(AP) — Tabata un atake sin precedente prepara durante añas, cu algun distraccion di ultimo momento destina pa duna un elemento poderoso di sorpresa.
Pilotonan Mericano a lansa bomnan di 30mil libra diadomingo trempan riba dos planta clave di enrikecimento di uranium na Iran, dunando loke lidernan militar Mericano ta kere ta un golpi knockout na un programa nuclear cu Israel ta mira como un menasa existencial y ta bin atacando pa mas cu un siman. Mariniernan Mericano a reforsa e mision sorpresa door di lansa decenas di misil crucero for di un submarino den direccion di al menos un sitio mas.
Yama “Operacion Martiu di Mey Anochi” (Operation Midnight Hammer), oficialnan Mericano ta bisa cu e plan tabata caracterisa pa un “atake di precision” cu a “devasta e programa nuclear Irani”, hasta mientras nan a reconoce cu un evaluacion ta andando. Di su banda, Iran a rechasa cu a haci cualkier daño significante, y e Republica Islamico a priminti represalia.
Saliendo for di centro di Merca, avion invisible di bombardeo B-2 a lansa un total di 420mil libra di explosivo, yuda pa un armada di tankero pa refuel y fighter jet – di cual algun a lansa su propio armanan.
Oficialnan Mericano a bisa cu Iran no a detecta e atakenan yegando ni a logra lansa un tiro riba e jetnan Mericano invisible.
E operacion tabata depende riba un serie di tactica deceptivo y ‘decoy’ (lokaas) pa mantene secresia, oficialnan Mericano a bisa despues di e atake, cu tabata precedi pa nuebe dia di atake Israeli cu a debilita liderazgo militar y defensa aereo di Iran.
Un plan di ‘decoy’
Hasta prome cu e avionnan a sali, elementonan di distraccion ya tabata na su lugar. Despues di ehecuta partinan di e plan, Trump a anuncia publicamente diahuebs cu e lo tuma un decision dentro di dos luna tocante si lo ataca Iran – pa permiti tempo adicional pa negociacion, pero en realidad, scondiendo e atake inminente.
Un grupo di avion invisible B-2 a biaha west for di Missouri diasabra como ‘decoy’, halando atencion di spotter amateur di avion, oficial di gobierno y algun medio di comunicacion mientras nan tabata bay un base aereo Mericano den Pacifico. Na mes momento, siete otro B-2 transportando dos bom “bunker buster” cada un a bula direccion oost, manteniendo comunicacion na un minimo pa no hala ningun atencion.
General di Forsa Aereo, Dan Caine, presidente di Joint Chiefs of Staff, a bisa diadomingo cu tur tabata “parti di un plan pa mantene e sorpresa tactico” y cu apenas “un cantidad extremadamente chikito di planeador y lider clave” tabata sa na Washington y Florida, unda e Comando Central Mericano ta basa.
Despues di 18 ora di vuelo furtivo cu a rekeri pa refuel den aire, e B-2 Spirit bomber, cada un cu dos miembro di tripulacion, a yega na tempo y sin deteccion den Mediteraneo Oriental, for di unda nan a lansa nan atake. Prome cu drenta Iran, e B-2 tabata escolta pa fighter jet y avion di reconnaissance Mericano.
Un grafico publica pa Pentagono a mustra e ruta di vuelo pasando riba Libanon, Siria y Irak. No tabata cla si e paisnan a keda notifica di antemano di e vuelo di Merca. Mayoria di legislador Mericano tampoco a ser informa, cu algun Republicano bisando cu a ricibi un notificacion breve di Cas Blanco prome cu e atake.
“Nos B-2 a yega y sali back sin cu mundo tabata sa en absoluto,” Secretario di Defensa, Pete Hegseth a bisa reporteronan ayera.
Un atake multifacetico
Como un ora prome cu e B-2nan a drenta Iran, Caine a bisa cu un submarino Mericano den e region a lansa mas cu dos decena di misil crucero Tomahawk contra obhetivonan clave, incluyendo un sitio na Isfahan unda ta prepara uranium pa enrikecimento.
Mientras e bombernan Mericano a acerca nan obhetivonan, nan a tira un bista pa fighter jet Irani y misil di superficie pa aire, pero no a haya ningun.
Pa 6:40pm na Washington y 2:10am na Tehran, e prome B-2 bomber a lansa su par di MOP (Massive Ordinance Penetrator) GBU-57 riba e planta profundamente dera di enrikecemento di Uranium, Fordo. Esaki tabata e prome biaha cu a usa e asina-yama “bunker busters” den combate. Cada bom di 30mil libra ta diseña pa coba den tera prome cu detona un warhead masivo.
E sitio na Fordo a ricibi e mayor parti di e bombardeo, maske un par di e bom enorme tambe a ser lansa riba un sitio di enrikecemento di uranium na Natanz.
E bomnan Mericano a cay pa alrededor di mey ora, cu misilnan lansa for di submarinonan como e ultimo armanan Mericano alcansando nan obhetivo, cu a inclui un di tres sitio nuclear na Isfahan, segun Caine.
Tanto Iran como e vigilante nuclear di ONU a bisa cu no tin señal inmediato di contaminacion radioactivo na e sitionan.
E mision a inclui:
– 75 arma guia cu precision: esakinan ta inclui 14 bom GBU-57 “bunker buster” desplega pa e siete B-2 invisible, y mas cu dos decena di misil crucero Tomahawk lansa for di un submarino Mericano.
– 125 avion, incluyendo e bomber B-2, fighter jet y avion pa refuel.
Caine a bisa cu uso di e bom bunker-buster a haci e mision uno historico, manera otro elementonan. “Esaki tabata e atake operacional B-2 mas grandi den historia Mericano, y e di dos mision B-2 mas largo cu a yega di bula den historia, surpasa solamente pa esnan den e dianan despues di 9/11”, el a bisa reporteronan ayera.
