Kico supervision… A trece pa nos…?

Den un edicion reciente nos a publica tocante e critica di e parlamentario di partido PPA riba e colegio supervisor CAft. Nos ta di acuerdo cu el a trece e topico di consecuencia di e intensificacion di e supervision financiero di Reino durante e crisis di Covid.Esaki sigur ta comparti pa bastante hende, pero ta refleha solamente parti di loke a transcuri den e añanan anterior.

En principio e hechonan di e tempo ey, aña 2020, ta mustra na fabor di su interpretacion di e situacion, pero tabatin algo mas. No tabatin cierto mal intencion di banda Hulandes, y tampoco di e colegio di supervision CAft, pa haci daño na Aruba, segun nos opinion. E reaccion Hulandes den e crisis, na momento cu Aruba y e otro islanan tabatin mester ayudo urgente, nan a duna esey. Pero tambe tabata inimaginable cu Hulanda ta sinta papia tocante e ayudo necesario y no ta bisa nada tocante e situacion financiero malo cu Aruba tabata aden caba, sin e crisis cu a bin ‘corona obra’. Gobierno di Reino, domina pa gobierno Hulandes, lo tabata un mal protector di interes di e islanan si nan a simplemente duna e islanan tur ayudo necesario, sin ningun gesto en cambio pa haya un compromiso pa cambio positivo den e mal maneho cu nos isla tabata hiba pa varios aña, loke a contribui grandemente na e situacion financiero critico cu a conduci na e intervencion Hulandes na 2014 y 2015. Eparlamentario mes tabata ministro durante e gabinete 2009 – 2013 y parcialmente e siguiente gabinete tambe, cu a para na cuna di e abismo financiero cu a conduci na e intervencion Hulandes.

Y kico tabata e situacion na 2020? Cu realmente e avancenan proyecta riba tereno di mehoracion di e maneho financiero no tabata di gaba. Cambio di gobierno na 2017 a resulta den un proceso dificil di negociacion, cu a resulta den un protocol, cu na algun ocasion clave a topa cu intento di sabotahe den parlamento, evitando modificacion di e ley di supervision financiero segun e acuerdo di e protocol. Esey tabata e ambiente na 2019, y poco despues Covid a asalta nos. Anto ta haya straño cu Hulanda, mejor dicho gobierno di Reino, ta bisa: “Shonnan, nos ta yuda, pero nos kier pa boso asumi responsabilidad tambe. Cu e crisis a gara boso na mal momento ta pasobra boso no ta prepara di ningun manera pa cualkier crisis.” Inmediatamente nan insistencia den kier mira accion di banda di Aruba pa mehora gobernacion, no pa bon di e politiconan mes, sino pa bienestar general, ta topa cu resistencia fuerte. Den cierto caso e resistencia tabata hustifica, manera den e asunto di recorte den presupuesto di AZV, cu no tabata na beneficio di pueblo. Sin embargo, mester reconoce cu e resistencia a bira mas general, hasta di tal forma cu cinco aña despues di e promer acuerdo, ainda nos no ta mira mucho di e reformanan cu nos politiconan tin tanto aña ta delibera cu Hulanda. Loke a bira obvio ta cu hopi politico sa masha bon kico ta nan propio interes y kico ta interes general, pero semper ta pone e interes propio como prioridady ta scoge un tipo di ‘delay tactics’ ora ta trata di reforma cu cual nan mester bay di acuerdo pa vista publico, pero nan actuacion despues ta mustra cu realmente, si ta pa nan, e reformanan ey por wel di keda sin implementacion.Loke nan no ta haci ta bisa e Hulandesnan den nan cara cu nan no ta apoya e reformanan, e rumbo ey nan no kier tuma.

Kico tur esey ta significa pa nos situacion awe? Nos no sa si e politiconan ta lesa e reportahe di ehecucion di e Landspakket, pa mira con poco poco e asuntonan aki, cu cual supuestamente mayoria di politico ta di acuerdo, ta move a traves di tempo. Ban tuma por ehemplo e reforma fiscal, cu a keda pega riba un di e asuntonan clave: e introduccion di BTW. Nos ta tende politico ta conta pueblo cu esey lo ta un bon idea, pasobra e ta e mihor instrumento contra inflacion? Contrario na e BBO, cu acumulacion di porcentahe den cada link di e cadena comercial?Nos ta tende o mira politico ta cuestiona gobierno riba e avance, o mas bien e falta di avance den e reformanan aki? No, talvez hopi ta considera esey mas bien ‘mahamento’ di e Hulandesnan, cu publicamente bo ta obliga di alaba como tremendo idea, basta bo no mester yega na implementa?

Por ultimo, pakico ataca e ‘mensahero’ den e asunto aki? Ta gobierno di Reino a institui e organo supervisor, cu ta nan consehero y di gobierno di Aruba tambe, gusta o laga. Nan papel no ta pa cera amistad, sino duna nan opinion profesional. Esey ta habri caminda pa debate, pasobra no semper nan tin razon. Pero esun cu ta desea di critica mester bin cu argumento bon sustenta pa hecho concreto. Ademas, laga nos papia di kico supervision financiero a trece. Antes, te cu e supervision a cuminza, nos apenas tabata haya cifra di operacion financiero gubernamental pa mira. Sinta warda henter aña riba dato sumario no ta suficiente mas den e era actual. Unda nos lo ta sin e informe trimestral cu gobierno ta obliga di traha? A dura basta tempo pa nos libera di e intentonan gubernamental pa no duna parlamentario inmediatamente e reportenan aki, cu ta e mihor aporte na e famoso ‘transparencia’ cu nos a mira te awe.