Recientemente na mesa di redaccion di Bon Dia Aruba a yega un carta anonimo di parti di un grupo di mayor di Colegio Arubano den cual nan ta presenta diferente punto di preocupacion tocante e maneho y situacion actual di e scol. E grupo di mayor ta hopi preocupa y ta pidi entre otro un investigacion riba e maneho di e directiva actual di e scol.
E grupo di mayor di studiantenan di Colegio Arubano HAVO/VWO a expresa den nan carta cu nan sinti hopi preocupa cu e rumbo cu e scol a y ta tuma durante e ultimo añanan. Nan ta indica cu varios di nan mes ta ex-studiantenan di e scol, y tin un lazo profundo emocional cu e institucion. Pero lamentablemente, e situacion actual ta motiva nan pa haci un yamado urgente pa atencion y accion pa e situacion cu tin na e scol.
Manera ta conoci Sr. Tim Croes a entrega su retiro como rector di Colegio Arubano y desde januari di e aña aki e scol no tin un rector nobo. E grupo di mayor ta indica den nan carta cu, segun nan a compronde, no tabatin aplicacion oficial pa e cargo di rector, y e percepcion ta cu e directiva no ta mustrando boluntad pa hiba e scol den un direccion claro, cual ta un aspecto hopi preocupante pa e mayornan.
“Nos ta sinti cu e falta di stabilidad y direccion tin un impacto directo riba e calidad di enseñansa y riba e bienestar di e empleadonan y alumnonan,” nan a enfatisa den nan carta.
Otro punto di preocupacion cu e grupo di mayor a trece dilanti ta cu for di dialogo cu docente actual y anterior, nan a tende cu tin un ambiente laboral carga y poco respeta. Nan ta splica cu e manera di liderazgo ta ser describi manera autoritario y falta di respet, cu ta provoca cu empleadonan ta sinti cu nan no ta ser balora, y cu hopi ta considera sali for di e scol.
Ademas nan ta indica cu candidatonan cu ta capacita y motiva a ser rechasa, mientras cu aparentemente e directiva ta faborece personanan cercano — cu relacion familiar, personal of profesional — pa keda den puestonan clave.
“E falta di transparencia den seleccion y nombramento ta alimenta e impresion cu nos ta deal cu un sistema di “friends and family”, caminda contacto personal ta conta mas cu experiencia y compromiso cu educacion. Esaki ta pone e futuro di e scol na riesgo, y ta debilita confiansa di mayornan, docente y studiante,” nan a enfatisa.
E grupo di mayor ta menciona den nan carta cu segun nan a compronde varios miembro cu forma parti di e directiva di Colegio Arubano tambe ta dirigi un otro fundacion escolar. Nan ta cuestiona si e dobel rol aki no ta crea un conflicto di interes y si esey no ta compromete transparencia y imparcialidad den manehonan clave.
E mayornan ta pidi un investigacion serio pa evalua e rol di esnan cu ta tin diferente puesto den diferente institucionnan educativo ya cu nan ta considera cu cada institucion educativo mester tin liderazgo cu ta presente, transparente y compromete 100% cu e bienestar di e scol specifico.
E grupo di mayor aki a indica cu nan purba papia cu instancianan manera Obispado y Ministerio di Enseñansa, pero te awor no a tuma medida concreto of logra drenta den contacto. Esaki ta conduci cu nan ta considera di cambia nan studiantenan di scol, algo cu ta tristo pa nan mirando cu varios di nan mes a gradua for di e scol aki. “Si e institucion no ta proteha nos muchanan, nos como mayornan mester tuma responsabilidad,” nan a subraya.
E grupo di mayor aki ta haci yamado pa un investigacion independiente riba e maneho di e directiva actual; transparencia den proceso di seleccion di un director nobo; un evaluacion riba e ambiente laboral den scol; y esfuerso urgente pa restaura confiansa y integridad den enseñansa.
Bon Dia Aruba a tuma contacto cu un representante na Colegio Aruba pa dirigi algun pregunta relaciona na e puntonan di preocupacion cu e grupo di mayor aki ta trece dilanti den nan carta, pero no a logra haya contacto cu un persona, particularmente considerando cu no tin un rector y no tin un persona ken directamente lo por contesta pregunta y aclaria e situacion.
Bon Dia Aruba a manda pregunta pa minister di Enseñansa, Gerlien Croes. A puntra e mandatario si e ta na altura di e situacion na Colegio Arubano y e preocupacion di varios mayor relaciona cu e maneho y rumbo di e scol. A puntra tambe si den caso cu e ta na altura, si gobierno por of tin planea pa tuma pasonan pa mehora e situacion na e scol. Pero te na momento di cierre di nos edicion no a logra haya un contesta.
Esaki no ta prome biaha cu mayornan di studiantenan di Colegio Arubano ta expresa nan preocupacion pa situacionnan cu ta sucede na e scol. Den luna di februari un email anonimo, firma pa un mayor preocupa, a yega mesa di redaccion di Bon Dia Aruba , den cual e mayor a trece dilanti un situacion cu lo mester a sucede na comiendo di aña, riba dia di parada di fakkel pa ta exacto. Segun e mayor aki a splica, e maestro di inicialnan B.F., lo a mishi/fula inadecuadamente cu un studiante.
E mayor a splica den e email cu e maestro aki ainda ta trahando na Colegio Arubano y cu no ta mira cu ta haci algo pa defende e alumnonan. Ademas a agrega cu e mesun maestro aki ta forma parti di un grupo di e scol cu lo ta biahando pa Hulanda pronto y esaki ta algo cu e, cu algun otro mayor, no ta di acuerdo cune.
Den un combersacion cu SMOA, stichting encarga cu Colegio Arubano, a splica cu di nan banda a haci investigacion y basa riba e resultadonan di dicho investigacion a duna e maestro aki e castigo cu nan a mira ta adecua, cual tabata un schorsing y warning cu ta contene medidanan estricto cu e maestro mester atende su mes na dje.
SMOA a splica cu primeramente e suceso cu ta trece dilanti no a sucede na scol, tabata pafo di scol. Ademas resultadonan di e investigacion ta indica cu ta trata di un grupo di amigo cu a dicidi cu bay hunto fakkel. Pa e motibo aki nan a tuma e medida di duna e maestro un schorsing y un warning y no retira e maestro.
Igualmente den pasado tin diferente otro situacionnan caminda cu conflictonan interno ta sali na luz y ta pone e institucion den un spotlight negativo. Conflictonan di e naturalesa aki ta daña ambiente na scol y ta afecta productividad di docente y alumno.
