E area Caribense ta wordo afecta actualmente grandemente pa e gran cantidad di sargassum, yerba di lama, cu ta yega na su costa. E problema aki parce cu ta bira cada aña mas serio. Varios pais den e region a cuminsa usa sistema di monitor y mecanismo pa responde, pa asina limita e impacto negativo riba turismo, economia y salubridad. Nan ta aloca presupuesto apart pa esey y ta busca colaboracion regional.

Den e contexto aki, Fraccion di MEP a haci un serie di pregunta na gobierno di Aruba pa sa con bon prepara nos pais ta pa enfrenta e reto creciente aki. E preguntanan ta inclui:

Cua ta e impacto actual di sargassum na Aruba;

si ta necesario pa tin un plan nacional di accion of protocol pa calamidad;

y con ta e colaboracion entre e departamentonan esencial manera CMO, DOW, DNM y ATA.

Tambe ta pidi atencion pa:

involucra DVG pa motibo di riesgo pa salud cu sargassum den descomposicion por causa;

proteha nos ecosistemanan manera rif di coral, mangelnan y turtuga di lama;

y pa duna sosten na sector turistico, incluyendo un plan financiero y logistico pa resort y comerciante chikito.

Ademas ta propone pa busca uso innovativo pa e sargassum recolecta, manera compost, biogas of material di construccion. Mirando cu Aruba tin un surplus den presupuesto awor, ta puntra con gobierno ta planifica pa destina fondo specificamente pa combati sargassum.

Mas e pregunta ta inclui si ta necesario pa pidi yudansa internacional via Caribbean Community Climate Change Centre of via Union Europeo, intensifica colaboracion regional cu Bonaire, Corsou, Republica Dominicana y Mexico, y desaroya un strategia di comunicacion pa pueblo Arubiano, piscadonan, esnan cu ta bay beach, y esnan cu ta biba den e area.

Fraccion di MEP a pidi gobierno pa contesta e preguntanan aki den dos siman (2), pa Aruba por evalua den forma transparente con bon prepara nos ta pa e menasa ecologico y economico aki.

“Ora bo cana na nos costa norte, bo ta mira cu e no ta un problema di mañan — sargassum ya ta pone presion riba nos costa, nos naturalesa y nos economia awor caba. Nos mester tuma accion awor pa proteha nos sector turistico, nos salud y nos ecosistema vulnerabel. Aruba no por laga mas tempo pasa sin haci nada.”, segun lider di fraccion Evelyn Wever-Croes