OM a informa De Meza si ta sospechoso

Ayera Corte a duna veredicto den e caso cu parlamentario Mike de Meza (AVP) a entama contra Ministerio Publico, pa forsa OM bisa De Meza si e ta sospechoso den un caso, y kico e acusacion ta. Segun OM a informa den un comunicado di prensa, a cumpli cu e decision di hues mesora.

“Formador no ta propone un candidato si ta sospechoso den caso criminal andando”

Despues di e prome audiencia di e caso di De Meza contra OM den corte siman pasa, Bon Dia Aruba a puntra De Meza kico esaki ta nifica pa su nombramento como minister.
“Ami ta bringa e acusacionnan aparentemente cu tin of no tin contra mi. E camindanan ey mi ta cana,” el a contesta. “E nombramento di minister cu eseynan ta den man di prome minister [Mike Eman]. No ta den mi man,” confirmando un biaha mas cu e decision ta den man di prome minister.

Tocante e nombramento como minister, e vonnis di e caso ta menciona cu “prome cu nombramento” como minister, “Procurador General ta haci un investigacion hudicial. Den e contexto ey, PG ta duna un declaracion indicando si e candidato ta of tabata sospechoso den un investigacion criminal andando of conclui, a menos cu interes di e investigacion opone esaki. E formador no ta propone un candidato pa nombramento si e candidato ta sospechoso den un caso criminal andando.”

Den un carta fecha 5 di juni ultimo, abogado di De Meza a manda un e-mail na OM declarando cu “a haci un declaracion cu ta haciendo screening di Sr. De Meza pasobra supuestamente e ta involucra den un caso criminal, y cu a duna un declaracion relevante.” Aki, OM a contesta cu “asina cu e investigacion permiti, OM ta bay tuma contacto” cu e abogado y su cliente. Dia 9 di juni abogado di Meza a e-mail solicitando informacion riba di kico ta sospecha De Meza.

Di su banda, De Meza a pidi hues pa duna orden na OM pa inmediatamente inform’e di e naturalesa y motibo di e acusacionnan contra su persona, argumentando cu keda marca como sospechoso pa OM ta dun’e derecho pa keda informa mesora di e cargonan den su contra. Nenga di duna e informacion ta viola Articulo 6 di Comision Europeo di Derechonan Humano (ECHR) y legislacion relaciona. E situacion actual ta afecta su reputacion personal y politico y ta crea intrankilidad publico, De Meza a argumenta.

Tin cargo contra De Meza?

OM a argumenta cu mester rechasa e definicion, declarando cu no tin ningun “cargo” contra De Meza manera defini den ECHR of legislacion similar, y cu apenas e investigacion a cuminsa y no a tuma un decision tocante persecucion legal ainda.

Den su evaluacion, hues a evalua si tin un “cargo” contra De Meza segun e definicion di Articulo 6 di EHCR, Articulo I.6 di Constitucion di Aruba, y Directiva 2012/13 di UE tocante e derecho pa informacion riba proceduranan criminal, cu ta otorga “cualkier persona acusa di un ofensa criminal” cierto “derecho minimo” cu ta inclui informacion rapido tocante e naturalesa y causa di e acusacion den su contra.

Corte mester a determina si De Meza actualmente ta parti den un proceso hudicial. Segun hudisprudencia di ECHR, esaki ta inclui no solamente aviso oficial sino tambe medidanan implicando cu e persona ta sospecha di a comete un crimen.

Mientras cu De Meza a argumenta cu ya el a keda “acusa” y tin derecho di keda informa di e sospecho cu tin den su contra, corte a haya cu no por asumi y validez factual di esaki. OM a declara cu no por duna comentario pa motibo di obligacionnan di confidencialidad segun Articulo 23 di LIM, di cual su violacion ta castigable, y p’esey na e momento no a ni confirma ni rechasa e declaracion di De Meza.

Corte tabata di acuerdo cu, hasta si loke De Meza a bisa ta berdad, declaracionnan confidencial haci na prome minister tabata solamente pa informa e formador, y no tabatin intencion pa inicia e proceso penal contra De Meza. Esaki ta den linea cu e declaracion di OM cu no a tuma decision pa cuminsa e proceso penal ainda. Y mientras cu De Meza a argumenta cu e comunicacion di prome minister na su persona mester keda interpreta como un acusacion, corte no tabata di acuerdo cu esaki.

