Defensa di Region Caribe a comparti e siman aki algun imagen di militarnan di Aruba participando den training hunto cu militarnan di Corsou.
“Mas cu 90 militar Caribense di Aruba y Corsou ta practicando infiltracion tactico, patruya di reconnaissance, ehercicio di tiramento y prestacion den areanan urbano,” a informa riba pagina di Facebook di Defensie Caribisch Gebied. Segun e comunicado, e ehercicionan ta tumando lugar na Wacawa, Ascension y Playa Santa Cruz na Corsou.
Manera a informa anteriormente, e mas di 90 militar Caribense ta participando den ehercicio ‘Caribbean Strike’ na Corsou. Caribbean Strike ta parti di e desaroyo profesional di ehercito di Caribe. Door di train intensivamente den escenarionan realistico, e preparacion y capacidad pa keda desplega di tanto e unidadnan di Aruba como di Corsou ta keda reforsa. Ehercicionan manera esaki ta esencial pa prepara e militarnan optimalmente pa nan tareanan na e paisnan, incluyendo duna asistencia den evento di crisis of calamidad.
