Den nos delaster columna nos a indica cu e prijs di Crude Oil riba mercado internacional ta Aruba su vulnerabilidad di mas grandi, esta directo pa inflacion y pa nos Reserva Monetario. Pasobra Bureau Financien y Bureau Economische Zaken mas y mas ta parce un kleuterschool di adulto cu ta ricibi pago di mas, mi ta haci mi deber pa bin cu un plan di emergencia pa Aruba. Esaki lo ta e prome columna den e serie aki, pa salvaguardia Aruba pa e binidero’ stagflation global’ (cu eigenlijk a yega caba). Dus nos ta un poco laat den e respecto ey.

Den e articulo aki nos lo ilustra y elabora riba e plan pa duna tur cas na Aruba panel solar dentro di 2 aña y dicon esaki lo ta esencial pa mitiga un crisis den reserva monetario si en berdad mundo drenta “Stagflation”.

Na prome luga nos ta wak cu instalacion di panel solar usando e prijs di 25.000,- florin all-in, ta resulta den un Levelized Cost of Energy (LCOE) di mas-o-menos 5.7 cen di dollar pa KwH, lokel ta 70+% mas abou cu e tarifa actual di Elmar. Inflacion tin dos banda, si por baha e prijs averahe di coriente cu 50 of te hasta 70%, e spillovers positivo lo ta masivo mes pa nos economia local.

Den mi modelo avansa, nos ta wak cu e gasto mas grandi di instala un sistema di 10kwp pa un hogar ta asocia cu gasto di instalacion di e panel solar. Dus e punto cardinal ta pa bin cu subsidio enfoca directamente riba instalacion di panel solar. Ban bisa den rumbo di 5.000,- florin, combina esaki cu prestamo sin interes pa famianan di menos recurso. Tambe mester bin un mobilisacion grandi di duna entrenamento na trahador pa bira instalador di panel solar. Dus un ‘omscholing crash course’ pa train mas hopi instalador di panel solar cu ta posible.

Pa cu esaki por usa trahador di Elmar N.V. como pool di trahador, door cu ban ta honesto, den 10 pa 20 aña door di e Revolucion den Energia Solar cu ya caba ta 70% mas barata cu e tarifa di Elmar, e empresa estatal aki no lo tin derecho di existencia. Ban djis admiti e berdad obvio, mester bin un transformacion radical den e empresa estatal aki, y convertie den algo mas positivo, esta empodera y duna tur cas na Aruba panel solar mas pronto cu ta posible.

E razon strategico mas grandi pa esaki ta cu cada hogar cu pone panel solar ta spaar den curso di 25 aña mas cu 80 galon di crudo, segun mi modelo y calculacion. Esaki lo reduci nos vulnerabilidad na Crude Oil y su efectonan sumamente negativo pa nos inflacion y Reserva Monetario.

Awo ta keda na nos lidernan politico pa mustra “liderazgo berdadero” den e vooravond di crisis.
E pregunta cardinal: Lo sigui cu e modelo bieu di tene un empresa estatal na bida artificialmente? Of lo duna tur cas na Aruba panel solar y asina baha inflacion masivamente y den 1 klap reduci nos vulnerabilidad den Balance of Payments.

Ta ora pa liderazgo berdadero, si nos kier sobrevivi como Pais riba plazo strategico.