Continuando cu nos serie di un Aruba ‘nature inclusive’ , Bon Dia Aruba ta compartiendo cu nos lectornan e resultadonan di e rapport ‘Aruba 2050: A Nature Inclusive Vision’—un iniciativa di Aruba Conservation Foundation y Wageningen University & Research—tocante e estado actual di nos naturalesa y con pa implementa medidanan pa asina recupera y cuida pa nos naturalesa vulnerable.

Algun siman pasa a elabora tocante e diferente medidanan sostenible cu empresa y ciudadanonan por implementa den sector di Agricultura. Cu esaki, a menciona diferente metodo pa plantamento di mata (aquaponics, agricultura sintropico), coleccion di awa y engrandecemento di nos poblacion di mata pa combati e exceso den carbon dioxide (sea weed farming). Den nos edicion di awe—cual ta ultimo di nos serie—nos ta explora e medidanan cu por implementa den e sector di Turismo pa garantisa cu e sector mas grandi riba nos isla por trece mas beneficio na comunidad y nos naturalesa.

Turismo ta un pilar economico na Aruba ya desde añanan 1950, ora gobierno bao Oscar Henriquez a dicidi pa diversifica Aruba su economia por medio di promove turismo (e tempo aki, e rafinaderia tabata e pilar economico principal riba e isla). Desde añanan 50, a mira un crecemento skerpi den Turismo y expansion di mas camber di hotel. Na 2019, a implementa un politica cu ta limita e capacidad di Turismo, cu meta pa reduci e presion cu e sector tin riba nos infrastructura y naturalesa.

Awendia, Aruba ta un di e islanan den Caribe mas sobrepobla cu turista. 25% di hogar riba e isla ta beneficia directamente for di turismo, cual ta haci e sector e pilar economico mas grandi na Aruba. Aunke turismo tin su beneficionan, esaki tambe ta trece su desbentahanan.

En principio, turismo ta pone mas presion riba nos infrastructura, manera sistemanan di riool, grid di coriente y camindanan. Ademas, construccion y renobacion di hotel ta algo cu ta tuma luga cu frecuencia, cual ta resulta den menos espacio pa naturalesa, residentenan local, y ta crea mas desperdicio—desperdicio cu ta keda na Aruba.

Ademas tin cu menciona cu turismo ta kita cierto comodidad for di localnan, notablemente riba nos costa. Den e ultimo añanan a mira un aumento den palapanan instala canto di lama, frecuentemente prohibiendo uso local. Esaki ta crea un ambiente inhusto pa localnan riba tereno cu en principio ta areanan publico. Tambe tin e cuestion di vivienda; Durante e ultimo decada a mira un aumento den vivienda Airbnb y vacation rentals cu ta tumando espacio di vivienda pa residentenan local cu tin mester di cas.

E reto cu Aruba ta enfrentando actualmente pa cu Turismo ta crea un balansa den e sector cu por trece beneficio na nos bishitantenan, pero tambe mas beneficio na nos comunidad local y naturalesa. Den un encuesta conduci pa e investigadornan di ‘Aruba 2050’, a resulta cu tin sentimentonan mixto riba e isla pa loke ta e impacto di Turismo. 75% di encuestadornan ta bisa cu Turismo ta resulta den costo di bida mas halto. Casi mita (45%) ta pensa cu turismo ta trece un efecto negativo riba nos naturalesa.

Cu e cifranan aki den mente mester considera con pa aborda e reto cu Turismo ta trece dilanti nos, y con pa reduci e presion cu e sector ta pone riba nos naturalesa

Medidanan sostenible: Turismo

Cu e crecemento di turismo, a mira na mesun momento un degradacion di rifnan di coral, specialmente den areanan hotelero. Segun e atlas di impacto climatico riba Aruba, e salud di rifnan di coral den e area aki ta den mal condicion. Ta p’esey e prome medida sostenible cu por implementa ta restauracion di coral.