Balansa di prioridad
Segun corte, si no tin un “cargo” contra De Meza manera defini den Articulo 6 di ECHR, e ora ta keda na discrecion di OM si ta informa un persona, of na ki momento, si ta un sospechoso. Ley ta limita esaki na casonan dia resto of prome cu e prome audiencia di polis, segun Codigo di Procedura Criminal.

Corte a agrega cu accionnan investigativo y penal mester balansa interesnan di manera husto. Revision hudicial ta aplica pa determina si a eherce discrecion rasonablemente. Si no, e por señala un desviacion di politica. Corte a haya cu e caso aki mester a duna atencion na e existencia di sospecha y su consecuencia publico, specialmente ya cu por afecta e futuro politico di De Meza. Tambe a considera cu e circunstancianan inusual ta hustifica claridad a corto plaso tocante si De Meza ta sospechoso den un caso criminal andando.

Na mes momento, mester duna OM tempo pa investiga dilitentemente prome cu dicidi si ta bay cuminsa un proceso penal. Pa e motibo aki, hues a conclui cu no por a sostene e posicion di OM den no informa De Meza.

Mester informa De Meza si ta sospechoso
Basa riba e consideracionnan menciona ariba, corte a duna orden na OM pa informa De Meza por escrito, dentro di 14 dia, si e ta sospechoso den un investigacion andando, y si ta asina, di ki ofensa criminal e ta ser sospecha, incluyendo number di articulo y/of cualificacion legal. Tambe a duna orden pa aplica e decision aki inmediatamente, hasta si bin un apelacion.

Den un comunicado di prensa, OM a reacciona bisando cu Ministerio Publico a cumpli cu e decision di Huez di 25 di juni 2025 den e caso sumario di señor De Meza. “Ministerio Publico a informa señor De Meza den un carta si e ta/no ta sospechoso den un investigacion cu ta andando y di cual articulo den Ley ta trata. Huez a rechasa e peticion di señor De Meza pa duna Ministerio Publico ordo pa pone na haltura di e naturalesa y motibo di e acusacionnan contra dje. A consecuencia Ministerio Publico no a duna ningun declaracion tocante esaki tampoco na señor De Meza,” OM a skirbi.

Tocante e caso mes, OM a bisa cu “mescos cu Ministerio Publico, Huez ta di opinion cu ciudadanonan cu ta wordo sospecha di a comete un hecho castigable, normalmente tin derecho na informacion solamente na momento cu nan wordo informa cu nan ta sospechoso ora nan ta wordo deteni, interoga of invita pa interogacion. Esey no ta e caso aki.”

Ademas, OM a bisa cu “na ningun momento Ministerio Publico a bisa señor De Meza cu e ta sospechoso.

P’esey Ministerio Publico no ta obliga pa informa señor De Meza ainda.”

Sinembargo, Huez a determina cu den caso di señor De Meza, por papia di circunstancianan excepcional y di peso, door cu e ta un candidato pa minister. P’esey Huez a dicidi cu den e caso specifico aki, Ministerio Publico mester informa señor De Meza dentro di 14 dia si e ta sospechoso den un investigacion cu tin andando y, si ta asina, den cua articulo den ley e sospecho contra dje ta basa.

No obstante, Huez a determina tambe cu Ministerio Publico no ta obliga pa revela e naturalesa exacto, ni e motibo di e sospecha, manera señor De Meza a pidi den e kort geding.

Formador mester tuma decision
Mientras cu cualkier sospecho contra De Meza ta algo cu manera e mes a bisa, e lo mester bringa su mes, su nombramento como minister ta keda, manera semper, den man di formador. Prome minister ta esun cu mester tuma un decision awo pa nombra De Meza como minister, y ta e ta esun cu sa precies si De Meza ta sospechoso den un caso, y si ta asina, cu no por nombr’e. Entre tanto, prome minister Eman mes no a duna un declaracion den e caso.