Abuso di droga y trafico ilicito ta keda preocupacionnan mundial grandi, afectando miyones di individuo, famia y sociedad. E Dia Internacional Contra Abuso di Droga y Trafico Ilicito, observa riba 26 di juni tur aña, ta sirbi como un yamado mundial pa accion pa combati problemanan relaciona cu droga a traves di conscientisacion, prevencion y rehabilitacion.

E observacion aki ta subraya e importancia di politicanan basa riba evidencia, compromiso cu comunidad, y strategianan di reduccion di daño pa crea un sociedad mas saludabel y liber di droga.

Pa medio di resolucion 42/112 di 7 di december 1987, Asamblea General a dicidi di observa 26 di juni como Dia Internacional contra Abuso di Droga y Traficacion Ilicito como expresion di su determinacion pa fortalece accion y cooperacion pa logra e meta di un sociedad internacional liber di abuso di droga.

E problema mundial di droga ta presenta un reto diverso cu ta toca bida di miyones di hende rond mundo. For di personanan cu ta lucha cu trastornonan di uso di substancia te na comunidadnan cu ta lucha cu e consecuencianan di trafico di droga y crimen organisa, e impacto di droga ta di gran alcance y compleho. Ta importante pa atende cu e reto aki y adopta un enfoke basa riba evidencia cientifico cu ta priorisa prevencion y tratamento.

Tur aña, e Oficina di Nacionnan Uni pa Droga y Criminalidad (UNODC) ta pone un tema pa guia campañanan di conscientisacion mundial y recomendacionnan di politica. E lema pa Dia Internacional contra Abuso di Droga 2025 ta bira: “Kibrando e cadenanan: Prevencion, Tratamento y Recuperacion pa Tur!” E lema aki ta enfatisa sosten di comunidad, acceso na cuido di salud, y e necesidad pa solidaridad mundial den atende cu abuso di droga y trafico ilicito.

Considerando e tendencianan creciente den produccion di droga sintetico y crisisnan di salud mental relaciona cu abuso di substancia, ta spera cu e tema di 2025 lo pone enfasis riba tratamento di salud mental y adiccion, ataca e epidemia di droga sintetico, fortalece aplicacion di ley contra trafico di droga, y amplia acceso na servicio di reduccion di daño.

Den regionnan marca pa instabilidad, rednan criminal organisa ta expande produccion y trafico di droga na un escala sin precedente. Den Latino America y Caribe, produccion y trafico di cocaina record ta alimenta violencia y ta deteriora institucionnan estatal. Segun cu e demanda ta plama, mercadonan di cocaina ta creciendo rapidamente no solamente na Europa pero tambe den henter Africa y Asia. Den e Triangulo di Oro di Sur oriente Asiatico, metanfetamina awor ta domina riba droganan tradicional manera opio y heroina mientras cu gruponan arma tambe ta participa den estafa online na gran escala y fraude financiero.

E aumento di droga sintetico ta presenta un reto nobo y mortal. E substancianan aki ta causa mortonan pa motibo di sobredosis y ta pone presion riba sistemanan di salud cu ya ta fragil.

E comercio di droga ilicito ta profundamente conecta cu otro crimen incluyendo traficacion di hende, mineria ilegal y destruccion di medio ambiente. Hunto, e crimen interconecta aki ta parti di un ciclo vicioso cu ta hancra pobresa, explotacion, debilidad institucional y adiccion.

Pa stop traficacion di droga ta rekeri accion coordina a largo plaso pa atende oferta y demanda y preveni gruponan criminal organisa di explota vulnerabilidadnan.

E Dia Mundial di Droga di e aña aki ta boga pa inversion den prevencion, incluyendo husticia, educacion, cuido di salud y medionan di supervivencia alternativo — e blokinan di construccion di resiliencia sostenibel.

Segun e ultimo estadistica di Uso di Droga 2025 mas cu 300 miyon hende di edad 15-64 rond mundo a usa droga den e ultimo aña; uso di cannabis a aumenta cu 25% den e ultimo decada, cu preocupacionnan creciente tocante opioidnan sintetico manera fentanilo y metanfetamina; 1 di cada 8 persona cu trastorno di uso di substancia ta ricibi tratamento, resaltando e necesidad urgente pa mehora acceso na cuido di salud; comercio mundial di droga ta genera mas cu $400 biyon anualmente, alimentando crimen organisa, corupcion y violencia.

E aña aki e organisacion Insight Crime a publica nan rapport titula “Criminal Threats to the Caribbean in 2025” cu ta adverti tocante e cercania di Colombia y Venezuela cu en particular ta trece retonan nobo pa e region.

E rapport ta indica cu e aumento den produccion di cocaina, cu a aumenta casi 53% for di e aña anterior, ta creando rutanan nobo pa contrabanda di droga pa Europa y Merca. Ademas di e rutanan bon conoci via wafnan grandi di container manera Kingston, Jamaica, y San Juan, Puerto Rico, criminalnan ta usando mas y mas barconan mas chikito, barconan di pisca y barconan di motor rapido pa transporta droga pa islanan den e region. Riba e islanan aki, despues ta sconde droga den container pa transporte pa Europa y Merca.

E volumen creciente di cocaina cu ta sali for di Sur America, e necesidad pa rutanan nobo a pusha e crimen organisa transnacional (TOC) den nacionnan nobo mientras nan ta busca puntonan di salida varia pa evita esfuersonan di interseccion.

E rapport ta remarca cu mientras cu esaki ta mas cla den nacionnan di Sur America manera Chile, Uruguay y Argentina, Caribe ta hopi vulnerabel, y lo mira mas cocaina pasa door di su teritorio na 2025.