(AP) — Corte Supremo di Costa Rica diamars a pidi e legisladonan di e pais pa kita presidente Rodrigo Chaves di su inmunidad legal pa e por ser husga pa acusacionnan di corupcion.
Chaves, acusa di a otorga contract di consultancy lucrativo na un socio yega, a nenga di a haci malo. Su oficina no a comenta mesora riba e decision, cu huesnan a dicidi den un votacion di 15 contra 7.
E corte mas halto di Costa Rica nunca prome a acepta un peticion pa revoca e inmunidad di un presidente. E caso awor ta bay pa congreso, cu ta ser domina pa legislado di oposicion y tin e palabra final.
Fiscalnan ta acusa Chaves di abusa di su autoridad den desvia parti di un contracto di 32,000 dollar financia pa un banco multilateral — e Banco Central Mericano pa Integracion Economico — pa su consehero y strategista di campaña, Federico “Choreco” Cruz.
Diamars, e corte mas halto tambe a pidi e minister di cultura y ex hefe di personal di Chaves, Jorge Rodríguez, pa para dilanti hues den e mesun caso.
E caso a surgi pa prome biaha na 2023 ora cu medionan local a publica grabacionnan di audio filtra cu a pretende di mustra Chaves ta papia tocante e envolvimento di Cruz den e contractnan.
Chaves y su aliadonan tin otro casonan pendiente contra nan.
Oficina di fiscal general di Costa Rica a presenta un acusacion separa siman pasa acusando e presidente di financiamento ilicito di e campaña electoral di 2022 cu a trec’e na poder.
Chaves tambe ta nenga e acusacionnan ey.
