Recientemente a keda publica e agenda y rapport di ehecucion (Uitvoeringsrapportage) pa e periodo di april te september 2025, tocante e implementacion di reforma cu Aruba a acorda cu Hulanda den cuadro di e landspakket. Esaki ta bira e prome pa aña 2025. Den esaki, e reforma di maneho financiero di Aruba ta para tanto como un simbolo di ambicion como un refleho di e limitenan institucional.

Aruba y Hulanda ta trahando hunto riba implementacion di e landspakket basa riba e acuerdo mutuo di cooperacion riba reforma. E pagina titular di e agenda y rapport di implementacion ta e Prikichi, designa como parha nacional di Aruba na 2017. E Prikichi ta un especie protegi y un simbolo di resiliencia Arubano. Door di colabora a base di igualdad dentro di Reino pa ehecuta e reformanan delinea den landspakket, ta reforsa e resiliencia aki, e rapport ta nota.

E agenda y rapport di implementacion ta presenta e marco pa e reformanan aki y ta midi progreso. Esaki ta simbolisa pa e potlood: e Prikichi ta cla pa pinta y sigui e lineanan. E diseño di e rapport ta inspira pa e colornan di e bandera Arubano.

Den e rapport, e vision keda cla: un gobierno cu ta den control completo di su finanzas publico, cu presupuesto transparente y eficiente, y mecanismonan di responsabilisacion. Pero toch e caminda pa logra e vision aki ta keda un dificil – marca pa retraso legislativo, atraso den contratacion publico, y bottlenecks causa pa falta di capacidad.

E agenda y rapport di implementacion ta duna un bista integral di e progreso haci te awo, y e retonan critico cu ta persisti.

Un vision pa control y coherencia
 E meta mas amplio di Aruba den maneho financiero ta pa sigura cu su ciclo presupuestario ta efectivo y orienta riba resultado, permitiendo gobierno pa ta “den control” di su finanzas. E reforma aki ta alinea cu misionnan nacional pa un sector publico eficiente y agil, y ta sostene varios di e Metanan di Desaroyo Sostenible (SDGs), notablemente 8 (Trabao Decente y Desaroyo Economico), 11 (Ciudad y Comunidadnan Sostenible), 13 (Accion di Clima) y 16 (Paz, Husticia y Institucionnan Fuerte.)

E rapport ta menciona ministerio di Finanzas y Cultura, cu tabata esun cu anteriormente tabata carga e tema aki, como responsable pa e reformanan aki. Ta menciona cu e ministerio aki, cu tabata cay bao ex-minister Xiomara Maduro (MEP), a logra varios stap fundacional. Esaki ta inclui un marco nobo di reportahe, modernisacion di procesonan presupuestario cu un voorjaarsnota (presupuesto di spring) y e introduccion di un blueprint pa e modelo di supervision financiero, conoci como modelo di tres linea.

Awo, ministerio di Finanzas ta cay bao minister Geoffrey Wever (Futuro), kende lo keda encarga cu implementacion di e reformanan acorda pa maneho financiero di Aruba.

Fundeshi legislativo y regulatorio: progreso mixto
 Un di e factornan critico pa exito den e reforma ta e arkitectura regulatorio di Aruba cu ta goberna procedura y reportahe financiero. E sistema di reportahe y legislacion di contratacion publico ambos a drenta e fase legislativo. Mas notablemente, e amienda na e ordenansa di contratacion a keda aproba unanimamente den Parlamento na februari, un logro significante.

Sinembargo, otro trayectorionan legislativo, incluyendo e revision di e ley di comptabilidad presupuestario (Comptabiliteitsverordening) y regulacionnan di maneho di activo material, ta enfrenta retraso debi na capacidad legislativo limita y un atraso di asunto pendiente. Ta spera cu esakinan lo conclui den e ultimo kwartaal di 2025 of e prome di 2026. E introduccion di un sistema comprensivo di reportahe ta programa pa e ciclo presupuestario 2026, pero ainda ta wardando su aprobacion final.

Modelo di tres linea: construyendo structura
 Un reforma sistematico mayor ta e adopcion di e ‘modelo di tres linea’ – un structura reconoci internacionalmente pa dividi responsabilidad entre operacion (prome linea), supervision (di dos linea) y siguransa independiente (di tres linea).

