Recientemente lider di fraccion MEP parlamentario Evelyn Wever-Croes a bolbe publica un carta cu ta contene un lista di pregunta cu el a manda pa minister Gerlien Croes un siman pasa relaciona cu su bishita di trabou na Hulanda for di 9 te cu 15 di juni. E parlamentario, a remarca cu ya un siman a pasa, mientras cu den su carta el a pidi contesta dentro di dos siman, pero te ainda no a ricibi ningun contesta.
Den su carta di fecha 16 di juni 2025 parlamentario Wever-Croes a indica cu fraccion MEP a tuma nota di e mandatario su bishita di trabou pa Hulanda for di 9 te 15 di juni 2025, den e marco di bishita di conocemento y bishita di trabou relaciona cu Relacionnan di Reino y Enseñansa.
El a remarca cu sinembargo, den parlamento y tambe den opinion publico tin hopi critica riba e naturalesa y utilidad di e bishita aki, particularmente pa falta di acuerdo concreto cu minister nobo of miembro di Parlamento Hulandes.
Pa motibo di transparencia y rindimento di cuenta pa e comunidad, e parlamentario a pidi minister Croes pa urgentemente contesta e preguntanan cu nan a manda por escrito.
Parlamentario Wever-Croes a puntra e mandatario si por entrega un relato detaya di su bishita pa Hulanda di 9 te 15 di juni 2025, incluyendo un resumen di tur luga cu a ser bishita, e personanan cu ken el a papia, y e fecha y ora di esaki.
Wever-Croes a puntra tambe cual tabata e cantidad exacto di e delegacion cu a compaña e minister den e bishita aki, incluyendo nomber y funcion di tur e participantenan, como tambe miembro di prensa.
E lider di fraccion MEP a puntra minister Croes si e por presenta un resumen specifica di tur gasto cu a ser haci durante e bishita aki, cual el a pidi pa inclui informacion tocante gasto di biahe, pa persona y total; gasto di estadia, anochinan di hotel pa persona y total; gasto di transporte local, transporte, taxi, auto di huur; gasto di representacion, cuminda, recepcion, regalo; gasto diario pa persona y total; y otro gastonan.
Parlamentario Wever-Croes a puntra cual tabata e obhetivonan specifico di e bishita aki y te ki punto nan a ser logra. El a pidi pa duna ehempel concreto di e resultadonan logra.
Alabes el a pidi minister Croes pa splica pakico no tabatin planifica reunion cu minister Hulandes di Enseñansa y Relacionnan di Reino, cual el a indica generalmente ta esencial pa un bishita di trabou manera esun cu e mandatario a realisa.
Por ultimo e parlamentario a puntra minister Croes cual ta e resultadonan concreto y palpabel of acuerdo cu a sali for di e bishitanan di conocemento y trabou cu por tin un beneficio directo pa e sistema di Enseñansa na Aruba; y con e analisis di costo y beneficio di e bishita aki ta compara cu e situacion di presupuesto actual di Aruba y e prioridadnan di su Ministerio.
