Den un rapport titula “Exploracion di efecto social di tecnologianan di aviacion electrico y di hidrogeno” elabora pa compania di investigacion y consultancy, Ecorys, basa na Hulanda, a duna atencion na e impacto cu e tecnologianan aki por tin riba e parti Caribense di Reino, incluyendo Aruba.

E rapport tabata comisiona pa Ministerio di Infrastructura y Maneho di Awa di Hulanda. El a keda publica fin di april.

Capitulo tres di e rapport ta trata e exploracion di e impacto di e tecnologianan menciona den e parti Caribense di Reino Hulandes.

Segun e rapport, mescos cu na Hulanda Europeo, stakeholdernan similar ta involucra den e parti Caribense di Reino. Esakinan ta e fabricantenan (OEM), usuario (aerolinea y cliente), aeropuerto y autoridadnan di aviacion. E capitulo ta explora e diferente componentenan cu ta importante pa e stakeholdernan.

E tipo di stakeholder en gran parti ta alinea cu e analisis pa Hulanda Europeo, maske ta nota cu e sector OEM (Fabricante di Ekipo Original) no ta mesun desaroya cu den Union Europeo y no tin produccion. Sinembargo, si tin companianan cu ta haci mantencion, reparacion y overhaul (MRO) di avion y institutonan di training. Ademas tin aeropuertonan cu servicio di sosten y autoridadnan di aviacion cu nan propio responsabilidadnan.

CAPEX (Capital Expenditures)

CAPEX ta referi na e inversion inicial cu ta necesario pa set up un proyecto. Tin un ecosistema hopi limita, casi inexistente, cu un cluster di R&D riba e islanan riba cual industria di aviacion por construi.

Aerolineanan mester inverti den e compra di avionnan sostenible, e modificacion (retrofit) di nan flota existente, y e infrastructura rekeri pa combustible sostenible. Aviacion electrico tin mas potencial cu hidrogeno, ya cu no tin actualmente un cluster di conocemento existente of base di infrastructura pa hidrogeno, y tambe tin problema cu espacio. E desaroyo di electricidad mediante energia solar ta ofrece un cantidad di oportunidad.

E compra di avion sostenible ta rekeri un inversion di varios decena di miyones di euro, dependiendo di e tamaño di e flota y e tecnologia scogi.

Aeropuertonan mester facilita e infrastructura pa aviacion sostenible, manera instalacion di stacion di recarga pa avion electrico, tanki di hidrogeno y e adaptacion di nan terminal y infrastructura.

E calculacion di inversion pa tres aerolinea inclui den e red – Winair, Divi Divi Air, Z Air – ta entre 100 miyon y 500 miyon euro, dependiendo riba e velocidad y tipo di adopcion tecnologico.

OPEX (Operational Expenditures)

Te cu 2025, no tin avion disponible comercialmente den categoria pa transporte regional di pasahero. Solamente e Pipistrel Velis Electro, un avion di dos asiento, ta certifica. E Velis Electro ta adecua pa vuelo di training, no pa transporte comercial di pasahero.

E costo di operacion (OPEX) di un avion electrico ta dificil pa calcula pasobra nan ta depende grandemente riba e bateria. E costo di infrastructura pa recarga, bida y prestacion di bateria, y economia di escala no ta completamente conoci ainda. En general, aviacion electrico ta spera di ta mas eficiente pa cu energia, pero ainda tin incertidumbre tocante mantencion y degradacion di bateria a largo plaso.

Red di referencia y scenario
 E red manera e tabata existi na 2024 ta ser usa como punto di referencia, y for di e referencia aki, a desaroya dos scenario tecnologico futuro”

Scenario 1: avion chikito, di hasta 30 asiento, pa distancia cortico.
Scenario 2: avion mediano, hasta 90 asiento, pa distancia di hasta 1.500km.

A haci un analisis di ki ruta por ser reemplasa na one-to-one y ki ruta por bira directo en bes di a traves di un transferencia. Pa parti Caribense di Reino, e enfasis ta riba vuelo entre Aruba-Bonaire-Corsou, Saba-Sint Eustatius-Sint Maarten, y Sint Maarten cu otro destinacionnan cercano.

En total, mas cu 60 porciento di tur vuelo den e parti Caribense di Reino ta cay den e categoria di distancia cortico cu ta adecua pa avion electrico of di hidrogeno.

