Recientemente den medionan di comunicacion local a circula e noticia cu Hunta di Supervision di Utilities Aruba NV a tuma e decision pa suspende e director Anthony Rojer y lansa un investigacion riba diferente asunto relaciona cu e maneho di e compania estatal. Frank Hoevertsz, presidente di e Hunta di Supervision y ex director di e compania estatal, a keda nombra como director interino.

Na 2018 gobierno di MEP, POR y RED a retira sr. Hoevertsz for di su funcion como director di e compania estatal Utilities Aruba NV. Hoevertsz a entama un caso contra gobierno pa motibo di e retiro, cual el a gana y gobierno mester a compens’e.

Aworaki cu e bolbe nombra Hoevertsz como director, aunke interino mientras ta en espera di e resultadonan di e investigacion, fraccion MEP a cuestiona e nombramento di Hoevertsz y a manda pregunta pa minister encarga cu e cartera di energia, minister Arthur Dowers, pidiendo claridad riba esaki.

Bon Dia Aruba a tuma contacto cu lider di fraccion MEP, y ex prome minister, parlamentario Evelyn Wever-Croes pa puntra kico su punto d bista di riba esaki y kico por bisa tocante cu awor a pone Hoevertsz como director interino mirando cu na 2018 su gobierno a retir’e for di Utilities.

“Mi ta lamenta cu e gobierno aki a cuminsa riba un pia asina vengativo. Ta kita hendenan drechi pa pone hendenan di reputacion dudoso,” el a expresa y a indica cu e bisa esey pa diferente motibo.

El a splica cu tempo e tabata minister di Energia, nan a introduci reglanan di corporate governance bastante estricto, y e companianan di utilidad a adapta nan reglanan interno pa cumpli cu esaki. Un di nan tabata e procedura di apunta un director.

El a sigui splica cu esey a tuma lugar pa un comision independiente, cu a entrevista, screen, test y selecta varios candidato, y despues dos compania independiente a haci otro screening y test, y asina e minister despues di dje, ex minister Glenbert Croes, a apunta Sr. Rojer pasobra el sali e mihor candidato di e screening.

El a enfatisa cu tur esaki ta informacion cu na 2021 gobierno a comparti cu Parlamento di Aruba y a sigura cu sr. Rojer no a ser apunta basa riba cualkier procedura, sino basa riba un procedura hopi extenso y independiente. El a indica cu pa miembronan di Hunta di Comisario tambe a introduci reglanan y perfil.

Parlamentario Wever-Croes a splica cu otro motibo pakico e reglanan aki mester a ser introduci ta pasobra e companianan estatal tin fiansanan cu banconan y banconan ta exigi reglanan estricto. El a indica cu hasta e banconan tin cu aproba e nombramentonan aki, sino gobierno no por apunta e miembronan of director.

Pa loke ta e candidatonan cu minister Dowers a apunta awor, Wever-Croes a indica cu di loke e por mira, a viola tur regla di corporate governance, cual ta algo, el a señala, cu e banconan (lenders) lo tin problema cune.

“Nos fraccion no ta djis papia pa papia. y nos no tin nada contra e personanan Sr. Hoevertsz of Sr. Nuboer. Ta bay pa e funcion y e cualificacionnan. Nos a haci pregunta na minister Dowers al respecto, den cual ta elabora detayadamente riba e aspectonan aki,” el a indica.

Parlamentario Wever-Croes a splica cu Sr. Hoevertsz tin un historia den mal maneho na FCCA y na Utilities Aruba NV. El a cuestiona con por bay confia un hende asina den e posicion di director. Ademas, el a agrega, recientemente a bin acusacionnan grave di abuso sexual di menor pa e persona aki cu, segun e parlamentario a indica, ainda no a defende su mes di dje. “Esaki ta atacha e imagen di henter e compania, y di minister Dowers tambe cu ta yuda tapa un delito sexual asina serio,” el a subraya.

Pa loke ta Sr. Nuboer, el a splica cu e tambe tin un historia di mal maneho di compania. Riba esaki tambe fraccion MEP a manda un carta cu un lista di pregunta pa minister Dowers. Wever-Croes a cuestiona con ta pone personanan asina, cu historia di mal maneho, pa dirigi un compania estatal. El a agrega tambe cu ademas tin e situacion recien cu a pone cu e mester a retira di Algemene Rekenkamer Aruba.

“P’esey mi ta bisa cu e gobierno aki, en bes di sigui cu e fundeshi di fortifica nos companianan estatal, ta bay back den tempo, tempo cu ta apunta ken cu ta, pa asina gobierno por haya fabornan. Loke e gobierno aki no ta realisa ta cu nos no ta den aña 2009 mas, caminda nan por a haci y deshaci. Hopi cos a cambia, entre nan corporate governance,” Wever-Croes a remerca.

El a menciona cu riba pagina 11 y 12 di e acuerdo di gobernacion di Gabinete AVP-FUTURO, gobierno mes a compromete di traha segun e reglanan di corprate governance. Parlamentario Wever-Croes a splica cu e reglanan y e maneho t’ey caba, loke falta ta e ley, cu su gabinete a laga den su fase final, djis pa ser aproba. “Gobierno por cuminsa traha sin warda riba e ley, duna e bon ehempel, lamentablemente nan a scoge pa duna e mal ehempel,” el a agrega.

Parlamentario Wever-Croes ta señala cu e acuerdo di gobernacion di Gabinete AVP-FUTURO ta inclui hopi texto bunita, pero ningun minister, el a indica, ta tene nan mes na dje, mescos cu e ehempel di contesta preguntanan na Parlamento.

El a splica cu actualmente tin mas di 600 pregunta sin contesta di fraccion di MEP so. Algun di e preguntanan aki, el a sigui splica, ta haci na minister Wever desde februari / maart di e aña aki, pero segun e parlamentario ainda no a ricibi contesta siendo cu den e acuerdo di gobernacion Gabinete AVP-FUTURO ta stipula cu nan lo cumpli cu duna Parlamento di Aruba informacion dentro di e periodo stipula. El a agrega cu ademas den su programa di campaña partido Futuro a pone cu nan lo contesta dentro di dos siman.

“Parlamentarionan ta haci nan trabao, haci pregunta na gobierno, nos ta pidi pa haya contesta dentro di 2 siman (manera nan mes a indica), y ta bayendo mas di 2 luna prome cu nos haya contesta. Locual mas ta di lamenta ta cu gobierno ta tilda parlamento di ta stroba gobernacion pasobra nos ta haci pregunta. Riba esey mi a contesta sr. Wever cu no ta parlamento ta stroba gobernacion, ta AVP y FUTURO mes ta strobando gobernacion,” el a finalisa.

Bon Dia Aruba a tuma contacto tambe cu minister encarga cu e cartera di energia, minister Arhtur Dowers pa puntra si e por confirma e informacion cu a suspende Sr. Rojer, si por confirma si tin un investigacion andando y kico a haci cu a tuma decision pa cuminsa un investigacion, pero nos no a ricibi contesta di e mandatario.