Recientemente lider di fraccion MEP parlamentario Evelyn Wever-Croes a manda peticion pa presidente di Parlamento di Aruba, Marlon Sneek, pa yama un reunion publico y yama prome minister Mike Eman den parlamento pa duna cuenta tocante e situacion di candidato pa minister Mike de Meza. Esaki ta bira e di dos peticion cu fraccion MEP ta manda pa yama un reunion publico, pero te ainda no a haya contesta riba nan peticion.

Mediante un publicacion riba su pagina di Facebook e parlamentario, y ex prome minister, a informa cu den un carta fecha 25 di juni fraccion MEP a bolbe pidi presidente di parlamento pa convoca un reunion publico den parlamento cu caracter di urgencia. Dia 16 di juni 2025 ya fraccion MEP a haci e peticion, pero no a haya contesta riba nan peticion.

Den e carta, firma pa e lider di fraccion MEP y miembronan di e fraccion parlamentarionan Rocco Tjon y Edgard Vrolijk, e parlamentarionan ta indica cu a pesar cu nan no a ricibi un contesta riba nan peticion anterior, desaroyonan relevante y preocupante ta sigui sucede pa loke ta trata e nominacion di De Meza.

Refiriendo na e sentencia cu Corte di Prome Instancia di diaranson ultimo, 25 di juni, a dicta den e procedemento sumario cu De Meza a trece dilanti contra Ministerio Publico (OM), e parlamentarionan ta señala cu hues a dicta cu tabatin circunstancianan excepcional y convenciendo, mirando De Meza su candidatura como minister, y a ordena OM pa dentro di 14 dia informa De Meza riba su posibel status como sospechoso.

Ministerio Publico di su banda a cumpli mesora cu e decision di corte y a informa De Meza dentro di un ora di e decision.

E desaroyonan aki, nan ta remarca, ta confirma cu tin preguntanan hustifica tocante e evaluacion di integridad di De Meza y ta enfatisa e importancia di transparencia pa cu e parlamento y sociedad. Te cu awor, e fraccion a indica, parlamento no a ser informa oficialmente tocante e consideracion y accionnan di e prome minister den e asunto aki.

Pa e motibo ey fraccion MEP ta considera ta necesario pa e reunion publico cu nan a pidi anteriormente tuma luga mas pronto posibel cu e siguiente punto riba agenda: “Informacion suministra door di prome minister, Mike Eman, pa loke ta trata nominacion di Mike de Meza como minister den Gabinete AVP-FUTURO.”

E parlamentarionan di MEP ta pidi presidente di parlamento pa invita prome minister pa duna transparencia durante e reunion aki riba e status di e nominacion di De Meza; e motibonan dicon e proposicion ainda no a ser someti formalmente; e resultado di e evaluacion segun e Ordenansa Nacional pa Integridad (di candidato) pa ministernan; e importancia di e desaroyonan reciente pa su candidatura; y e siguiente paso cu e gabinete ta planea tuma pa por yega na un gobierno completo.

Den su publicacion Wever-Croes ta enfatisa cu eleccion a tuma luga casi siete luna pasa y un parti di gobierno a huramenta tres luna pasa, pero te ainda gobierno no ta completo pa motibo di e situacion cu tin andando cu e nominacion di De Meza.

“Nos fraccion a manda un di dos peticion pa yama prome minister Mike Eman den parlamento pa e duna cuenta, y principalmente pa splica parlamento kico e ta bay haci awor pa Aruba haya un gobierno completo. Lamentablemente te cu awe e prome minister aki a mustra cu e tin miedo di bin parlamento. Mi no ta compronde con un hende cu a lucha pa bira e lider di e pais aki, ta core pa su responsabilidad como lider. Nos ta cumpli cu nos trabou den Parlamento y nos ta spera cu demas fraccionnan tambe sostene esaki,” el a indica den su publicacion.

E caso

Den e caso cu el a entama contra OM, parlamentario y candidato pa minister Mike de Meza a pidi hues pa duna orden na OM pa inmediatamente inform’e di e naturalesa y motibo di e acusacionnan contra su persona, argumentando cu keda marca como sospechoso pa OM ta dun’e derecho pa keda informa mesora di e cargonan den su contra. Nenga di duna e informacion ta viola Articulo 6 di Comision Europeo di Derechonan Humano (ECHR) y legislacion relaciona. E situacion actual ta afecta su reputacion personal y politico y ta crea intrankilidad publico, De Meza a argumenta.

OM a argumenta cu mester rechasa e definicion, declarando cu no tin ningun “cargo” contra De Meza manera defini den ECHR of legislacion similar, y cu apenas e investigacion a cuminsa y no a tuma un decision tocante persecucion legal ainda.

Basa riba e argumentonan presenta corte a duna orden na OM pa informa De Meza por escrito, dentro di 14 dia, si e ta sospechoso den un investigacion andando, y si ta asina, di ki ofensa criminal e ta ser sospecha, incluyendo number di articulo y/of cualificacion legal. Tambe a duna orden pa aplica e decision aki inmediatamente, hasta si bin un apelacion.

E mesun dia OM a reacciona bisando cu Ministerio Publico a cumpli cu e decision di Huez di 25 di juni 2025 den e caso sumario di señor De Meza.

Tocante e caso mes, OM a bisa cu “mescos cu Ministerio Publico, Huez ta di opinion cu ciudadanonan cu ta wordo sospecha di a comete un hecho castigable, normalmente tin derecho na informacion solamente na momento cu nan wordo informa cu nan ta sospechoso ora nan ta wordo deteni, interoga of invita pa interogacion. Esey no ta e caso aki.”

“Ministerio Publico a informa señor De Meza den un carta si e ta/no ta sospechoso den un investigacion cu ta andando y di cual articulo den Ley ta trata. Hues a rechasa e peticion di señor De Meza pa duna Ministerio Publico ordo pa pone na haltura di e naturalesa y motibo di e acusacionnan contra dje. A consecuencia Ministerio Publico no a duna ningun declaracion tocante esaki tampoco na señor De Meza,” OM a skirbi.

Ademas, OM a bisa cu “na ningun momento Ministerio Publico a bisa señor De Meza cu e ta sospechoso. P’esey Ministerio Publico no ta obliga pa informa señor De Meza ainda.”

Despues di e prome audiencia di e caso di De Meza contra OM den corte siman pasa, contestando pregunta di Bon Dia Aruba De Meza a declara cu e ta bay bringa e acusacionnan aparentemente cu tin of no tin den su contra.

“E camindanan ey mi ta cana. E nombramento di minister cu eseynan ta den man di prome minister [Mike Eman]. No ta den mi man,” confirmando asina un biaha mas cu e decision ta den man di prome minister.

Mientras cu cualkier sospecho contra De Meza ta algo cu manera e mes a bisa, e lo mester bringa su mes, su nombramento como minister ta keda, manera semper, den man di formador. Prome minister ta esun cu mester tuma un decision awo pa nombra De Meza como minister, y ta e ta esun cu sa precies si De Meza ta sospechoso den un caso, y si ta asina, cu no por nombr’e. Entre tanto, prome minister Eman mes no a duna un declaracion den e caso.