(AP) — Decenas di reciclador Colombiano a inunda e Plaza Bolivar iconico di Bogota cu alrededor di 15 ton di producto reciclable riba diamars, pa protesta un reduccion den entrada y condicionnan mas dificil pa esnan cu ta colecta desperdicio. Nan ta colecta desperdicio for di hogar, fabrica y oficina y ta bende esakinan na plantanan local di recliclahe.
E manifestacion tabata organisa pa 14 asociacion di pikidor di desperdicio na Bogota, un ciudad unda aproximadamente 20mil pikidor di desperdicio ta traha oranan largo colectando articulo manera boter di plastic, metal y caha di carton.
Alrededor di 100 reciclador a reuni y algun a pretende di landa entre e seronan di desperdicio.
“Nos kier pa fabricanan paga nos un prijs husto pa e materialnan cu nos ta colecta,” segun Nohra Padilla, presidente di Asociacion Nacional di Pikidornan di Desperdicio di Colombia. “Colombianonan y nan gobierno mester realisa cu sin nos trabao, e dumpnan lo ta satura.”
Mayoria di reciclador na Colombia ta traha independientemente, lastrando garoshinan pisa y colectando articulo reciclable cu no ta ser colecta pa truck di sushi local. E trucknan, cu ta maneha pa contratista of gobiernonan municipal, ta enfoca riba colecta desperdicio organico of no-reciclable.
Entrada di e recicladornan aki ta depende en gran parti riba con hopi kilo di plastic, carton of metal nan por bende cada dia na bodega of asociacionnan local, cu ta bende e material na plantanan di reciclahe.
Jorge Ospina, presidente di asociacion di pikidor di desperdicio ARAUS, a bisa cu durante ultimo dos luna e prijs cu su asociacion ta ricibi di plantanan di reciclahe pa cada kilogram di plastic a baha di como 75 cen di dollar Mericano, na 50 cen. El a bisa cu nan por afford pa paga na e pikidornan apenas 25 cen pa kilo di plastic cu nan trece na e bodega ARAUS na Bogota.
Ospina a bisa cu importacion di plastic fresco for di paisnan manera China por ta tras di e caida skerpi den prijs. “Nos mester mas regulacion di gobierno,” el a bisa, advertiendo cu si prijs sigui baha, e pikidornan por no ta motiva mas pa colecta productonan reciclable, y e dumpnan na Colombia lo “inunda.”
Constitucion Colombiano ta protege colectornan di desperdicio, cu hopi biaha ta bin di backgroundnan di menos recurso. E pikidornan di sushi aki ta ricibi prioridad riba contratistanan grandi ora ta trata di colecta productonan reciclable y den ciudadnan grandi, gobiernonan municipal ta obliga di paga un tarifa mensual na asociacionnan di pikidornan di desperdicio, cu ta varia segun con hopi ton di desperdicio cada asociacion ta colecta.
Pero prijs pa desperdicio reciclable ta instabiel, y pikidornan di desperdicio Colombiano tambe ta enfrenta cada bes mas competencia di migrantenan Venezolano cu ta haciendo e mesun tipo di trabao na ciudadnan manera Bogota y Medellin.
Recicladornan na Colombia ta gana usualmente menos cu e salario minimo nacional di $350 pa luna.
