Ayera mainta durante un conferencia di prensa miembro di fraccion di AVP parlamentario Stephany Sevinger a trece dilanti e topico di RWZI y tambe a elabora riba algun pregunta cu e fraccion a manda pa minister encarga cu energia, Arthur Dowers, tocante e proceso di privatisacion di e plantanan y e costo cu esaki ta carga.

Parlamentario Sevinger a indica cu el a tuma nota di e noticia na comienso di siman tocante e situacion cu keto bay e hotel Amsterdam Manor ainda ta enfrenta, esta e mal holor cu tin den e area aki.

Alabes, el a menciona, relaciona cu e topico, el a menciona cu el a tuma nota tambe di e conseho cu CAft a saca cu ta toca e tema di loke ta AWSS.

El a splica cu AWSS ta un compania cu a ser estableci pa asina e plantanan di RWZI pasa bou di e compania aki den un modelo di privatisacion. El a remarca cu esaki ta un modelo cu un poco straño mirando cu AWSS toch ta cay bou di Utilities NV cu toch ta cay bou di gobierno, pues por papia di un semi-privatisacion y no uno completo.

Sevinger a indica cu den su conseho CAft ta identifica e proceso aki como uno hopi costoso pa pais Aruba mirando cu e modelo cu a ser usa a haci cu na momento cu AWSS a tuma over e tres planta di RWZI, esun na Bubali, Parkietenbos y Zeewijk, hunto cu incinerator, e compania a haci prestamonan priva pa por a drecha e plantanan aki.

E prestamonan aki, el a sigui splica, CAft ta identifica cu a causa casi 200 miyon florin extra di costo riba locual cu lo tabata si nan a laga e plantanan bou di debe nacional. “Esaki ta algo cu ta di cuestiona tambe mirando cu te ainda nos no ta 100% sigur di kico tur ta pasando cu e plantanan aki. Nos no ta mira mehoracion tampoco mirando cu despues di algun tempo caba cu a introduci e 20 dollar na e ED card esaki ta trece casi mas o menos 45 miyon florin extra pa aña den e caha di AWSS y ainda no ta mira mehoracion manera por a nota cu Amsterdam Manor,” e parlamentario a remarca.

El a menciona cu minister Dowers a haci un rondleiding di AWSS poco tempo pasa, unda cu el a bisa cu e lo haci un analisis profundo di ken tur ta responsabel y pa cual parti di e trabounan y cu lo tene e hendenan aki responsabel pa nan rol. “E negligencia di hopi aña cu ta tumando luga den e departamento aki no por keda sin consecuencia,” el a subraya.

Parlamentario Sevinger a splica cu e programa di gobernacion di Gabinete AVP-FUTURO ta menciona cu lo duna atencion na e problematica aki, sobretodo e parti di contaminacion causa pa RWZI y cu nan lo atende cu esaki door di amplia e RWZI na Parkietenbos y purba di haci un traslado di esun na Bubali Plas pa Parkietenbos.

El a sigui splica cu den e acuerdo di gobernacion ta menciona tambe locual ta seca y recicla e sludge di RWZI y reduci of elimina e descarga di awa cu residuo cu ta bay lama.

El a remarca cu hopi di e preguntanan cu ta bin dilanti mirando e situacion cu ta pasando akinan nan manda pa e ministernan concerni. Na mesun momento el a trece dilanti diferente pregunta cu e tin pa minister Dowers.

E parlamentario ta puntra e mandatario dicon DOW mes no por a maneha RWZI mirando cu e proceso di privatisacion a causa hopi costo extra y tin hopi sospecho y duda rond di dje tocante con e ta ser manera. El a enfatisa cu un investigacion tambe ta na su luga y haya di compronde cu e gobierno aki lo investiga con esaki a tuma luga pasobra e tabata algo cu a lanta hopi sospecho.

Parlamentario Sevinger ta puntra minister Dowers tambe tocante e placa, e 45 miyon florin cu AWSS ta haya extra di e 20 dollar di ED card cu ta ser cobra na turista. El a indica cu e fraccion kier sa ken ta manehando e placa aki y kico ta haciendo cune mirando cu nan no ta mira avance den e plantanan aki.

El a agrega cu no ta trata solamente esey. El a splica cu nan a tuma nota tambe cu riba e pagina di AWSS ta indica cu e turista mester paga e 20 dollar un biaha so pa aña, pero e sistema cu tin aworaki no ta reconoce e numbernan di paspoort, pues cada biaha cu un turista bin mas cu un biaha Aruba e mester bolbe paga esaki y cana un proceso largo cu AWSS pa por haya su placa back.

“Esaki ta algo cu ta un poco demotivante vooral mirando cu e sector turistico ta asina importante pa nos economia,” el a enfatisa.

Sevinger a indica cu algun otro pregunta cu nan tin pa minister Dowers ta dicon no por a haya e placa como bestemmingsbelasting, con ta midi e impacto cu esakinan ta trece cune pa comunidad y medio ambiente, y si tin un plan di mantencion un bes cu caba di modernisa RWZI, con esaki lo ser indica.

E parlamentario a subraya cu e preguntanan mas clave ta basa riba e conseho di CAft.

El a indica cu mirando cu CAft ta constata cu e decisionnan tuma pa Gabinete anterior lo pone un presion di casi 200 miyon extra riba finanzas di Aruba, nan kier sa con gobierno lo atende cu e gastonan extra aki.

El a agrega cu CAft tambe a menciona e peliger di posibel bancarota di AWSS y relaciona cu esaki e fraccion tambe lo kier sa con gobierno lo atende cu e deficit di e fondonan si AWSS no yega na locual ta necesario pa por mantene e compania.

Parlamentario Sevinger a splica cu e incinerator tambe ta cay bou di AWSS y esaki tambe tin hopi pregunta rond di dje, sobretodo mirando cu e no ta cumpli cu e capacidad pa cu Aruba aworaki.

El a indica cu fraccion AVP lo kier sa tambe cual ta e condicion actual di incinerator, si e ta traha, si e tin posibilidad di traha of si e mester ser reemplasa completamente.

El a menciona cu tin informacion tambe cu tin 50 container cu desperdicio medico cu ta putri. E lo kier sa kico ta bay ser haci cu e containernan mirando cu nan ta crea tur sorto di peliger pa medio ambiente, pa e hendenan y esnan cu ta bishita e isla.

Por ultimo, el a indica cu nan kier sa con gobierno ta para cu inversion den waste to energy of cual ta e alternativanan y modernisacion cu ta bay ser introduci den locual ta maneho di desperdicio.