(AP) — Dies miles fiestero a yena e plasa principal di Pamplona, den norte di Spaña, diadomingo pa celebra e “chupinazo”, un show di klapchi cu ta marca e inicio oficial di e festival di San Fermín, caminda ta core cu toro.
Casi tur hende — incluyendo e monton di turistanan stranhero cu ta yega pa e evento — tabata bisti den e trahe tradicional: camisa y carson blanco cu un faha y paña color cora rond di nan wowo y cintura.
Nan a canta. Nan a grita. Y nan a bebe alcohol sin stop.
Ora e raket cu ta marca e cuminsamento di e fiesta oficial a ser lansa, hopi hende a tira otro cu biña cora.
Atraccion principal: e “encierros” peligroso
E punto mas importante di e festival polemico cu ta dura nuebe dia ta e “encierros”, of core cu toro, cu ta cuminsa awe mainta. Miles di hende balente — of imprudente — ta core pa evita seis toro cu ta coriendo nan tras riba un ruta curva di piedranan den direccion di e plasa di toro di e ciudad.
Aunke sanger no ta incomun, hopi mas hende ta sali herida den caidanan, mientras espectadornan ta wak for di balcon of baricadanan di madera instala rond di e ruta. E espectaculo ta ser transmiti riba nivel nacional.
Cuminda, fiesta y cultura
E resto di cada dia ta yena cu cuminda, bebida, baile y entretenimento cultural — incluyendo pelea toro, caminda e toronan cu a core mainta ta ser mata pa matadornan profesional tur atardi.
E festival a bira famoso internacionalmente danki na Ernest Hemingway su novel clasico di 1926, “The Sun Also Rises”, riba bohemionan Mericano cu ta gasta nan tempo den Europa.
