Durante un conferencia di prensa recien lider di fraccion PPA parlamentario Otmar Oduber a papia tocante algun reunion cu miembronan di parlamento tabatin. Un di nan tabata e reunion cu nan tabatin cu un comision di Tweede Kamer cu ta enfoca riba e topico di eleccionnan di Union Europeo.

Parlamentario Oduber a splica cu diamars nan a reuni cu e comision cu ta bezig ta traha un rapport na e momentonan aki di Union Europeo pa loke ta trata miembronan di Tweede Kamer na Hulanda, particularmente relaciona cu e eleccion di Union Europeo.

Manera ta conoci ciudadanonan cu nacionalidad Hulandes na Aruba tin derecho pa vota den eleccionnan di Union Europeo, pero segune parlamentario a indica e miembronan di e comision di Tweede Kamer ta haya cu e animo y interes na Aruba pa vota den e eleccion aki ta hopi abou. Pa motibo ey a comision permanente aki a ser forma pa asina hunto cu e parlamentonan di Aruba, Corsou, Sint Maarten y islanan BES mira con por haci esaki mas proactivo

Oduber a splica cu durante e reunion aki fraccion di PPA su pensamento tabata hopi cla pa loke ta trata e relacion y a mustra riba e hecho cu tanten cu no atende cu temanan cu ta di importancia pa e comundiad di Aruba, of di isla of pais cu nan ta spera cu ta bay vota pa e eleccion di Union Europeo, nan no ta bay haya e mesun interes cu nan ta haya talbes na paisnan mas cerca di Europa y Hulanda.

El a indica cu pa cu esaki fraccion PPA a contribui na un forma grandi caminda nan a mustra cu e prome caminda cu mester cuminsa ta respetando mutuamente e parlamentonan di e diferente isla y paisnan.

“Nos ta un parti di Reino den e parti Caribense y mi ta kere cu ta importante pa bo haya atencion di aki banda pa por vota en berdad pa loke ta trata eleccionnan Europeo ta pabo pone agendanan cu ta atrae e atencion di e comunidad di Aruba. aki ta caminda nos a papia y lansa e pensamento y idea cu no solamente kico Europa ta nifica pa Aruba, pero kico Aruba por nifica pa Europa tambe,” el a remarca.

Parlamentario Oduber a splica cu for di fraccion PPA nan ta mira cu Aruba facilmente por bira un centro di excelencia Europeo den e area Caribense. El a sigui splica cu varios pais di Europa ta haci hopi negoshi cu por ehempel Venezuela, Colombia, paisnan den Centro America y hasta Merca y hopi biaha nan ta bula pasa over di un isla cu ta forma parti di Hulanda y cu por lo tanto ta forma parti di Union Eurpeo.

E parlamentario a remarca cu e idea aki a cay den masha bon tera cerca e miembronan di Tweede Kamer cu nan a reuni cune via skype. El a agrega cu esaki tambe lo bay den e rapportage cu ta bay ser traha y manda na e nivelnan mas halto caminda cu a pone e pensamento y idea pa usa e cooperacion cu tin pa crea un centro caminda cu companinan, no solamente di Hulanda, pero di Europa por establece na Aruba, bira un centro di negoshi y comercio pa e representacion den e area aki.

“Nos ta positivo den dje, cu tur e conocemento, convencion, seminarionan cu por tin aki pa cu e parti Europeo tegenover e parti di Centro America Sur y Norte America y el a cay den masha bon tera,” el a agrega.

Oduber a splica tambe cu proximamente fraccion PPA lo ta biahandp na Den Haag caminda nan lo tin un encuentro cu coleganan den Tweede Kamer y otro instancianan na Huland pa presenta tambe dos otro pensamento y/of idea cu tambe a nace di e mesun idea cu nan a presenta na e miembronan di e comision di Tweede Kamer.

Un di e ideanan ta enfoca riba e importancia di e estudio pa e hobennan cu ta na Hulanda. El a indica cu durante e reunion fraccion PPA a mustra riba e hecho cu tin un cantidad grandi, di tres mil pa cuater mil studiante cu normalemnte ta biba na Hulanda durante un perido di cuater pa seis aña pa caba nan estudio.

El a remarca cu un forma cu di berdad por hala atencion di e comunidad local ta si di berdad nan por duna atencion na yamadonan cu nan ta haci como fraccion PPA pa por hempel e peticion cu nan tin pa loke ta trata e studielening local y DUO. Relaciona particularmente cu DUO el a indica cu e peticion ta inclui pa den cierto momento ora un studiante caba su estudio e por haya cinco aña di break, cu e no mester pag’e pa e por bin back Aruba.

“Na Hulanda ta paga e estudio den euro, na Aruba ora nan bin back nan ta gana e salario na florin y hopi biaha e ta obstaculo pa e hoben. Hopi biaha nan no kier ni bin Aruba pasobra nan ta hay’e cu e tin cu paga studielening, paga DUO na euro, siendo cu e ta gana na florin e no por traha un cas, no por casa. Tin hopi obctaculonan cu nos ta sinti cu den e relacion aki cu Europa por pone atencion,” Oduber a enfatisa.

El a agrega cu mescos ta conta pa e parti di cuido medico. El a indica cu hopi biaha di Aruba ta manda pashentnan den region aki banda siendo cu si tin areglonan pa loke ta trata cuido medico na Europa, Hulanda particularmente, cual el a señala ta combini tambe pa e prijs e calidad di salud tambe cu e pashent por haya cu ta superior.

“Cu e tipo di atencion aki bo ta haya pa e comunidad Arubiano por bay inscribi y participa na e eleccionnan cu ta bay tin un algo positivo, cu tin algo cu ta toca na momdnto cu tin e eleccion aki. Como Aruba nos mester haci uso di dje. PPA tin tres proposicion concreto cu a ser lansa y cu a ser bon acepta den e reunionnan aki,” el a subraya.

Por ultimo el a remarca cu durante su biahe cu lo tuma luga proximamente pa Hulanda e lo combersa mas di cerca cu e coleganan y intercambia mas informacion tocante e formanan cu por tin pa cooperacion cu otro y crea e vinculo denrto di Reino na un forma mas efectivo y mas eficiente cu ta posibel.

ulada y cu porlo t anto ta forma di Union Eurpeo Union Eurpeo. e ida aki a cay den bon tera cerca e mimebronan di Tweedede KAmer cu a ruenio cu ne