Aumento di cantidad di hobennan reporta perdi na Aruba ta preocupante

Durante ultimo lunanan por a tuma nota di un tendencia preocupante cu a cuminsa bira comun; desaparicion di menornan di edad. Den e ultimo lunanan riba rednan social e cantidad di menornan di edad cu ta ser reporta manera desapareci ta un preocupacion grandi den comunidad.

Hopi ciudadano a expresa nan preocupacion riba rednan social y tambe ta cuestiona kico ta e problema of kico ta sucediendo cu e cantidad di menornan di edad cu ta ser reporta como perdi/desapareci ta mustra cu ta aumentando.

Bon Dia Aruba a tuma contacto cu vocero di Cuerpo Policial di Aruba (KPA), Sra. Liliana Rasmijn pa puntra, entre otro, si tin cifra pa loke ta trata e cantidad di casonan cu nan ta ricibi di menornan di edad cu ta ser reporta perdi/desapareci.

Rasmijn a splica cu nan no tin cifra tocante e cantidad, pero el a indica si cu ta door cu ta trata di menor di edad KPA mester publica e informacion di e menornan di edad perdi/desapareci pa asina nan por haya nan back.

Contestando e pregunta si talbes tin un indicacion di kico por ta e motibo of por ta sucediendo, Rasmijn a splica cu tin hopi factor na unda e hoben no kier keda cas y sigui e reglanan di e mayornan. El a agrega cu tambe tin e casonan caminda cu esnan cu ta keda cerca sea un voogd of un lugar y nan ta bay scol pero no ta bin back na unda na ta keda y di biaha esnan cu ta zorg pa mucha/hoben ta bay Warda di Polis y ta reporta nan como perdi.

El a sigui splica cu e parti social, peer pressure, etc. ta hunga un rol y di otro banda tin e mucha/hobennan cu ta rebeldia y no kier sigui regla. Aunke e no por duna detayes specifico di e casonan pa motibo di privacidad, el a remarca cu nan zorg pa instancianan concerni cay aden pa asina nan ricibi e ayudo cu nan mester.

Rasmijn a enfatisa cu KPA ta purba di usa e plataformanan social pa asina nan por haya nan mas lihe cu ta posibel pa nan propio seguridad. El a indica cu semper polis ta busca nan, pero awor ta haci uso di e plataformanan social tambe pa nan por yega na e hoben perdi mas lihe.

Por ultimo, a puntra Rasmijn kico ta su conseho na tanto e mayor of voogd(nan) y e hobennan pa ta mas atento y consciente pa evita casonan asina. El a splica cu semper di parti di KPA nan conseha nan pa nan papia cu un persona di confiansa y expresa nan mes pa por wak na unda y cual instancia of persona profesional por yuda e hobennan.

El a remarca cu di parti di KPA tambe nan ta duna charla y ta papia di cerca cu e hubentud na scol y ademas di esaki e polisnan di bario ta traha mas estrecho cu scolnan tambe.

E tendencia aki ta crea un preocupacion grandi den comunidad y ta subraya e necesidad pa un combersacion cu no solamente e hobennan, pero tambe mayornan pa aumenta conscientisacion riba e importancia pa mantene relacionnan sano entre famia y alabes adverti hobennan di e peligernan cu nan por encontra na momento cu nan talbes dicidi di huy for di cas.