Impacto ambiental y riba clima
 E rapport a crea un perfil di emision pa cada vuelo, basa riba tipo di avion, emision na haltura di cruising y durante aterisahe y lantamento, y consumo di combustible.

E transicion na aviacion sostenible ta afecta e perfil di emision.
Den Scenario 1, un reduccion di 10 porciento den emision di CO2 y un reduccion di 6 porciento den NOx ta spera.
Den Scenario 2, esaki ta aumenta na un reduccion di 30 porciento den CO2 y 22 porciento den NOx.

Emision di efecto di clima cu no ta CO2, manera awa, vapor, particula, y contrails, tambe ta reduci ora di bula electricamente of riba hidrogeno. E efectonan aki ta completamente ausente den aviacion di bateria electrico y parcialmente reduci den avion cu ta usa hidrogeno, dependiendo riba e sistema di propulsion.

Pa loke ta calidad di aire, specialmente den e fasenan di lantamento y aterisahe, emision di oxide di nitrogeno (NOx) y particula (PM) ta reduci.

Den Scenario 1 ta reduci NOx cu 16 pa 21 porciento, y den Scenario 2, e reduccion ta alcansa hasta 32 porciento.
Esaki ta resulta den miho calidad di aire na y rond di aeropuerto, cu ta particularmente valioso den areanan densamente pobla of ecologicamente sensitivo, manera den Caribe.

Pa loke ta contaminacion di zonido, zonido di avion ta significantemente menos pa avion electrico y di hidrogeno. Specialmente e zonido di lantamento ta spera di baha. Esaki por tin efecto positivo riba e calidad di bida den e area directamente cerca di aeropuerto. Den Scenario 1, un reduccion di 10-15 decibel durante lantamento ta posible. Motor electrico ta haci hopi menos zonido mecanico.

Den Scenario 2, e reduccion ta un tiki menos pa motibo di un tamaño mas grandi, pero toch ta keda significante.

Pa loke ta naturalesa y uso di tereno, e emision di nitrogeno di aviacion ta reduci. Esaki ta importante pa ecosistemanan valioso den parti Caribense di Reino manera rif di coral, boske di mangel y parkenan nacional.

Na mes momento, e despliegue di tecnologia nobo di aviacion ta involucra retonan di planificacion teritorial. Infrastructura pa aviacion electrico y di hidrogeno (manera parke solar y tanki di hidrogeno) ta rekeri espacio fisico. E produccion y eliminacion di bateria y hidrogeno tambe ta rekeri atencion. Cadena di reciclahe di bateria ainda ta den desaroyo, y produccion di hidrogeno (specialmente hidrogeno berde) tin demanda halto di energia.

Efecto social indirecto

Introduccion di aviacion sostenible por conduci na oportunidadnan nobo di empleo den e parti Caribense di Reino. Esaki ta inclui trabaonan tecnico pa mantencion y operacion di tipo nobo di avion, training y educacion den tecnologia di aviacion, rol logistico na aeropuerto y den servicio di sosten, y posicionnan administrativo y di planificacion relaciona cu red y infrastructura di aviacion.

Specialmente riba e islanan mas grandi, manera Aruba, tin potencial pa desaroya hubnan regional unda ta maneha vuelonan entre e islanan y na paisnan cercano. Esaki por duna impulso pa crecemento laboral y tambe stimula cooperacion entre e islanan.

E transicion tambe ta rekeri conocemento y habilidadnan nobo. Esaki por reforsa e infrastructura, incluyendo oportunidadnan vocacional local y programa di training tecnico, oportunidadnan pa colaboracion cu institucionnan Hulandes of partnernan internacional, y stimula hubentud pa sigui estudio tecnico cu prospecto pa empleo den nan propio region.

Miho conexionnan cu ta mas sostenible entre e islanan por stimula turismo dentro di Caribe. Bishitantenan por bishita varios isla den un solo trip mas facilmente, e parti Caribense di Reino ta bira mas atractivo como un destinacion di biahe integra, y aviacion sostenible ta contribui na e imagen berde di e islanan, cu ta atractivo pa biaheronan cu ta tene cuenta cu medio ambiente.

Ademas, conexionnan aereo mehora tambe ta aumenta mobilidad pa residentenan, permitiendo biahe mas facil pa educacion, trabao y cuido di salud.