(Caribisch Netwerk) – Michael Dijkhoffz, ex hefe di ICT pa Sint Maarten, mester paga back miyones na placa obteni fraudulentamente. Esaki a keda determina siman pasa door di corte na Philipsburg riba Sint Maarten. Dijkhoffz a keda aresta na 2020 en conexion cu un investigacion di hopi tempo door di Departamento Nacional di Recherche Criminal riba iregularidad den e destaho di proyectonan di ICT.

El a ser condena pa paga back mas di 4.4 miyon florin di Caribe. Esey ta mas cu 2.2 miyon euro. Esaki ta regarda e caso cu yama ‘Seabass’. E suma aki ta relaciona cu fraude den cual supuestamente gobierno di Sint Maarten a keda defrauda di mas o menos 9 miyon florin entre 2010 y 2015.

Un complice, Julian Charley Lake, mester paga back djis mas cu 400.000 florin. Corte diahuebs a adopta e calculacion financiero di Ministerio Publico di Sint Maarten completamente den su sentencia.

Fraude di gobierno

Michael Dijkhoffz, e ex-hefe di e departamento di ICT di gobierno, ta ser sospecha di a abusa di su posicion den otorgamento di destahonan publico di ICT, estafa gobierno y laba e entradanan ilegal. Diferente persona y entidad huridico a keda identifica como sospechoso den e investigacion. Ademas a tuma sumanan di placa y un pida tereno den beslag.

E corte a determina anteriormente, na december 2024, cu Dijkhoffz – mientras e tabata ocupa un posicion gubernamental – a manipula e otorgamento di contractnan di IT na fabor di dos compania cu tabata ser controla secretamente pa e mes y Lake. Pa sconde nan envolvimento, un compania a ser registra riba nomber di e ruman muher di Dijkhoffz y e otro riba nomber di Lake su casa di e tempo ey.

Abuso den destaho di proyectonan di ICT

E duo a ser condena pa corte na 2022 den cuadro di e asina yama investigacion ‘Seabass’, cu a enfoca riba abuso den e destaho di proyectonan di ICT y e cumpramento di hardware y software di computer pa gobierno di Sint Maarten. E condenacion aki a keda confirma pa corte conhunto di Husticia na december aña pasa.

Dijkhoffz a ser condena inicialmente na cuater aña y nuebe luna di prison. Despues corte a reduci e castigo aki cu nuebe luna. Lake, un ex-consehero di politica na e departamento di ICT, a keda sentencia na prome instante na dos aña y nuebe luna, pero corte a reduci esaki na un aña y nuebe luna, pasobra no ta tur corupcion y crimen financiero a keda proba den apelacion.

Hopi placa

Segun Corte, a keda proba cu Dijkhoffz y Lake a eherce nan influencia den seno di comisionnan di destaho pa otorga contract di gobierno na dos compania local cu desde e tempo ey a cera. Despues e companianan local aki a transferi placa pa tres compania Mericano, tur propiedad di familiar cercano di Dijkhoffz, cu supuestamente a fungi como proveedor.

E companianan Mericano na nan turno a transferi cienmiles di dollar pa e cuenta di banco priva di Dijkhoffz na Merca. E placa aki segun informe a ser usa pa metanan priva, manera compras y huurmento di auto, cuminda y paña, pasashi di avion, klapchi, timeshare y casnan di vakantie, gastonan di scol, les di core auto y construccion di un pool.

E apelacion di aña pasa a revela cu un di e companianan Mericano a transferi un total di aproximadamente 70.000 dollar Mericano pa e cuenta di banco di Lake entre 2016 y 2018. Tambe tabatin sospecho cu el a saca placa cash for di e cuentanan di banco pa su mes uso, manera The Daily Herald a informa tocante e caso aki.

E caso a cuminsa na 2019. E aña ey, dia 19 di november, a haci cinco huiszoeking en conexion cu un investigacion riba Dijkhoffz, y el a ser deteni un aña despues. Na 2019, Ministerio Publico a declara den un declaracion cu e sospechoso a mina ‘e integridad di administracion publico y di servicio civil’ na gran escala.