Minister di Husticia, Arthur Dowers: Investigacion forensico den caso di Ayden Lanoy a keda cla

Ayera mainta, Parlamento di Aruba a reuni pa un sesion di pregunta na minister di Husticia, Arthur Dowers (AVP) tocante e caso di persecucion policial cu a resulta den morto di e hoben Ayden Lanoy.

Parlamentario John Hart (AVP) a cuminsa notando cu anteriormente, den e reunion publico number 12, “a urgi gobierno pa instrui departamento hudicial encarga cu e ehecucion di e investigacion, pa activamente brinda transparencia na familiarnan di Sr. Lanoy y comunidad di Aruba. Esaki ta un decision den Parlamento,” y basa riba esaki a dicidi pa haci un follow-up.

Parlamentario Hart a puntra si e “minister por, sin perhudica e integridad di e investigacion aki, duna un update general na Parlamento di Aruba riba e proceso di e investigacion? Minister por comparti di kico exactamente e polisnan ta wordo sospecha? Minister por comparti cual ta e pasonan cu minister lo tuma pa activamente brinda transparencia den comunicacion na familiarnan di Lanoy y comunidad di Aruba, y tambe si Su Excelencia por duna un informacion riba e status di e proyectonan” cu a dicidi den Parlamento, esta bodycam, dashcam, test di droga, etc.

Minister Dowers a cuminsa bisando cu Ministerio Publico tabata den espera di investigacionnan cu mester a tuma lugar na man di institucionnan forensico Hulandes, den e caso aki NFI. Entre tanto, e investigacionnan a keda cla, y “e informacion a drenta, cu tabata spera riba dje”, y basa riba e informacion ricibi, “e investigacion di Landsrecherche ta bay sigui aworaki.”

“Kiermen e informacion cu a drenta den e investigacion ta bay wordo compara, dus ta bay scucha e [sospechosonan] basa riba e informacion cu a drenta nobo, anto e ora ey por yega na cierto conclusionnan basa riba e investigacion,” Dowers a bisa.

Tocante e polisnan sospechoso den e caso aki, Dowers a indica cu den un momento anterior a informa cu tur dos di e polisnan aki ta sospecha di medeplege van doodslag, y esaki lo mester keda determina basa riba e investigacion, cu ainda no a conclui, y eventualmente lo presenta e conclusionnan dilanti hues.

Pa loke ta trata transparencia pa cu e familiarnan y comunidad di Aruba, minister di Husticia a bisa: “Ta asina cu Ministerio Publico tin e obligacion pa duna cierto informacion na e victima di un crimen, of na e nabestanden, bo por bisa e famianan di e victima di e crimen. Esey a tuma lugar, segun mi ta compronde.” El a bisa tambe cu Ministerio Publico a informa su persona e Hoofd Officier van Justitie mes tabata involucra den duna informacion na e famia di e victima den e caso. Pa loke ta trata comunidad, Dowers a bisa cu esey ta keda na Ministerio Publico, pero el a bisa cu el a ripara cu ainda mester desaroya mas e manera con cadena di Husticia ta duna comunicacion y claridad riba cierto proceso. “Bo ta ripara cu e departamento di Husticia ta duna informacion basa riba por ta loke ley ta stipula, pero no necesariamente loke e desaroyonan den comunidad awendia ta rekeri,” Dowers a bisa, agregando cu mester bin cu un strategia pa miho comunicacion cu comunidad, “pa bo preveni tambe cu cierto tendencia ta nace, crece y keda existi den un comunidad tambe,” den sentido di cierto idea of narativa cu ta ser promovi den comunidad pa cierto actornan, cu e minister no a specifica.

Parlamentario Otmar Oduber, lider di PPA, tambe a tuma oportunidad pa haci pregunta na e minister.

El a bisa cu 17 di april a manda 23 pregunta na minister di Husticia, mirando cu comunidad – y particularmente e famia di e victima – tin hopi atencion pa e caso y kier claridad.

Oduber a puntra na ki momento OM lo keda cla cu e investigacion. Tambe a pidi e minister si por confirma cu un agente ta haya training pa uso di arma solamente despues di caba su estudio, y prome cu e cuminsa traha, y si kico ta e plan pa e agentenan regularmente sigui haya training debido pa uso di arma reglamentario.