Trabao ta andando pa operacionalisa e modelo aki den sector publico. Ta haciendo esfuersonan dedica pa nombra y train doñonan di control y proceso den prome linea, crea consciencia y construi responsabilisacion. Sinembargo, casi cada sub-proyecto bao di e componente aki a keda retrasa pa motibo di proceduranan di contratamento mas largo di loke a spera pa consultantnan externo. Asina mes, gobierno tin meta pa implementacion completo pa fin di 2025.

Reto di capacidad y gap institucional
 Recurso humano ta keda un bottleneck serio. Por ehemplo, Servicio Central di Accounting (CAD) tin dificultad pa atrae personal cualifica. Maske e agencia a ricibi 32 aplicacion a traves di varios ronda di reclutamente, apenas a logra haci tres contratacion. Mehoracionnan leve den condicion di salario por mehora resultadonan den futuro, pero capacidad ta keda leu di ta adecuado pa cumpli cu control di responsabilidad den un sistema cada bes mas compleho.

Similarmente, e institucionalisacion mas amplio di control interno (AO/IC) dentro di ministerio di Finanzas a keda atras. Mientras diseño di proyecto ta na lugar, retraso den contrato di sosten externo a pusha mayoria di e timeline pa fin di aña.

Proceso y optimisacion di sistema: bao construccion
 Reconstrui e procesonan financiero di Aruba ta un mega-proyecto andando. E meta ta pa simplifica sistemanan di fluho di cash (specialmente pa contratacion y subsidio), sigura operacionnan standarisa, y hancra esakinan dentro di infrastructura digital.

Esaki ta inclui:

Lansa un modulo di training digital (E-LOFA);

Cuminsa proceso di destaho pa un aplicacion di sosten di presupuesto;

Evalua opcion pa reemplasa e sistema financiero central (GFS/E1);

Introduci den fase IT nobo y organisacion di maneho di informacion (IM).

Sinembargo, ehecucion a keda stroba pa e lunanan cu gobierno a keda demisionario prome cu e gobierno nobo a tuma over, pa motibo cu no por a haci cierto decision strategico, manera otorga contract. Mientras algun meta ta on track (manera e modulo E-LOFA), otronan, incluyendo e despliegue completo di e aplicacion di presupuesto, probablemente ta bay extende te mita di 2026.

Reforma di ciclo presupuestario y alineamento di politica
 Dos reforma conecta na otro tin meta pa mehora con presupuesto ta refleha prioridadnan di politica y con ta implementa y monitoria esakinan. E prome ta involucra rediseña e ciclo di planeamento y control, y e di dos ta introduci lasonan mas fuerte entre ehecucion di presupuesto y resultado di politica.

Ambos proyecto ta den fasenan inicial, cu mdoelonan di diseño entrega, y ta spera implementacion lo sigui pa fin di 2025 of comienso di 2026. Esfuersonan pa elimina atraso den reporte financiero anual (te cu 2023) ta na caminda pa keda finalisa den di tres kwartaal di 2025.

Reforma di subsidio cu cuerponan di conseho ainda pendiente
 E desaroyo di un regimen nobo di subsidio – incluyendo evaluacion di subsidionan actual, preparacion di legislacion y implementacion completo – ta keda en gran parti teoretico na e momento aki. Maske ta reconoce e necesidad y a cuminsa cu preparacion, toma di decision politico ainda no a duna ningun progreso actual.

Mescos ta aplica pa reforsa e funcionamento di e cuerponan permanente di conseho na Aruba. Mientras cu e rapport ta nota cu reformanan existente den control financiero y cumplimento indirectamente ta bay sostene e institucionnan aki, no a inicia ningun acion directo.

Na final, por nota cu e reforma di maneho financiero na Aruba ta desaroyando na un punto critico: e recuperacion economico di e isla ta exigi disciplina fiscal y transparencia, y toch limitenan institucional ta menasa di mina e momentum.

Loke ta bin dilanti den e agenda y rapport di implementacion aki ta un storia di un vision cla, progreso modera, y inercia sistemico. E proximo lunanan, y specialmente e habilidad di gobierno nobo pa tuma decision na tempo, ta bay ta clave pa determina por realisa e ambicionnan aki na nan totalidad.