(AP)—Lidernan di NATO a acorda riba un aumento masivo den gasto riba Defensa diaranson despues di presion for di presidente Mericano Donald Trump, y a expresa nan ‘compromiso fuerte’ pa yuda otro si un cay bao atake.
E 32 lider a haci un declaracion final di e cumbre bisando cu, “tur aliado ta compromete pa inverti 5% di GDP anualmente riba rekisitonan importante di Defensa como tambe gastonan relacion na Defensa y Seguridad pa 2035 pa asina cumpli cu nos obligacionnan colectivo y individual.”
E muestra di unidad a afirma e descripcion di secretario-general Mark Rutte cu e cumbre tabata “transformativo,” aunke el a revela division. Trump a yama e aumento riba gastamento “algo cu ningun hende a pensa lo ta posible.
Spaña ya a anuncia oficialmente cu e no por cumpli cu e meta, y otronan a expresa nan reservacion, pero e compromiso di inversion ta inclui un evaluacion di gasto na 2029—despues di e proximo eleccion presidencial na Merca—pa monitoria progreso y reevalua e menasa di seguridad cu ta bin for di Rusia.
E lidernan tambe a subraya nan “compromiso fuerte” na e garantia di seguridad colectivo di NATO—“cu un atake riba un [di nos] ta un atake riba tur.” Prome cu e cumbre, Trump a expresa su duda atrobe si Merca lo defensa su aliadonan.
“Hunto, e aliadonan a establece e fundeshi pa un NATO mas fuerte, husto y letal,” Rutte a conta reporteronan despues di presidencia e reunion na Den Haag. “Esaki lo stimula un aumento grandi den nos defensa colectivo.”
E aumento den gasto ta rekeri cada pais pa gasta biyones di dollar. Esaki ta bin mientras Merca—e contribuidor mas grandi den NATO—ta dirigi su atencion for di Europa pa enfoca riba prioridadnan di seguridad otro caminda, notablemente den e Medio Oriente y Indo-Pacifico.
Spaña a yama e meta di gastamento y deadline pa 2035 “no rasonable.” Belgica a señala cu e no lo logra tampoco, y Slovakia a bisa cu e ta reserva e derecho pa dicidi riba su mesun gasto di defensa.
Prome minister Pedro Sánchez a para na banda di otro lidernan den e potret di e cumbre. Despues di e reunion, el a bisa cu Spaña por ehecuta plannan di defensa di NATO por medio di gasta solamente 2% di su GDP riba Defensa.
“Den e cumbre di awe, NATO ta gana y Spaña ta gana algo importante pa nos sociedad, cual ta seguridad y e estado di bienestar,” Sánchez a bisa.
Hunto cu Spaña, hopi pais Europeo ta enfrenta retonan economico grandi, y e guera di tarifa di Trump ta hacie mas dificil ainda pa aliadonan di Merca yega na nan meta. Algun pais ya ta poniendo presion riba gastamento pa bienestar y ayudo den exterior pa aloca fondo extra den nan presupuesto militar.