Pa selecta un especie resiliente ta specialmente importante pa esaki por reduci erosion riba nos costa por medio di wanta coriente fuerte den lama. Tambe e ta sostene comunidad di pisca, y ta promove turismo via un sistema di rif saludable. Fundacion ScrubbleBubbles ya ta un pionero den e tecnica di coral farming aki na Aruba, usando tecnicanan sostenible pa restaura nos coralnan. Tambe nan ta monitoria e estado di nos coralnan durante henter e aña.

Turismo paden di pais (Inland tourism)

Diversifica turismo riba areanan mas paden di nos pais tambe por trece su beneficionan, specialmente pa localnan. Expandiendo turismo den areanan cu no ta costero por crea oportunidad di empleo pa localnan, trece entrada mas grandi pa negoshinan local y yuda preserva nos herencia cultural por medio di promocion. Tambe e ta kita e presion riba areanan costero popular y bida marino.

E medidanan aki lo trece un cambio pa eco-turismo, unda ta balansa desaroyo turistico cu esfuersonan sostenible, permitiendo localnan pa tin mas poder di tuma decision y promove responsabilidad turistico pa asina beneficia ambos bishitantenan y localnan.

Un bon ehemplo di inland tourism ta boutique hotels. E hotelnan aki ta ofrece e vivienda necesario pa turistanan sin cu mester resulta den desperdicio innecesario y uso exceso di espacio.

Ya na Aruba tin e proyecto di un hotel construi na San Nicolas, cual aunke por trece mas empleo pariba di brug, varios ciudadano ta preocupa cu esaki lo stroba e cultura rico na San Nicolas. Pues ta importante pa considera e cultura y voznan den cada districto pa asina por crea un ambiente turistico cu no ta stroba of crea disgusto den comunidad.

Cuminda local

Den nos edicion anterior tocante Agricultura, a menciona cu cultivacion local di productonan comestible por reduci e necesidad di importacion y promove un dieta mas saludable pa localnan. Sinembargo, esaki por tin su beneficio den sector di Turismo tambe. Promocion di cuminda local ta specialmente importante pa preserva y promove nos cultura y tradicionnan via cuminda crioyo, y tambe crea oportunidad pa productornan local ta e fuente principal di productonan comestible pa diferente restaurant na Aruba. Pensa riba piscadornan local, productornan di berdura y fruta, honey, carni, webo y galiña.

Pa cu esaki lo ta bon pa considera infrastructura diseña pa distribucion y procesamento di productonan, aplicacion di practicanan agricultural y educacion tocante e balor di cuminda local pa asina fortalece un sistema alimentario local y crea menos ‘carbon footprint’.

Restriccion temporal riba acceso na areanan den naturalesa

Reduci actividadnan turistico den ‘hotspots’ di biodiversidad durante cierto temporada di anja por ta importante pa yuda restaura y mantene e ecosistemanan existente riba Aruba. Pensa por ehemplo riba e temporada den cual nos shoco of ternchi ta reproduci, unda nan habitat y trankilidad ta esencial pa por reproduci exitosamente y sanamente.

Pa cu esaki por limita acceso na cierto areanan unda tin neishi of un ecosistema nobo. Limitacion riba actividadnan turistico den naturalesa manera tour di UTV tambe por mitigi disturbio den e areanan vulnerable aki.

Ta importante si pa provee suficiente educacion tocante e tipo di medida aki, ya cu por tin bishitante of localnan cu por ta desapunta pa no por experencia nos naturalesa completamente.

Pues e rapport di ‘Aruba 2050’ ta ofrece un variacion di medidanan realistico y simple cu por ser implementa riba ambos nivel nacional y individual. Educacion ecologico ta keda importante pa sigui stimula un desaroyo sano den nos naturalesa, cual ultimamente ta hunga un rol sumamente importante den e desaroyo di Pais Aruba, nos estilo di biba, cultura y tradicion.

Imagennan extrai di e catalog di Aruba 2050 pa medidanan sostenible.