Ayera durante dia, comunidad di Aruba y particularmente e esfera politico tabatin tur atencion riba e movementonan di prome minister Mike Eman (AVP), despues cu un reunion cu Gobernador di Aruba, Su Excelencia Sr. Alfonso Boekhoudt, a keda cancela. Expectativa tabata cu prome minister lo a presenta e candidato pa completa e gobierno nobo, pero aparentemente, no tabatin suficiente sosten pa e opcion cu kier a presenta.

Segun medionan di comunicacion local, e intencion tabata pa prome minister Eman presenta Sr. Rene ‘Baba’ Herde como candidato pa minister di Infrastructura, Energia y Telecomunicacion. Esaki tabata e cartera cu inicialmente Sr. Mike de Meza lo mester a asumi, pero despues cu e no a logra pasa su screening cu Departamento di Impuesto, y a bira sospechoso den un caso penal, no por a continua cu e proceso. Siman pasa, prome minister a anuncia cu lo busca un otro candidato awo pa asumi e cartera.

Medionan local a reporta cu ayera 2or di atardi tabatin programa un reunion cu Gobernador, unda prome minister Eman lo tabata di presenta Sr. Herde como candidato pa minister. Tabatin indicacion cu tur cos tabata cla pa e nombramento di Sr. Herde. Sinembargo, parce cu na ultimo momento, internamente den partido no tabatin suficiente sosten pa e nominacion. Fuentenan cercano a bisa prensa local cu motibo di e obhecion tabata entre otro Sr. Herde su edad halto, y e hecho cu e no tabata riba lista di partido AVP. Esaki a pone cu Eman mester a cancela e reunion cu Gobernador mientras ta busca di yega na un acuerdo pa un candidato nobo.

Den comentarionan na prensa local pafo di oficina di Gobernador siman pasa, prome minister a bisa cu “na e momentonan aki nos ta den e proceso – mi tabatin combersacion cu Sr. De Meza, e tambe ta compronde cu nos a yega na e punto cu mester busca un otro candidato, mientras tanto en todo caso – y partido lo bay internamente pa haci evaluacionnan di kico ta e miho decision, y esey nos no a yega na dje ainda. Kiermen speculacion lo tin hopi, pero nos no a yega na un decision final.”

Keto bay, e asunto di nombramento pa e di siete minister di Gabinete AVP-FUTURO ta keda confronta obstaculo. Esaki ta pone cu ya ta mas cu tres luna cu e ministerio di Infrastructura, Energia y Telecomunicacion ta bao encargo temporal di otro minister. Den e caso di Infrastructura y Energia, ta minister di Husticia, Arthur Dowers a keda encarga di e cartera “por lo pronto.” E situacion ta cuestionable en parti pasobra prome minister ta aludi cu ta buscando toch un manera pa eventualmente Sr. De Meza bira minister. Entre otro, siman pasa prome minister a menciona cu De Meza tabata trahando na e ministerionan tras di cortina. El a indica cu a pesar cu De Meza no tabata minister, si e tabata duna “idea” na minister Dowers tocante e carteranan. El a bisa cu “a consulta continuamente [cu De Meza] si riba kico mester haci riba e tereno cu el a haci hopi trabao adicional, y minister Dowers ta den contacto cune riba e ideanan cu e tin pa locual ta trata e diferente portefeuille y awo cu e ta bisto cu nos tuma e siguiente paso pa yena e buraco den e portfolio aki, nos ta bay ta canando e caminda ey.”

Manera menciona den un Editorial di Bon Dia Aruba, e idea di nombra un minister “temporalmente” no ta cuadra cu ley, unda no tin un opcion pa un nombramento “temporal”. Esaki ta nifica cu mester busca un candidato cu ta dispuesto pa eventualmente entrega e cartera, of cu toch e minister nombra lo keda cu e cartera permanentemente.

Speculacion ta pone parlamentario Stephany Sevinger den luz negativo
 Mientras cu e proceso ta cana su caminda cu un cierto grado di secresia, loke ta apropia pa e situacion, e falta di informacion den pueblo tocante e procesonan di discusion interno pa nombra un candidato nobo a duna espacio pa hopi speculacion. Banda di Sr. Herde, un nomber cu ta circula frecuentemente, y cu a aparece ayera den noticieronan local como un potencial candidato pa bira e di siete minister, ta e actual presidente di Parlamento, Sr. Marlon Sneek.

Pero otro nomber a hala mas atencion, y a pone un luz negativo riba un parlamentario. Ta trata di Stephany Sevinger. Prome minister Eman no a duna indicacion di ken, of cuanto persona ta considerando pa e posicion di minister. Es mas, siman pasa ora prensa a presiona pa e confirma cu tabata considerando Sr. Herde, prome minister simplemente a bisa cu pueblo lo haya sa asina cu tin un decision. Pero esaki no ta stop rumor y speculacion, y e biaha aki, den algun medio local, e nomber di Stephany Sevinger a cay aden.

Esaki a pesar cu probablemente, Gabinete AVP-Futuro no lo ta considerando Sevinger pa un posicion ministerial. Esaki en parti pa motibo cu, igual na Sr. De Meza, probablemente lo haya obstaculo den e parti di screening.

Manera publica anteriormente pa Bon Dia Aruba, e proceso di screening ta consisti di seis investigacion, y un parti di esaki ta inclui famia inmediato di e candidato. Den e caso di Stephany Sevinger, esaki lo inclui su tata, ex-minister Benny Sevinger, kende tin un condena penal den su contra pa complicidad den fraude, soborno pasivo, abuso di funcion y malversacion, den caso Avestruz. A pesar cu Sevinger a apela su sentencia den caso Avestruz, den e caso di expropiacion, april ultimo hues a dicta sentencia cu Sevinger mester paga 840.051,91 florin back na pais Aruba.

Durante e investigacion di expropiacion den e caso aki, a bin dilanti cu Benny Sevinger a usa placa cu corte a considera a keda obteni criminalmente, pa paga huur di apartamento di su yiu Stephany Sevinger na Merca, pa un total di casi 40mil florin, cu el a paga cash. Ademas, a haci pago di algun biahe pa Stephany Sevinger, cu ta inclui den e suma total di mas di 70mil florin cu Benny Sevinger a gasta den biahe. Den corte, Benny Sevinger no por a demostra con el a obtene e placa aki. Pero e hecho cu placa obteni criminalmente pa su tata a ser usa pa faborece parlamentario Sevinger, ta pone un sombra no solo riba su rol como parlamentario, sino riba su carera politico. Mester remarca cu durante tratamento di caso Avestruz, y hasta despues cu Benny Sevinger a keda condena pa hechonan castigable, Stephany Sevinger nunca a denuncia cu loke ex-minister Sevinger a haci ta fout, sino a para banda di su tata. Y mientras cu como yiu esey ta comprendible, como parlamentario y politico su deber ta pa para banda di pueblo prome.

Mientras tanto, oficialmente ainda no tin nada confirma riba e candidato pa bira di siete minister pa Gabinete AVP-Futuro, loke ta nifica cu ainda lo tende mas nomber, mas rumor, y mas speculacion.