Riba rednan social y medionan di comunicacion a circula e noticia cu hefe di prensa di Gabinete AVP-FUTURO, Marko Espinoza, tabata envolvi den un accidente di auto y a keda deteni pa stuur bou di influencia. Esaki a ocasiona un ola di reaccion riba rednan social di cuidadonan cu ta indigna pa loke a sucede y ta cuestiona ki accion gobierno ta bay tuma.
Aunke no tin informacion detaya tocante e sucedido, segun informacion comparti riba diferente medionan di comunicacion digital, e hefe di prensa di Gabinete AVP-FUTURO tabata tras di stuur bou influencia na momento cu e lo a perde control di su vehiculo y cay den un greppel (rooi).
Unabes cu e noticia a bira conoci, cuidadonan a expresa nan indignacion y a cuestiona con por ta posibel cu un persona cu ta representa Gobierno di Aruba ta comporta di e forma aki y pone otro bidanan na peliger door di stuur bou influencia. Ciudadanonan tambe ta cuestiona ki accion gobierno ta bay tuma contra Sr. Espinoza.
Algun di e reaccionnan di ciudadanonan: “Ley ta conta mescos pa tur hende” ; “Ora bo punta dede riba otro, tin cuater mas ta punta riba bo”; “Que berguensa, unda integridad a keda?”
Di otro banda tin ciudadanonan cu ta defende Espinoza y ta señala cu e tambe ta humano y cu un situacion asina por pasa cu tur hende.
Ex minister di Finanzas y cultura y actual parlamentario di fraccion MEP, Xiomara Maduro tambe a reaccion riba e sucedido y a cuestiona ki ehempel Espinoza, ken ta un representante di gobierno ta duna cu e comportacion aki.
“Esta un berguensa pa mira man drechi di Minister President Eman y Vocero di Gobierno di Aruba ta actua di e manera aki. Ki ehempel e ta duna? Hende cu a lastra garoshi pa Eman y haci trabou sushi pa AVP yega na poder awo ta lastra burachi di bebida y poder. ‘Wat een afgang’ pa un Gobierno di Aruba. #vies,” Maduro a publica.