Minister Dowers a bisa cu ainda e mester a “double check y cross check” e contestanan cu KPA pa wak si “e contestanan aki en realidad ta refleha loke ta biba den e organisacion.”
Tocante e opleiding pa ehercicio di arma, Dowers a bisa cu durante cu e polis ta den opleiding nan ta ricibi preparacion teoretico prome, y ora cu nan haal e module aki, nan ta siña e parti practico. “Segun mi ta compronde cu tur mester ta suficientemente cualifica na momento cu nan caba nan opleiding,” el a bisa. Pa loke ta trata e training den practica, Cuerpo Policial a bisa cu no a logra haci tur e training manera nan tabata desea, incluyendo haci un training dos biaha pa aña. Pero el a indica cu den proximo dianan lo tin combersacionnan riba e topico di training y lo duna mas informacion asina cu esaki ta disponible.

Tocante e dos polis involucra den e caso di Lanoy, e minister a bisa cu “si tabata suficientemente getrained como quiera cu nan ta den opleiding y nan a completa nan training.”

Despues di e ronda di contesta aki, parlamentario Oduber a puntra minister Dowers si “ta usual den un caso cu a sucede cu e hoben Lanoy cu e dos agente policial nunca a wordo aresta, pa por separa nan pa investigacion; mirando cu ta tres persona tabatin eynan, un no t’ey mas lamentablemente, y e dos cu tabata forma parti di un banda nunca a wordo separa, aresta, pa at least haci investigacion. Ta straña mi den mi bista y den comunidad.” El a puntra si e minister ta comparti su opinion.

Minister Dowers a bisa cu di su conocemento huridico, OM tin prerogativo si ta detene un persona of no. Den e caso di un polis den ehecucion di su funcion, den caso cu no tin claridad, no necesariamente ta deten’e pasobra ainda mester determina si acaso loke a tuma lugar ta un hecho castigable. Dus no a detene nan ainda pasobra no a keda determina den investigacion ainda si nan a comete un hecho castigable. Sinembargo, semper cu un polis haci uso di su arma, ta bin un investigacion, el a agrega.

Di su banda, parlamentario Hendrik Tevreden (MEP) tabatin tres pregunta: Ki tempo por spera e cambio den strategia di comunicacion cu comunidad, “manera cu minister a bisa, nos tambe ta pensa cu e forma con a comunica e parti di OM cu comunidad por a usa otro strategia. Pero concretamente, ki tempo nos por spera e cambionan den e strategia di comunica cu comunidad?” Minister Dowers a contesta solamente cu lo tene combersacion cu stakeholdernan riba esaki.

Ademas, parlamentario Ruthlyn Lindor (Futuro), kende tambe a manda pregunta por escrito riba e tema, a comenta cu e morto di Ayden Lanoy “a sacudi e isla aki den un luto profundo.”

“E silencio di esnan na mando tabata mas duro cu cualkier grito pa husticia. Si nos ta biba bao estado di derecho, nos ta biba bao di ley, husticia no por keda na palabra so. Nos mester hecho.”

El a puntra minister ki paso ta bay tuma pa garantisa cu ningun otro famia “mester dera nan yiu mientras nan ta warda contesta cerca gobierno,” y ki pasonan ta bay tuma pa un caso asina no ripiti atrobe. Parlamentario Muzanine Wever (Futuro) a puntra e minister ki tipo di instruccion polis a haya of ta haya pa determina kico ta e accion adecuado y proporcional, vooral ora ta regarda desescalacion di un situacion, pa nan por evalua un situacion corectamente pa algo asina no sucede, y ki consecuencia tin ora no cumpli cu e instruccion aki, principalmente ora ta resulta den daño corporal of hasta morto.

Minister Dowers a bisa cu ta prepara e personal, mediante training, opleiding y coaching pa reduci cierto riesgonan cu ta bin cu e trabao di polis. El a bisa cu tambe mester haci investigacion den e organisacion apart di e investigacion penal, pa siña di loke a tuma lugar y prepara pa deal cu e retonan, pero cu esaki lo bin despues cu e investigacion di OM y Landsrecherche keda cla.
El a bisa tambe cu e informacion di desescalacion ta inclui caba den training di polis, y cu “no ta asina cu polis ta bay busca confrontacion cu hende” pero cu no den tur situacion ta logra.

Parlamentario Otami Thomasia (AVP) a puntra con por wak cu por trece trankilidad bao di comunidad y e confiansa den cuerpo policial, pa preveni cu lo bin mas conflicto entre cuerpo policial y comunidad.

Minister Dowers a bisa cu den tur comunidad tin hende cu no ta confia Cuerpo Policial y no ta confia husticia, pero e unico forma cu por kita cierto desconfiansa ta door di comunicacion.

Na final, e conclusion di e reunion tabata cu mester mas claridad y transparencia di parti di autoridadnan, pero tambe comunidad mester duna tempo pa autoridadnan por haci nan investigacion.