Despues di encuentro publico e siman aki den Parlamento tocante e asina-yama “Trade War”, parlamentario Rocco Tjon (MEP) a manda 21 pregunta na minister di Finanzas, señor Geoffrey Wever, tocante e peligernan economico cu un guera comercial mundial por trece pa Aruba.
“Nos sa cu tension internacional ta aumentando entre paisnan grandi manera Merca, China y Union Europeo. Como un isla chikito y dependiente di importacion nos ta masha fragil den e tipo di situacionnan aki. Prijs di cuminda, gasolin y otro articulo necesario por sigui subi fuerte si comercio mundial ta keda stroba. Esaki ya caba a sucede!” segun e parlamentario a bisa den un comunicado di prensa.
“Nos kier sa kico e minister ta haci pa proteha nos economia. Pueblo kier sa: kico ta e plan si e importacion ta para of prijs ta subi hopi? Unda e plan di emergencia ta?”
Ta conoci y un hecho cu Aruba ta importa casi tur cos y tambe cu un guera comercial ta causa prijs mas halto y esaki nos ta sinti mesora den e bida diario di cada famia Arubano. Ya caba na februari nos a reuni cu Minister Wever y e a priminti di presenta un plan integral na Parlamento. Pero ayera a indica cu ainda e plan aki no ta cla.
“Nos no por sigui warda te ora e impacto negativo bira mas grandi. Tur hende ta sinti e subida di gasto cada dia. Gobierno mester tuma e situacion mas serio.”
Di otro banda ta aloca 30 miyon florin pa un fondo di inversion sin cu tin proyecto identifica. No ta duna subsidio adicional na fundacionnan cu tin mester di esaki pa alivia y mehora cuido di salud mental y Gobierno ta cobra diferente famia cu tin personanan cu limitacion placa back. Nos ta pidi pa gobierno bin cu prioridadnan husto y presenta un plan cla y transparente pa proteha nos economia si e situacion mundial bira mas dificil.
