin un gobierno completo. Loke nos a bin ta mira den e gobernacion aki si ta varios snoepreisjes y persecucion politico. Ta tempo pa Aruba haya un gobierno completo, bon of malo, pero no por warda mas”, lider di MEP, Evelyn Wever-Croes a duna di conoce.