(AP) – Nigeria su presidente Bola Tinubu a duna ordodiaranson pa agencianan di seguridad tuma accion contra e orkestradornan di un atake den fin di siman cu a laga por lo menos 150 fayecido den e pais su parti norte-central, esaki mientras e ta enfrenta presion creciente tocante un crisis di seguridad cu ta empeorando.
Tinubu a bishita e estado Benue, e sitio di un atake mortal reciente, buscando calma e tensionnan y priminti cu lo bin husticia pa e victimanan. “Nos lo restaura pas, reconstrui, y trece husticia. Bo no ta bo so,” e lider di e pais a bisa riba X.
Atacadornan a drenta e estado Benue y a ataca e comunidad Yelewata for di diabierna anochi te diasabra mainta, tirando e habitantenan cu tabata drumi y kimando nan casnan, segun sobrevivientenan y sindicato di agricultornan local a bisa. Variso di esnan cu a muri tabata tumando shelter na un mercado local despues di a huy for di violencia den otro partinan di eestado.
Autoridadnan na Benue a bisa cu e culpa ta riba un tipo di violencia cu frecuentemente ta mira den parti nort di Nigeria su conflicto pastoral di varios decada caba.
Lidernan di oposicion y criticonan a acusa Tinubu di un contesta atrasa na e asesinatonan, notando cu su oficina a publica un declaracion mas di 24 ora despues di e atake. Su bishita na e estado a tuma luga 5 dia despues.
E lider di Nigeria a biaha bay Makurdi, Benue State su capital, unda el a bishita un hospital pa mira esnan herida den e atake y a reuni cu lidernan local pa dialoga tocante con pa para e asesinatonan aki. E no a bishita e comunidad Yelewata.
Tambe aparentemente el a zundra cuerpo policial pa un falta di haci algun detencion mas di 4 dia despues di e asesinato. “Con bin no a haci ningun detencion? Mi ta spera cu lo mester tin e detencion di e criminalnan aki,” Tinubu a puntra mientras e tabata dirigi su mes na oficialnan policial durante un reunion na Benue.
Analistanan ta bisa cu Nigeria su crisis di seguridad cu ta birando pio ta pa motibo cu tin un falta di disposicion politico di tuma accion contra e criminalnan y garantisa husticia pa e victimanan.
“Na final, e resultado ta mescos: No tin husticia, no tin responsabildiad y no tin clausura pa e victimanan y nan comunidad,” Senador Iroegbu, un analista di seguridad basa na Nigeria su capital Abuja a comenta. “Te ora cu esaki no cambia, impunidad lo keda e normalidad, y e tipo di tragedianan aki lo sigui sucede.”
